¹ Bha womwito na bha taata wane mutegherere bhuno nikwenda inywe mungwatere amarhobhe. ² Hano rikinda ryose bhogwire Paulo nakughamba ko kehebrania bhaghakiru. Akabhugha, ³ Eni no muyahudi nenyi, nibwiru mo mogya wo Tariso, ase ye Kilikia, amara nighasomera mo mogya uno, uno are kunyeghi nare arabherekeru Gamarieri. Nkeghibhwa bhwahene gho chanchera chanchomu ne emeghironghe bha taata wito. Eni nenyi no obhukandarari kwi Iryobha kyabhuno enyu bhose monyi rero. ⁴ Niabhanyakiri gho nchera ino na kubhaita, nikabhabhoha abhasubhe na abhakari na kubharekera mo orochumbe. ⁵ Kuru omuchama omokoro na abhagharuka bhose mbaghotora kobhugha bhuyo bharoche gho kubha nibho bhahaire anyarobha gho ghiri ya abhahiri bhano bhanyi Tamesiki, ko orughendo rwane kughi iyo yare nibharete Yerusalemu ribhagha riyo nibhabhohire ino ndabhanyaki. ⁶ Ikabha hano niare mo rughendo niakanogha nehike Tamesiki ribhagha ryo omwise ko ghutakani ubwero bhokoro bhukarwa mwisaro bhukabha bhurandemoka. ⁷ Nkaghwa hase na nkogwa riraka rirabhugha, "Sauli, Sauli, ngake okunyaki? ⁸ Nkamugharokeri, niyewe mumokoro wane? Akamborera, Neni Yesu wo Nazareti, uno iye okunyaki. ⁹ Bhano bhare hamwe na neni mbaroche ubwero, amare bho bhatogwire riraka re uri are araghambana na neni. ¹⁰ Nikabhugha, nikare bhwe mumokoro wane? Omokoro akambhorera "Bhoka wemerere usohe Dameski, iyo mbaghokobhorera amang'ana ghose ghano ghakwenderu ukore. ¹¹ Ntyatorire korighi bhwahene gho ghiri yu ubhwero bhuri, niho niaghire Dameski ngwateriru okubhoko na bhari tware nabho. ¹² Iyo ngatemerana no moto arabherekeru Anania, nare agwatire emeghiro na nare Abhayahudi bhose mbare bhamosokire bhano bhare bhamenyire hayo. ¹³ Akacha kweni akaimerera ambere yane akabhugha, omwito Sauli, atore kurora na ribhagha riyo riyo nkarora. ¹⁴ Akabhugha, Iryobha re bha taata wito ndikwahwire iye otore kumenya amenda ghache, komorighi uri wo bhureng'aine na kwoghwa riraka ryo kurwa mo munywa wache. ¹⁵ Gho kubha nokubha omoto uno aroche ku bhato bhose ighoro ye ghano waroche na kwogwa. ¹⁶ Kana ebhere neke okughanya? Nobhoke ubhatisu, weghibhu amabhe ghacho otore kuritara erina ryache? ¹⁷ Hano agharokire Yerusalemu niare ndasasama mwisengerero nikarighi amaroto. ¹⁸ Nikarighi aramborera, "Nurwe Yerusalemu bwango gho kubha bhatagwisereri ghano okubhabhorera ku mang'ana ghane. ¹⁹ Nkabhugha Omokoro, abhene mbeche kyabhuno niabhabhohire mo rochumbe kubhatema bhari bhiseriri mu masengerero ghose. ²⁰ Ku masahe gha Stefano niho niare hano ghaitekire, niho niare niemerire haghuhe nirachonga changibho che bhari bhamwitire. ²¹ Amare akamborera, "Noghi gho kubha eni nekoghotoma oghi kure mu bhato bha matongo." ²² Abhato bhaghaisereri aghabhere ang'ana ino. Amare abhande bhaghaishorori na kughamba ko riraka ikoro bharabhugha "Mo morusi omoto uno mose ino" gho kubha tanyi bhwahene aikara mose ino. ²³ Bhakabha bharaghamba ko riraka ikoro ino bhararekera changibho chabho na kurekera orotu ighoro. ²⁴ Omosirikare omokoro akahama Paulo bhamurete morochumbe, akahama gwiki bhamobhori ino bharamutema chasanyi, hayo umwene atore kumenya ngwake bhare bharareghesa hang'u ighoro yache. ²⁵ Hano bhare bhamubhohire chasiri, Paulo akamobhori omosirikare uno are emerire haghuhe nawe "Kana mburengaine ke kwinywe komutema omoto uno anyi Mrumi na hayo mokere komotenera ekina? ²⁶ Omosirikare uyo acha kwogwa amang'ana ghayo akaghi ko omokoro wa abhasirikare akabhugha neke kino ukwenda ukore? Gho kubha omoto uno no Mrumi. ²⁷ Niho omosirikare omokoro akacha akamobhorera, kubha mborere iye no moto wo Rumi onyi? Paulo akabhugha "Eeee." ²⁸ Niho omosirikare omokoro akamugharokeri kubha eni niabhwine kubha omoto wo Rumi gho koreha chambiri chiaru chwee. Amare Paulo akamobhorera, eni no Mrumi nenyi gho kwibhoru. ²⁹ Mbe, bhano bhare bharenda kughi komobhori bhakarwa hayo bhakamotigha ribhagha riyo riyo. Omosirikare wose aghatina hano amenyire kubha Paulo no Mrumi na ngwake abhohuru. ³⁰ Atabhoru yache omosirikare omokoro akenda kumenya obhuhene ighoro yo obhuchongeri bwa Abhayahudi ko Paulo. Hayo akamutachora kurwa mo kibhoho akahama abhakoro bha abhachama na abhateni bhe ebhina bhose bhatemerane. Akamureta Paulo na komotora ghateghate yabho.