¹ Kwatsi Isaka nase kamdzala futsi nemehlo akhe asalutfuli angasakhoni kubona, wabita Esawu, indvodzana yakhe lendzala, watsi kuye, ''Ndvodzana yami''. Esawu watsi kuye, ''Ngilapha,'' ² Isaka wase utsi, ''Buka lana, sengimdzala. Angilati nelilanga lekufa kwami. ³ Ngako ke tsatsa tikhali takho, nesikhwama nebutjoki bakho, bese uhamba uya ematsafeni uyongitingelela inyamatane. ⁴ Ngentele kudla lokumnandzi , loku lengikutsandzako, bese ukuletsa kimi kute ngidle bese ngiyakubusisa ngingakafi.'' ⁵ Nyalo Ribhekha wakuva loko ngesikhatsi Isaka akhuluma na Esawu indvodzana yakhe. Esawu waya ematsafeni kuyotingela inyamatane wabuya nayo. ⁶ Ribhekha wakhuluma na Jakobe indvodzana yakhe watsi, ''Buka lana, ngive babe wakho akhuluma na Esawu umnakenu. Utse,' ⁷ Ngiletsele inyamatane bese ungentela kudla lokumnandzi, lengingakudla bese ngiyakubusisa ebukhoneni ba Simakadze ngingakafi.' ⁸ Nyalo ke, ndvodzana yami, tfobela livi lami njengoba ngikuphocelela. ⁹ Hamba uye emhlambini, bese ungiletsela emazinyane etimbuti lamabili lakahle lasemancane; ngitobese ngenta kudla lokumnandzi ngawo ngentele babe wakho, njengoba awatsandza. ¹⁰ Utokutsatsa ukumikise ku babe wakho, kute akudle, kute atokubusisa angakafi.'' ¹¹ Jakobe watsi ku Ribhekha make wakhe, ''Buka, Esawu umnaketfu unetinwele wonkhe umtimba, kani mine ngibusheleleti. ¹² Mhlawumbe babe utongitsintsa, bese ngibonakala kuye njengemkhohlisi. Ngitotiletsela mine sicalekiso etikwami hhayi sibusiso.'' ¹³ Makwakhe watsi kuye, ''Ndvodzana yami, akutsi nome ngabe ngusiphi sicalekiso sehlele etikwami. Kuphela wena tfobela livi lami, bese uyahamba, uwaletsa kimi.'' ¹⁴ Ngako Jakobe wahamba wayolandza emazinyane embuti wase uwaletsa ku make wakhe, ngako make wakhe wenta kudla lokumnandzi, njengoba babe wakhe akutsandza. ¹⁵ Ribhekha watsatsa timphahla letikahle ta Esawu, indvodzana yakhe lendzala, letatisendlini yakhe, wase utifaka ku Jakobe, indvodzana yakhe lencane. ¹⁶ Wafaka letikhumba talamazinyane etimbuti etandleni takhe nalapho abusheleleti khona entsanyeni yakhe. ¹⁷ Wabeka lokudla lokumnandzi nalesinkhwa labesilungisile esandleni sendvodzana yakhe Jakobe. ¹⁸ Jakobe waya ku babe wakhe wafike watsi, '' Babe wami.'' Babe wakhe watsi, ''Ngilapha; ungubani wena, ndvodzana yami?'' ¹⁹ Jakobe watsi ku babe wakhe, ''Ngingu Esawu litubulo lakho. Ngente njengobe ushito kimi. Nyalo sukama bese uyadla incenye yalenyamatane yami, kute utongibusisa.'' ²⁰ Isaka watsi endvodzaneni yakhe, ''Kanjani kepha kutsi uyitfole ngekushesha, ndvodzana yami?'' Watsi, ''Ngoba Simakadze Nkulunkulu wakho uyiletse kimi.'' ²¹ Isaka watsi ku Jakobe, ''Wota edvute nami, kute ngitokutsintsa, ndvodzana yami, bese ngiyafundza ngabe uyindvodzana yami sibili Esawu nome cha.'' ²² Jakobe waya ku Isaka babe wakhe, ''wase Isaka uyamtsintsa wase utsi, ''Lelivi la Jakobe, kepha letandla tandla ta Esawu.'' ²³ Isaka akakhonanga kumbona, ngoba tandla takhe tatinetinwele, njengetandla ta bhuti wakhe Esawu, ngako Isaka wamubusisa. ²⁴ Watsi, ''Ngabe ungiyo sibili yini indvodzana yami Esawu?'' Waphendvula, ''Nginguye.'' ²⁵ Isaka watsi, '' Letsa lokudla lakimi, bese ngidla lenyamatane yakho, kute ngitokubusisa.'' Jakobe waletsa lokudla kuye. Isaka wadla, Jakobe wase uletsa liwayini walinatsa. ²⁶ Wase babe wakhe Isaka utsi kuye, ''wota edvute nyalo bese uyangicabuza, ndvodzana