7 ¹ Ia e na vuku ni vika dou sa volavola kinia vei au: Sa vinaka vua na tagane me kakua ni viyacovi kei na yalewa. ² Ia me kakua ni ia na vibutakoci, me sa bau vawati na tagane yadua, ka me sa bau vawati na yalewa yadua. ³ Me ia vua na yalewa na tagane na ka sa dodonu e na vilomani: me vaka voki lia kinia na yalewa vua na tagane. ⁴ Sa yali ni vitaliatakia na yagona na yalewa sa vakawati, sa lewa lia na watina: a sa vaka voki lia kinia sa yali ni vitaliatakia na yagona na tagane sa vakawati, sa lewa lia na watina. ⁵ Dou kakua ni tarovia na viyacovi vakai ikodou, me ia lia ni sa vinakatia ruarua e na gauna lekaleka, mo dou lalaga ki na lolo kei na masu; ia dou qai viyacovi voki, de dauveretaki ikodou o Setani e na vuku ni nomudou dauveidomoni. ⁶ Ia kau sa tukunia koya, ni sa tara tu e yali ni sa varoti. ⁷ Ia kau sa vinakatia me vataki au na tamata kece lia: ia sa rawa mai vua na Kalou na tamata yadua nai solisoli e dui yaga, e dua sa vaka koya, e dua tani sa vaka ko ya. ⁸ Ia kau sa vosataki ira sa yali ni vawati kei ira na yada, E yaga vei ira me ra tiko vakinia me vakataki au: ⁹ ia kevaka era sa dredre ni tarovi ira, me ra vawati: ni sa vinaka na va wati ka ca me daugagano. ¹⁰ Ia kau sa vosataki ira sa vawati tiko, ia ka sa yali ni vakai au, na Turaga lia, Me kakua ni dainia na watina na yalewa sa vawati: ¹¹ (ia kevaka sa tuba, me kakua ni vawati voki ko koya, se me rau veivinakati voki kei na watina;) ia na tagane sa vawati me kakua voki lia ni dainia na watina. ¹² Ia vei ira lia sa vo kau sa kaya vakai au, sa yali na Turaga: Kevaka e dua na wekada, sa yali ni lotu na watina, a sa via tiko vata kaya na watina, me kakua ni dainia tani. ¹³ Kevaka sa loma ni tagane yali ni lotu me rau tiko vata kei na watina, me kakua ni tubataki koya na yalewa. ¹⁴ Ni sa vasavasavatakia na tagane tawa lotu na watina, a sa vasavasavatakia voki lia na yalewa sa yali ni vabautia ko koya na watina; ia kevaka sa yali ni vaka koya, era sa tawa-savasava na nomudou gone; ia koya, era sa savasava. ¹⁵ Ia kevaka sa tuba ko koya sa tawa lotu, me tuba lia. Me qai veitalia lia na tagane se na yalewa sa lotu ni sa vaka koya: ia sa kacivi ita na Kalou me da tiko vacegu lia. ¹⁶ Ko sa kila vaevei, o iko na yalewa se ko na vabula na watimu, se yali? se ko sa kila vaevei, o iko na tagane, se ko na va bula na watimu, se yali? ¹⁷ Ia me vaka sa solia yadua vei ira na tamata na Kalou, me vaka na nona tiko ni sa kacivi koya na Turaga, me tiko lia va kinia. Au sa lewa me va kinia e na veisoqosoqo lewe ni lotu kece lia.

