¹ JJuaje veinte (20) pa wai beje kujinae jawalia Salomon nakueneba Diosonu piaja bo pijinia piaja bo, ² Salomon yajjania nakueneba pa tomaranu Hiram rajutsi, ajara belia israel piaja tomara piajiwi kalia. ³ Salomon barunabia Hamat pe amaneyabi jawabelia. ⁴ Bajara ponu nakueneba Tadmor petsewi ira wajata, yajawa dajjita pa tomaranu jawata kaetetuabijitsia, jjuanuje nakueneba Hamata jawata. ⁵ Pijinia bajara ponu nakueneba Bet Horon wauyabetsia yajawa Bet Horon pe muto jawata, pa tomaranu penayajiwi karanatsi jawa jjaina ibo pana jjanetonuta, baupa jjanetonu jjaina pejone nejja tomarabelia yajawa jiero naeburutonu ata. ⁶ Bajara ponu nakueneba Baalat dajjita baja patomaranuta pe jjanewaetsu nejja pe jjainae jawanu, dajjita pa tomaranu piaja karonu nejja, piaja tomaranu kaballonuta pe yajibawanapaewi, jjua jamatabu na kueneba pe nabaru yatae nejja Jerusalen jawata, Libano jawata, yajawa dajjita pa irata itoroba. ⁷ Dajjita pamonae pe yajawunu nakopabiwi hititawi, amoreowi, ferezeowi, heweowi, yajawa jebuseowi, pamonae apo Israel pia jiwi, ⁸ piaja monaewi pe nakopabiwi ajara pamonae kujinae ajara pa nakua jawata, pamonae Israel piajiwi apo beyejebi, piaja pianiwi ejjana Salomon, ajena pa matakabi jawabelia. ⁹ Itsiata, Salomon apo itsi piaja pianiwi kuenia Israel tomara pia jiwi. Saya, pamonaeje piaja wajabitsaunuanu naejjana, pe itorobi nuanu, pe matakaponaenuanu yajawa pe itorobinuanu karojawanu jawata yajawa kaballo jumata nabewi. ¹⁰ Pamonae ata pijinia pe itorobinuanu taewanapa pe naitojjuto kaewetsiwi piajiwi jawa reinu Salomon, dosciento cincuenta (250) bajara pamonae yajawunu jiwi beje, naitajjuto kaeweta biaba itsa monae pe nakuenebi wanapaewi. ¹¹ Salomon ka rena Faraon pejjunatoyo apo kapata jopae David piaja tomarata sajinaya ajara powa nejja to nakuenebeta, baitsi bajara ponu jumaitsi: "Ta baru ponaponaewa akuenebi pe ponaponae jawa David piaja bo jawata, Israel piaja reinu, baitsi tsajota Diosonu piaja arka pe tajjunae ajara jjua nejja sayabaja." ¹² Nejjata Salomon to tajuita Diosonu nejja piaja ibotonu jumata bajara ponu nejja peto nakuenebi jawa baupa rowialia. ¹³ Bajara ponu perajutsi jawa nejja to itsi pakuenia dajjita matakabita itsi tsabiabi; to itsi, pakuenia Moises piaja bajjutota itoroba, sabado matakabita, pakujinae pejana juemeto ekaika jjua pijinia kae wai kanakujitsia nakaetuata biaba pe yawajibi nejja: Pe nakaetuatsi matakabi festiwal paun itsi nejewa pe yajinae ejjanae jawa, na kaetuata festiwal semananu jawa, yajawa festiwal Dioso piaja Tabernakulo jawanu jawa. ¹⁴ Pe itorobi kuenia pajjami David, Salomon itoroba pakuenia sacerdotewi pakuenia nakuebijitsia, lewitawi pakuenia itorobatsi, Diosonu peto itsi nejja yajawa peya wenonae nejja sacerdotewi, pe namatawenonae kuenia dajjita matakabi. Pijinia noba baupa ewetsi nejja baupa kanakujitsia, baitsi David, Dioso piaja jiwitonu, pijinia bajara pakuenia itoroba. ¹⁵ Pamonae pe itorobi kueniatsi reinu pe yawenonae nejja sacerdotewi yajawa lewitawi itajjutejema jawa nejja, o pe jjane waetsi nejja. ¹⁶ Dajjita jjua Salomon itoroba penakuenebi nejja baja wereta, pamatakabi Diosonu piaja bo nejja jjanewaeta nubape nakobe weretsiu jawabelia. Diosonu piaja bo wereteta. ¹⁷ Ajara jjua Salomon pona Ezion Geber yajawa Elot jawabelia, pe itapa yabelia Edom nakua. ¹⁸ Hiram to itorobalia pinija mo jjanetonu pe matakajina wanapaewi yajawa peyaputaewi pe kajinawanapae nejja. Pamonaeje Salomon piaja pianiwi yajawa yaponareka Ofir jawabereka. Pamonaeje ajara jota kujinae kaponaina cuatro ciento (450) pa talento beje, dieciseis mil pa kilo beje (16000) oro jawanu reinu Salomon nejja.