yami.'' ²⁷ Jakobe wasondzela edvute wase uyamcabuza, wase uyamnuka anukisa leliphunga letimphahla takhe wase uyambusisa. Watsi, ''Buka, liphunga lendvodzana yami lifana neliphunga lasematsafeni lawo Simakadze lawabusisile. ²⁸ Shengatsi Nkulunkulu angakunika incenye yematolo elizulu, nencenye yekunotsa kwemhlaba, nemabele lamanyenti kanye neliwayini lelisha. ²⁹ Shengatsi bantfu bangakusebenta netive tikhotsame kuwe. Yiba ngumphatsi kubomnakenu, futsi shengatsi nemadvodzana amake wakho akhotsame kuwe. Shengatsi wonkhe localekisa wena acalekiswe; shengatsi wonkhe lobusisa wena abusiswe.'' ³⁰ Kwatsi Isaka nakacedza kubusisa Jakobe, futsi Jakobe aphume kamatima ebukhoneni bababe wakhe Isaka, Esawu umnakabo wabuya ekutingeleni kwakhe. ³¹ Naye wenta kudla lokumnandzi wase ukuletsa ku babe wakhe. Watsi kubabe wakhe, ''Babe, sukuma udla incenye yenyamatane yendvodzana yakho, utobese uyangibusisa.'' ³² Isaka babe wakhe watsi kuye, ''Ungubani wena?'' Watsi, ''Ngiyindvodzana yakho, litubulo lakho, Esawu.'' ³³ Isaka wachachatela kakhulu wase utsi, '' Ngubani lona lotingele lenyamatane wase uyiletsa kimi? Ngiyidlile yonkhe emvakwekuba ufike, futsi sengimbusisile. Ngembala, utobusiseka.'' ³⁴ Kwatsi Esawu nakeva emagama ababe wakhe, wakhala kakhulu ngetinyembeti letigcwele lusizi, wase utsi kubabe wakhe ''Ngibusise, nami futsi, babe wami.'' ³⁵ Isaka watsi, ''Umnakenu ute lana ngenkhohliso wase utsatsa sibusiso sakho.'' ³⁶ Esawu watsi; ''Aketsiwanga kahle yini kutsi ngu Jakobe? Ngobe songidlelele emahlandla lamabili. Watsatsa litubulo lelifa lami, futsi, buka, nyalo sotsetse sibusiso sami.'' Wase utsi, ''Awukasigcini yini sibusiso sakami?'' ³⁷ Isaka waphendvula wase utsi ku Esawu, '''Buka, Sengimente umphatsi wakho, ngibese ngimunika bonkhe bomnakabo njenge tisebenti, ngibese ngimunika emabele neliwayini lelisha. Seyini lenye lengingakwentela yona, ndvodzana yami?'' ³⁸ Esawu watsi kubabe wakhe, ''Sewute ngisho nasinye sibusiso sami, babe wami? Ngibusise, nami futsi, babe wami.'' Esawu wakhala kakhulu. ³⁹ Isaka babe wakhe wamphendvula wase utsi kuye, ''Buka, lendzawo lotawuhlala kuyo iyawuba khashane nengcebo yemhlaba, khashane nematolo ngetulu kwesibhakabhaka. ⁴⁰ Ngenkemba yakho uyawuphila, bese usebenta umnakenu. Kepha nawumvukela, uyawulinyakatisa lijoke lakhe ulikhiphe entsanyeni yakhe.'' ⁴¹ Esawu watondza Jakobe ngenca yalesibusiso lesi babe wakhe labemunikete sona. Esawu watsi enhlitiyweni yakhe, ''Emalanga ekutilela babe asondzele; emvakwaloko ngitombulala umnaketfu Jakobe.'' ⁴² Lamagama aEsawu indvodzana yakhe lendzala atjelwa Ribhekha. Ngako watfumela wase ubita Jakobe indvodzana yakhe lencane wase utsi kuye, ''Buka, umnakenu Esawu utidvudvuta ngekulungisela kukubulala. ⁴³ Nyalo ke, ndvodzana yami, tfobela mine bese uyabaleka uye ku Labani, umnaketfu, eHarani. ⁴⁴ Hlala naye kwesikhashana, ⁴⁵ kute kutfukutsela kwemnakenu kwehle, kute kukwata kwemnakenu kwehle ngawe, futsi aze akhohlwe ngaloku lokwente kuye. Ngitobese ngiyakutfumela bese ngiyakulandza khona. Kepha ngingalahlekelwe lani ngini nobabili ngelilanga linye? ⁴⁶ Ribhekha watsi ku Isaka, ''Ngikhatsatekile ngemphilo ngenca yemadvodzakati aseHethi. Nangabe Jakobe atsatsa munye walamadvodzakati ase Hethi njenge mfati, njengalabafati laba, incenye yalamadvodzakati alelive, yini letobayinhle ngemphilo yami kimi?''