¹ Hano twatanire nabho, tukabha no orughendo ro munyancha tukaghi kimwe kimwe mo moghya wo kosi, na atabhori yamutukahika mo mogya wo Rodo nawe kurwa hayo tukahika mo mogya wo Patara. ² Hano twabhwine iryato riratenya kughi Foinike, tughatira tukaghi naryo. ³ Hano twahikire mwi ghungare kibhuro, tukayetigha ribhara ryo okumosi, tukaghi no orughendo kughi Sirya, tughatora hayo ananga mo mogya ye Tiro, gho kubha hayo niho bhare bharaiki omorigho wabho. ⁴ Twacha kubhabhona abhaana bhegha tughaikara iyo chasiko mohungate. Abhana bhegha bhayo bhakabhorera bhahuro kohetera ku koro kubha atasaki kughi Yerusalemu. ⁵ Twacha kumara chasiko chiyo, itwe tukaghi, bhose na abhakari bhabho na abhana bhabho, bhaghatuherekerera monchera tukahoroka kurwa mo mogya. Niho tukahighama mo ngeghu ya anyancha tughasasama, twamara tughatana gho kuraghana. ⁶ Itwe tughatira iryato nabho bhakagharoka mu chako cha abho. ⁷ Hano twamarire kurwa Tiro tukahika Toremai. Hayo tughakerari na abhahiri tughaikaraho orosiko rumwe. ⁸ Atabhori yache tukabhoka kughi Kaisaria itwe tughasoha mo nyumba ye Filipo, uno are omuraghani wa ang'ana anchomu, uno are umwe wo bhari mohungate, tughaikara haghero hamwe nawe. ⁹ Omoto uyo nare na abhaki bhane bhano bhare bhakere kumenya abhasubhe, nabho mbaare bhararora amang'ana gha ambere. ¹⁰ Twacha gwikara iyo ghu chasiko nyarebhe, akacha omuroti umwe kurwa bhuyahudi arabherekerwa Agabo. ¹¹ Akacha gwitwe na kwimoki orubheso ro Paulo, ko rubheso ruyo akibhoha umwene amaghoro na amabhoko ghache, na akabhugha, Akoro Antobhihu ebhugha hang'u Abhayahudi bha Yerusalemu mbakomubha umwene orubheso runo nabho mbakomuhana mu mabhoko gha abhato bhamatongo. ¹² Hano twogwire amang'ana ghayo itwe tonyi na abhato bhano bhare bharaikara hayo tukamureki kororo Paulo atighe kughi Yerusalemu. ¹³ Niho Paulo akagharokeri, neke mumoghukora mu mokorera ino muranyita mukoro? Gho kubha nimarire kumara tanyi kubhohu amare ghukwera iyo Yerusalemu gho ghiri ye erina ryo Omokoro Yesu. ¹⁴ Ghokubha Paulo tendire bhato komugharora tukamotigha na kubhugha, mbe amenda gha Omokoro nigho ghakoribhu. ¹⁵ Twacha gwikara hayo ko chasiko kyarebhe, tukaimoki emerigho ghito tughatanora kughi Yerusalemu. ¹⁶ Abhana abheegha abhande kurwa Kaisaria bhose bhakaghi na nitwe. Bhakamureta omoto umwe uno abherekiru Munasoni omoto wo Kipro, kare nare umwana mwegha uno twikaire nawe. ¹⁷ Twacha kohika Yerusalemu abhahiri bhaghatosong'ana ko ghuchomeru. ¹⁸ Atabhori yamu Paulo akaghi hamwe na nitwe ko Yakobo, na abhagharuka bhose bhano bhareho. ¹⁹ Hano twamarire ghukerani akabhaha amang'ana ghose ghano ghare ghakoriru ghano Iryobha ryahokiri ku bhato bha matongo. ²⁰ Hano bhoghire ghayo, bhakarekumi Iryobha na bhakamobhorera, "Nokorighi abhahiri bhito kubha mbanyi ebhekwe bhirenge bhani bhaiseriri ghate ya Abhayahudi. Bhose mbakwenda kughwata emeghiro? ²¹ Mbabhwine amang'ana ghacho kubha nakubheghi Abhayahudi bhano bhanyi ghate ya matongo aghande amang'ana gha Musa bhataghi nagho gwiki nakubhabhorera kubha bhatasara abhana bhabho, na bhatagwata chasughara che