¹ Orisiku okwamba rwa ewiiki nyenkyo juri abhakari bhayo bhakagya kumbihira bhagegeri obhurange bhunu bhaaringa bhaseemerye. ² Hanu bhaahika, bhakanyoora erigina rinu ryaaringa rikundikirye embihira rihiringitiibwe okurwa kumbihira. ³ Bhakasoha munsi, nawe bhataagurora omubhiri gwa omukuru Yesu. ⁴ Hanu bhaaringa bhakyaruguura eguru ya ering'ana riyo, rumwi ego bhamaraika bhabhiri, bhanu bhaaringa bheebhoheri egingibho jinu girang'esang'esa ndabhu pee, bhakeemirira hang'i nabho. ⁵ Kimwi abhakari bhayo bhakagwatwa na enkubhi, bhakahiin'ya obhusu bhwobho mpaka hansi, Nho, abhantu bhayo bhakabhakeerya ega, kwaki muratuna omuhoru gati ya abhaku? ⁶ Ataringi hanu, ahyukiri muhiituke ganu yaabhakeerya bheenyu hanu mwaaringa mukyaro kya Galilaya, ⁷ ega omwana wa Adamu yeenderwanga atuurwe mumabhoko ga abhasarya, abhambwe kumusarabha, yeetwe na orusiku rwa kasatu ahyuke; ⁸ Nho, abhakari bhayo bhakagahiituka amang'ana ga Yesu. ⁹ Kwa ego bhakahinda ourwa mumbihira bhakaarika amang'ana gayo gonsego ku abhatumwa bha Yesu ekumi na umwi, hamwi na abhandi bhonsego. ¹⁰ Bhanu bhaagamba amang'ana gayo ku abhatumwa bha Yesu mubha Mariamu Magdalena, Yohana na Mariamu ng'ina waabho Yakobo, hamwi na abhakari abhandi bhanu bhaaringa hamwi nabho. ¹¹ Nawe abhatumwa bha Yesu hanu bheegwa amang'ana gayo, bhakabhehya abhakari bhayo, bhataabheekirirya. ¹² Nawe Petro akeemuka akakenya okugya kumbihira, hanu yeehinya akasomererya munsi, akarora egingibho egyene ginu Yesu yaaringa abhikiirwe, akahinda enu araruguura eguru ya gayo gatukiri. ¹³ Orusiku ruyo ruyo rwa obhooyo, abheehigira bhabhiri bha Yesu bhaaringa kurugendo rwa okugya mukijiji kya Emmau. Ekyaro kiyo kyaaaringa muna kiromeeta ekumi na imwi okurwa Yerusalemu. ¹⁴ Bhaagendanga bharahairira eguru ya amang'ana ganu gatukiri. ¹⁵ Hanu bhaaringa bhakyahaira na okubhuuran'ya, Yesu omwene akabhajira akagenda hamwi nabho. ¹⁶ Bhakamurora kwa ameeso gaabho, nawe Waryubha akakora bhatige okumumanya. ¹⁷ Akabhabhuurya ega, murahairira ki enu muragenda kunjira? Bhakeemirira bhukiri, obhusu bwabho bhukoorokya okusurumbara. ¹⁸ Oumwi waabho, eriina ryaye Cleopa, akakyukya ega, uuwe omwene nuuwe omugeni Yersalemu hanu, unu atamanyiri ganu gatukiri eginsiku ginu? ¹⁹ Wonse akabhabhuurya ega, mumang'ana ki gayo? bhakakyukya ega, bheetu turahairira amang'ana ganu gaakorera eguru ya Yesu wa Nazareti. Abhantu bhonsego, kora Waryubha, bhaarora ega, weeki mumurooti wa obhuturo, kwa okubwa amang'ana gaaye na obhwihigirya bhwaye bhwaaringa na eginguru bhukong'u. ²⁰ Abhakuru bha abhasyengeri na abhantungi bheetu, bhakeekirirya ajibhibhwe okukwa, akabhambwa kumusarabha. ²¹ Nawe bheetu, tweesiganga ega weeki ng'o akatuurirye Israeli na okurwa amang'ana gayo gakoreke, reero ndusiku rwa kasatu. ²² Kweki abhakari bha muganda gwetu, bhanu bhagiri kumbhihira nyenkyo juri, bhatutakirye kwa okutukeerya ega, ²³ bhatanyooreri omubhiri gwaye mumbhihira na ega, bharwirirwe na bhamaraika. Bhamaraika bhayo, bhabhakeererye ega, Yesu mumuhoru. ²⁴ Hanu bhamariri okutukeeerya ega, bharikyetu bhagiri kumbhihira, bhanyooreri gonsego kya ego abhakari bhayo bhutukeererye. Nawe Yesu omwene bhatamuruuji. ²⁵ Yesu akabhakeerya ega, Bheenyu abhakangi; kwaki