¹ Wagalatia bayenga, nee biiso lini bebee koba onaa? Buni Yesu Kristo ndabe komonesha bole ole nee makomo kombala yee miiso yiino? ² Meno nele mokokonda tu kocheba ite kohola kwino. Buni mobe kopokela motema yee sambo naane kwe kohetaboka kedya mobe koungunwa? ⁴ Buni mobe koteseka kwe myanda chiwelele botaka, ite kweli yabe yee botaka? ⁵ Buni awe obe kohocha motema kwino nee koketa matendo yee bahame kati yiino koketa kwe matendo yee sambo naane kwe kuungunwa amoosa nee imani? ⁶ Abrahamu "obe komoamini Firinyambe obe kobalekebwa koba nee sambo." ⁷ Kwe namuna ena ena mochebe ite, badya bashi koamini nee baana be Abrahamu. ⁸ Andiko lebe kotabiri ite Firinyambe ongee kobabaleka sambo bando be mataifa kwe njela yee imani. Injili ebe kuhubiriwa bango kwe Abrahamu: "Kole awe mataifa yiise yatabe kobarakiwa." ⁹ Ite komongo badya babe nee imani babalekebwe amoosa nee Abrahamu, adya obehele nee imani. ¹⁰ Badya bale kotegemea matendo yee sambo bale ase yee laana. Kwe koba yashi koandakwa, "Washi kolaaniwa kila mondo odya otashi koshikamana nee myanda yeese yaabe koandekwa kole kitabu kye sambo, koketa yiise." ¹¹ Bobo nee bohololo ite Firinyambe ndashi kobaleka sambo naane amoosa kwe sambo, kwe koba obe nee sambo otachikane kwe imani. ¹² Sambo etashi koholana nee imani, naane komongo kwake, "obe koketa myanda ena kole sambo, otachikane kwe sambo." ¹³ Kristo obe kotokombola baatu kohola kole laana yee sambo wakati obe koketwa laana kwe ajini yiito. Kwe bodya yaabe koandekebwa, "Obe kolaaniwa kila mondo obe kotongekwa iyolo yee motee." ¹⁴ Lengo lebe koba ite, baraka edya yaale kwe Ibrahimu etabehele kwe bando be mataifa kole Kristo Yesu, ite bobo tohobe kopokela ahadi yee motema kohetela imani. ¹⁵ Babotwa, nele mokotenda kwe namuna yee bando kalonga. Nane wakati odya agano yee baando kalonga yaabe koketwa imara, kuushi okaobe kopooza nane koongezeka. ¹⁶ Bobo ahadi yaake kohochebwa kwe Ibrahimu nee kwe hebota dyake. Etashi kohocha, "kwe bibota," komaanisha biwelele bali komongo yaake amoosa pekee, "kwe hebota yaabo," bodya nee Kristo. ¹⁷ Bobo nashi kohocha bobo, sambo ena yabe kobaka miaka miya chinachi makumi nee chisato kombala, etashi kobandosa agano yee komongo lebe koketwa nee Firinyambe. ¹⁸ Kwe koba ite urithi ongaaba kwe njela yee sambo, otashi lukine kobaka kwe njela yee ahadi. Awe Firinyambe obe kohola botaka kwe Ibrahimu kwe njela yee ahadi. ¹⁹ Kwe bikye nani sambo yaake kohochebwa? Yaabe koongezebwa kwe sababu yee makosa, mopaka hebota wee Ibrahimu obeke kwe badya bale kwabo obehele koahidiwa. Sambo yaake koketwa kole shinikizo kohetela malaika kwe loboko lwe mopatanishi. ²⁰ Bobo mopatanishi washi komonesa zaidi yee mondo amoosa, bali Firinyambe nee omoosa peke yaake. ²¹ Kwe bodya buni sambo ele komongo nee ahadi yee Firinyambe? La hasha! Kwe koba ite sambo yaabe koba yaashi koholebwa yaabe nee bokome wee kobesa bushima, haki yaabe kokonjebwa kwe sambo. ²² Bobo kombala yaake, andiko yaashi kobungwa myanda yiise kosse kwe dhambi. Firinyambe obe koketa bobo ite badya ahadi yaake yee kotashi kotookoa baatu kwe imani kole Yesu Kristo ehobe kopatikana kwe badya bale koamini. ²³ Bobo kombala yee imani kole Kristo enabaka, tobe kofongwa nee koba kosee kwe sambo bodya obee ufunuo wee imani. ²⁴ Kwe bobo sambo yebe koketa kiongozi wiito adya Kristo obe kobaka, ite bodya toba lekebwe sambo kwe imani. ²⁵ Bobo kwe koba imani yashi kobaka, kohola lukine kosee yee obe mokolola. ²⁶ Kwe koba baanu baase nee baana be Firinyambe kohetela imani kole Kristo Yesu. ²⁷ Baase mobe kobatizwa kole Kristo mwashi kojibweka Kristo. ²⁸ Kuushi Myahudi naane Myunani, kwe koba baanu baase nee amoosa kole Kristo Yesu. ²⁹ Ite baanu nee wee Kristo, bobo nee hebota wee Ibrahimu, kopiana kwe mujibu wee ahadi.