kare. ²² Hayo ebhere tukore bwe? Na weche mbakumenya kubha iye wichire. ²³ Ebhere nukore kyabhuno tongokobhorera, ntonyi na bhato bhane bhano bhamarire kwiraheri. ²⁴ Obhimoki abhato bhano otore kwiyeri monyi nabho, gwiki otore kohera amareho ghano ghakwenderu bhabhamwe emitwe gyabho. Ko hayo abhato bhose mu bhakumenya kubha amang'ana ghano bhabhabhorire ighoro yacho ngo obhurongo. Na kubha iye nokughwata emeghiro. ²⁵ Amare ku mang'ana gha abhato bha matongo aghande bhano bhamarire kubha abha Israeli ntubhandekire na kubhaha amaraghano kubha yikwenderu bhatane ne ebhighero bhino bherusibhu ko misambwa na masahe na bhino bhinyeturu, gwiki bhikare kure no obhusongoreri. ²⁶ Niho Paulo akaimoki abhasubhe na orosiko ro kabhere akaiyeri umwene bhanyi nabho akasoha mwisengerero akaghambera chasiko cho kwiyeri, na korusi ebhihanwa gho ghiri ye moto wose. ²⁷ Hano chasiko chiyo mohungate chare haghuhe ghosira Abhayahudi nyarebhe kurwa Asia bhakamurora Paulo mwisengerero anyi na rikinda rya abhato bhaghakarara bhakamugwata. ²⁸ Bhakabha bharareghesa, "Abhato bha Israeli mmotusakeri omoto uno nakweghi abhato bha chase chiose amang'ana ghano ghatanyi bhwahene ne emighiro ghe hano. Gwiki naretire Abhayunani mwisengero na ghotora obhoghonchu ahase hano hanyi ahatobhiwu. ²⁹ Gho kubha ekimbere mbare bhamoroche bhanyi na Turofimo wo Ebhefeso mbhare hamwe nawe mo mogya, nabho bhaghituri kubha hamwe Paulo namuretire mwisengerero. ³⁰ Abhato bha mo mogya wose bhakareri, nabho bhose bhakaryara komughuata Paulo, bhakamohoroki kurwa mwisengero nabho bhakaighara ebheseku. ³¹ Hano bhare bharenda komwita amang'ana ghakahika ko omokoro wa abhasirikare kubha Yerusalemu obhobhe mbonyiho. ³² Hayo hayo akabhaimoki abhasirikare na abhakora bhabho bhakaryara kughi mu bhato bhayo. Hano abhato bhayo bharoche omokoro wa abhasirikare bhaghatigha komutema Paulo. ³³ Niho omokoro wa abhasirikare aisukire haghuhe ko Paulo akamuguata nawe akahama kubha bhamubhohe eminyororo ebhere. Akamobhori kubha niwe wewe na neke akorire. ³⁴ Abhato abhande mu bhayo hare hayo mbare bharakurakura bhano bhabhugha hang'u na abhande hang'u. Hayo omokoro wa abhasirikare tatorire kubhakachora ng'ana yose gho kubha ye rireghe akahama kubha Paulo ahiru mo orochumbe. ³⁵ Hano ahikire ghotira mu ngachi omosirikare akamusara gho ghiri ye eghentonye kya abhato. ³⁶ Gho kubha rikinda rya abhato mbare bharabharwa anyuma ino bharareghesu kubha "Mu momorusi ho uno." ³⁷ Hano Paulo are arahiru mo oro chumbe akabhorera omokoro wa abhasirikare nekobhorere ang'ana?Omokoro wa abhasirikare kabhugha kana nokughamba Ekeyunani? ³⁸ Kana iye tonyi o Momisiri uri ekimbere akangatire obhutasha nawe akaimoki amatama ebhekwe bhine akaghahira mwiteregho? ³⁹ Paulo akabhugha, "Eni no omuyahudi nenyi kurwa mo mogya wo Tariso ye kirikiya. Eni nihaikara mo mogya uno umanyakaine neghusabha onyisereri nighambane na abhato bhano. ⁴⁰ Hano omokoro wa abhasirikare omwiseriri Paulo akaimerera mungachi akarusi ekeroghoro kubhato no okubhoko kwache. Hano abhato bhakirire chwee akaghambana nabho ko Kihebrania, akabhugha.