1 ¹ Mai vei Pita, e dua na i apositolo i Jisu Karisito. Kivei ira na tamata digitaki ni Kalou era sa tiko vakavulagi ka duiveiseyaki tu mai Ponito, kei Kalatia, kei Kapatosia, kei Esia, kei Picinia. ² O ni sa digitakia ka lesi oti tu mai vua na Kalou na Tamada, ena veivakatabui ni Yalo Tabu, mo ni talairawarawa vei Jisu Karisito ka vakasavasavataki ena nona dra. Me qai nomuni na loloma-savu kei na vakacegu sa vuabale. ³ Me da ia na vavinavinaka vua na Kalou na Tama ni noda Turaga o Jisu Karisito! Ena vuku ni cecere ni nona yalololoma, sa solia kinia vei ita e dua na bula vou ena nona vakaturi Jisu Karisito cake voki mai na mate. Eda sa vakasinaiti kinia ena i nuinui dei ka bula, ⁴ ka da namakia me da taukenia na noda i votavota sa maroroya na Kalou mai lomalagi ka sa yali ni rusa rawa, se tauvi duka, se malai rawa, se seavu yani. ⁵ A veika koya era sa nomuni, oi ikonu ka sa taqomaki tiko ena kaukauwa ni Kalou ena vuku ni vabauta, me na nomuni kina na veivabulai sa varau me vatakilai ena i otioti ni gauna. ⁶ Mo ni reki tiko lia ena ka koya, ka dina lia ni sa kilikili kei ikonu mo ni kune rarawa vakalailai ena vuku ni veimataqali veivakararawataki e levu sa yaco tiko vei ikonu. ⁷ Sa kedra i naki lia me vakadinati kinia na dina ni nomuni vabauta ni sa vatovolei. Ni sa talei valevu cake na nomuni vabauta mai na koula sa caca rawarawa, e dina lia ni dau vatovolei ena bukawaqa. O ni na qai vaivotavota emuri ena lagilagi kei na dokai ena Siga sa vakatakilai kinia o Jisu Karisito. ⁸ E dina lia ni o ni se bera ni raici koya, ia o ni sa lomani koya. E dina lia ni sa yali ni rawa mo ni raici koya ni kua, ia o ni sa vakabauti koya lia, ka reki tiko ena reki sa lagilagi ka yali vamacalataki rawa, ⁹ baletia ni o ni sa ciqomia tiko na nomuni vabulai, ka sai koya lia koya na i naki ni nomuni vabauti koya. ¹⁰ Era a vasaqara ka vatarogia matua na veivabulai koya o ira na parofita, ka ra parofisaitakia kinia ni na solia na Kalou na i solisoli koya vei ikonu. ¹¹ Era a vatarogia tiko se na yaco ena gauna cava ka yaco vaevei me vaka sa dusia tiko na Yalo i Karisito sa tiko e lomadra, ni na sota kaya mada eliu na veika rarawa na Karisito ka qai muria mai na veika lagilagi ka dokai. ¹² A sa vakatakila na Kalou vei ira na parofita koya ni ra sa yali ni cakacaka tiko ena vukudra lia, ia ena vukumuni, ena nodra sa tukunia na veitukutuku eso o ni sa qai rogocia koya mai vei ira sa vunautakia na i Tukutuku Vinaka ena kaukauwa ni Yalo Tabu sa talai mai lomalagi. A veika koya era sa bau gadrevia voki tu lia na agilosi me ra kila. ¹³ O koya koya, me yadra tiko kinia na nomuni vakasama ena vuku ni cakacaka mo ni caka. Ni yalomatua ka nuitakia lia na loloma-savu ena soli vei ikonu ena gauna sa rairai mai kinia o Jisu Karisito. ¹⁴ Ni talairawarawa vua na Kalou, ni kakua ni muria voki na nomuni veigagadre ca eliu ena gauna o ni se lecaika tu kinia. ¹⁵ Ia me vaka sa yalosavasava o koya sa kacivi ikonu, mo ni yalosavasava voki lia vakakinia ena nomuni i valavala kece lia; ¹⁶ ni sa tukunia na i Vola Tabu, “Mo ni yalosavasava, ni'u sa yalosavasava oi au.” ¹⁷ Me vaka ni o ni sa masutia e dua na Tama sa dau lewa vadodonu na cakacaka ni tamata yadua ka yali ni dau veitotaki, mo ni qai vaitovotaki ikonu kinia ena varokoroko vua na Kalou ena gauna taucoko ni nomuni bula e vuravura. ¹⁸ O ni sa kila na ka o ni sa voli kinia mai na i vakarau ni bula yali yaga ka a dewa sobu mai vei ira na nomuni qase. Ni o ni a yali ni voli ena veika caca wale me vaka na siliva se koula, ¹⁹ ia ena dra talei lia i Karisito, me vaka na dra ni lami sa yali ni ca se duka e dua na tikinia. ²⁰ A sa digitaki koya oti tu na Kalou ni bera ni tauyavutaki o vuravura, ia sa qai vakatakilai lia mai ena i otioti ni gauna koya ena vukumuni. ²¹ Ena vuku i Karisito dua loa lia o ni sa vabautia kinia na Kalou, o koya sa vakaturi koya cake voki mai na mate ka solia vua na lagilagi; ni sai koya lia na Kalou ka sa vataudeitakia na nomuni i nuinui kei na vabauta. ²² Ia koya, ena vuku ni kena sa vasavasavataki na yalomuni mai na nomuni talairawarawa ki na ka dina ena kaukauwa ni Yalo Tabu, kei na nomuni sa lomani ira na wekamuni vayalo, mo ni qai veilomani dina sara kina ena vu ni yalomuni taucoko. ²³ Ni sa yaco mo ni sucu vou voki, ka yali ena i tei sa vaiyalayala lia na nona bula, ia sa yali ni vaiyalayala lia, ena vosa lia ni Kalou sa bula ka tudei. ²⁴ Me vaka sa tukunia na i Vola Tabu, “Sa vaka na co na tamata kece lia, kei na nodra lagilagi sa vaka na se ni co. Sa dau malai na co, ka sa mira na sena, ²⁵ Ia na Vosa ni Kalou sa tudei lia ka yali ni mudu.” Sa i koya lia koya na i Tukutuku Vinaka sa vunautakia vei ikonu.