¹⁸ Kevaka e dua sa kacivi ni sa cili me kakua ni dai na cili. Ke dua sa yali ni cili ni sa kacivi, me kakua ni cilivi. ¹⁹ A ka loa lia na cili, a ka wale voki lia na tawa cili, ia sa yali ni vaka kinia na talairawarawa ki nai vakaro ni Kalou. ²⁰ Me tiko lia na tamata yadua me vaka na nona tiko ni sa kacivi. ²¹ O sa bobula beka ni ko sa kacivi? kakua ni vuturi kinia: ia kevaka e rawa mo sereki, mo vayagatakia lia. ²² O koya sa bobula ni sa kacivi koya na Turaga sa qai nona tamata sere na Turaga; sa vaka voki lia kinia ko koya sa lalaga ni sa kacivi, sa bobula vei Karisito. ²³ Dou sa voli lia e nai voli; dou kakua lia ni nodra bobula na tamata. ²⁴ Na veiwekani, me tiko na tamata yadua kei na Kalou, e nai tutu sa tiko kinia ni sa kacivi. ²⁵ Ia e na vukudra era yali ni vawati, sa yali ni tu vei au nai vakaro ni Turaga: ia kau sa lewa vakai au lia, me vaka e dua sa rawa na loloma ni Turaga meu dina kinia. ²⁶ A ka koya kau sa nanumia sa yaga e na gauna ni ca koya, me tiko loa lia na tamata sa va kinia. ²⁷ Sa dua beka na watimu ko sa vauci kinia? kakua ni va tovolea mo sereki voki. Sa yali beka ni dua na watimu, ko sa vauci kinia? kakua ni vaqara e dua me watimu. ²⁸ Ia kevaka ko sa ia na vawati, ko sa yali ni cala kinia; ia kevaka sa ia na vawati e dua na goneyalewa, sa yali ni cala kinia. Ia ko ira sa vaka koya ena va rarawataki na yagodra: ia koi au, au sa lomani ikodou. ²⁹ Ia na ka koya kau sa tukunia, oi ikodou na veiwekani, Sa valekalekataki na gauna sa vo: ia koya me ra vataki ira era sa yali ni vawati ko ira na tagane sa vawati: ³⁰ kei ira era sa tagi, me ra vataki ira era sa yali ni tagi: kei ira era sa reki, me ra vataki ira era sa yali ni reki; kei ira era sa veivoli, me ra vakataki ira sa yali na nodra ka; ³¹ kei ira era sa vayagatakia na veika ni vuravura koya, me ra vakataki ira era sa yali ni vayagatakia vakaca: ni sa qai tani yani nai valavala ni vuravura koya. ³² Ia kau sa vinakatia mo dou kakua ni lomaocaoca. Na tagane sa yali ni vawati sa daunanumia lia na veika ni Turaga, se me vinaka vaevei vua na Turaga: ³³ ia na tagane sa vawati sa daunanumia ki na veika ni vuravura koya, me vayalovinakataki koya vaevei na watina. ³⁴ Sa dua tani na goneyalewa kei na yalewa sa vawati. A yalewa sa yali ni vawati sa daunanumia ki na veika ni Turaga, me savasava tiko na yagona kei na yalona voki lia: ia na yalewa sa vawati sa daunanumia ki na veika ni vuravura, se na vinakati koya vaevei na watina. ³⁵ Ia na ka koya kau sa tukunia me yaga vei ikodou; au sa yali ni via vataotaki ikodou, au tukunia lia na ka sa kilikili kei ikodou, mo dou dauqaravia na Turaga ka yali ni lomaocaoca. ³⁶ Ia kevaka e dua na matua sa nanumia sa yali ni lewa vinaka e na vuku ni luvena-yalewa, kevaka sa oti na gauna ni gone, a sa dredre ni tiko loa lia, me veitalia lia; sa yali ni cala ko koya: me ra vawati. ³⁷ Ia ko koya sa dei sara na lomana, a sa yali ni dredre vua me tiko loa lia, a sa rawa lia na yalona, ka sa lewa lia e na yalona me tara tiko na luvena-yalewa, sa caka vinaka. ³⁸ Sa qai va koya, o koya sa solia na luvena-yalewa me vawati sa caka vinaka lia; ia ko koya sa yali ni solia me vawati sa caka vinaka cake. ³⁹ Sa vaucia na yalewa na lawa, ni sa bula tiko na watina; ia kevaka sa mate na watina, sa qai tara vua me vawati voki kei na tagane sa vinakatia ko koya; ka me ia lia kei koya sa nona na Turaga. ⁴⁰ Ia sa noqu lewa sa kalougata cake ko koya kevaka sa tiko lia vaka ko ya: ia kau sa vakasama voki lia ni sa tiko vei au na Yalo ni Kalou.