6 ¹ E dua beka vei ikodou sa doudou, ni rau sa veicudruvi kei na dua tani, me rau qai lewai e na matadra na tawa-yalododonu, ka me kakua lia e na matadra na lotu? ² Dou sa yali beka ni kila ni na lewai ira na kai vuravura ko ira era sa lotu? ia kevaka dou na lewai ira na kai vuravura, dou sa yali beka ni yaga mo dou lewa na ka lalai sara? ³ Dou sa yali beka ni kila ni da na lewai ira na agilose? ia ka yali ni vakalevu cake me da lewa na veika vavuravura koya? ⁴ Ia kevaka dou sa ia na veilewai e na ka vavuravura, dou lesi ira kinia era sa dokai valailai sara e nai soqosoqo lewe ni lotu? ⁵ Au sa vosa, mo dou madua kinia. E dina beka ni sa yali sara e dua vi ikodou sa vuku, me lewai ira rawa na wekana? ⁶ a ra sa qai na veiwekani me ra vilewai, io, e na matadra era sa yali ni vabautia? ⁷ Ia sa qai ka ca vakaidina vi ikodou koya, ni dou sa dau yadia na ka ki na veilewai. E vaevei ni dou sa yali ni vosotia ni dou sa vacacani? e vaevei ni dou sa yali ni vosotia ni dou kovei? ⁸ Ia koi ikodou, dou sa dauvivacaca, dou sa daukovekove, io, vei ira na wekamudou. ⁹ Dou sa yali beka ni kila, ni na yali ni rawa na matanitu ni Kalou ko ira sa yali ni yalododonu? Dou kakua ni vaisini ikodou: o ira na daudara, kei ira na dausoro ki na matakau, kei ira na dauyalewa, kei ira na viavia vaka na yalewa, kei ira na veimoceri vatagane, ¹⁰ kei ira na daubutako, kei ira na daukocokoco, kei ira na daumateni, kei ira na dauveivakasewasewani, kei ira na daukovekove, era na yali ni rawa na matanitu ni Kalou. ¹¹ Ia dou sa vaka kinia eliu koi ikodou eso: ia dou sa sili, dou sa vasavasavataki, dou sa vadonui, e na yaca ni Turaga ko Jisu Karisito, kei na Yalo ni noda Kalou. ¹² Sa tara vei au na ka kece lia, ia ka sa yali ni yaga na ka kece lia; sa tara vi au na ka kece lia, ia kau na yali ni dainia me rawai au e dua na ka. ¹³ Sa ka ni kete na kakana, ka sa ka ni kakana na kete: ia ena va rusai rau ruarua na Kalou. Ia na yago sa yali ni ka me daudara, ia me nei koya lia na Turaga; ka sa yaga na Turaga ki na yago. ¹⁴ Ia na Kalou ka vatura cake na Turaga, ena va turi ita cake voki lia, e na nona kaukauwa. ¹⁵ Dou sa yali beka ni kila ni sa veitiki i Karisito na yagomudou? ia meu yadia beka na veitiki i Karisito, ka caka me veitiki i koya na yalewa dautagane? Me kakua sara. ¹⁶ E vaevei? dou sa yali beka ni kila, o koya sa veitau kei na yalewa dautagane erau sa yago e dua bau? ni sa kaya o koya, Oi rau na lewe rua, erau na yago e dua bau. ¹⁷ Ia ko koya sa kabitia na Turaga erau sa yalovata. ¹⁸ Dou dro tani mai na daudara. Sa ka e taudaku ni yago nai valavala ca kece lia sa caka na tamata, ia o koya sa daudara sai valavala ca ki na yagona. ¹⁹ E vaevei? dou sa yali beka ni kila ni sa vale ni Yalo Tabu na yagomudou, o koya sa curumi ikodou, o koya dou sa rawa mai vua na Kalou, ia dou sa yali ni nomudou? ²⁰ ni dou sa voli e nai voli; o koya ko ya mo dou qai varokorokotakia na Kalou, e na yagomudou.