muringi abhakongu okwikirirya amang'ana ganu gaagambwa na abharooti? ²⁶ Kasi eteenderwanga Kristu ahitire enyanko iyo, na asohe ahasi hanu aritagonibhwa? ²⁷ Nho, Yesu akabhatubhurira amang'ana gonsego ganu gaang'orwa eguru yaaye, okwambira amang'ore ga Musa, na amang'ore ga abharooti bhonsego. ²⁸ Bhaaringa hang'i okuhika mukijiji kinu bhaagyanga mo Yesu akeekorya, muna arahitiranya. ²⁹ Nawe bhakamwisa saama bhukong'u bhakamukeerya ega, wikare hamwi na bheetu hanu; kwa okubha ego, mumugorobha n ekisunte kireenda okusoha. Nho Yesu akasoha munyumba okubha nabho hamwi. ³⁰ Na hanu bheekara hamwi kumeja okurya ebhyakurya, Yesu akagega omukaate, akakumya Waryubha, akagusunura, akabhaana. ³¹ Rumwi ego ameeso gaabho gakarimburirwa na bhakamumanya ego, unu Yesu. Hayo akabhabhura ko. ³² Mbe, bhakabhuuran'ya ega, Hanu yaahaira na bweetu kunjira, enu araturagirirya amang'ore amarabhu ga Waryubha emitima gyetu gyaajomerwa bhukong'u tiego? ³³ Eribhaga riyo riyo bhakeemuka, bhakeemuka, bhakahunjuka Yerusalemu. Bhakanyoora abheehigira ekumi na umwi na abhandi bheekumeny'e hamwi, ³⁴ bhantu bhaaringa bheekumenye bhakabhakeerya ega mubhuheene, omukuru wetu, ahyukiri; amurwiriri Simon; ³⁵ Nho, abheehigira abhabhiri bhayo, bhakakeerya abharikyabho ganu gaabharwira kunjira, na kya ego bhaamumanya Yesu hanu yaasunura omukaate. ³⁶ Hanu bhaaringa bhakyahahirira amang'ana gayo, rumwi ego Yesu omwene akeemirira gati yaabho, akabhakeerya ega, omurembe gubhe kubheenyu; ³⁷ Bhakeetakya na bhakoobhoha bhukong'u, kwa okubha, bhaamanyanga ega bharuuji ekihwi. ³⁸ Nawe Yesu akabhabhuurya ega Ndegwa, muuna enkubhi munkoro gyenyu? ³⁹ Mumaahe amabhoko gaani na amaguru gaani, naho mumanye ega noni omwene; Mumbabhaate murore kwa okubha ekihwi kitana eminoku na amaguha kya ego murandora oni niinabhyo. ⁴⁰ Hanu Yesu yaamara okubhakeerya gayo, akabhoorokya amabhoko na amaguru gaaye. ⁴¹ Mbe abheehigira bhaaye bhateekirirya obhuheene bhuyo, kwa okubha bhaajomerwa bhukong'u na bhaaringa bhararuguura. Nho Yesu akabhabhuurya ega. Muuna ebhyakurya bhyobhyonse hanu? ⁴² Bhakamuhaana orubhaara rwa enswi inu ekarirwe. ⁴³ Akagega akarya embere yaabho. ⁴⁴ Hanu yaamara akabhakeerya ega. Ganu ngo nabhakeeryanga hanu naaringa hamwi na bheenyu naagamba ega gonsego ganu gaaang'orwa eguru yaani gareenderwa gakoreke ganu yaang'orwa, eguru yaani. ⁴⁵ Nho akabhasikurira abhung'eni bhwabho, naho bhamanye amang'ore amarabhu ga Waryubha. ⁴⁶ Kweki, akabhakeerya yaang'orwa ega Kristu ariitwa, na orusiku rwa kasatu arihyuka okurwa mubhaku. ⁴⁷ Na abhantu bha ebhyaro bhyonsego okwambira Yerusalemu bharirarikirwa kwa eriina ryaye ega nyoore bharimwi hunjurira Waryubha, bharyabhirwa obhusarya bhwabho. ⁴⁸ Na bheenyu mbo abheemiriri bha amang'ana gayo. ⁴⁹ Bhoono ndibhatumira omutima omurabhu gwa Waryubha kya ego bhurya Tata yaaringa abharagiri. Nawe mwikare mumugi gwa Yerusalemu, mpaka muhaanwe obhuturo okurwa murwire. ⁵⁰ Hanu yaamara, akabhahira hang'i na ekijiji kya Bethania. Hanu bhaahika akeenura amabhoko gaaye eguru, akabhanonka. ⁵¹ Na hanu yaaringa akyabhanonka, rumwi ego, akabhatiga, akeemukibhwa okugya murwire. ⁵² Bhakamusyengera, bhakamara bhakahunjuka, Yerusalemu, bhaajomerwe bhukong'u. ⁵³ Mbe bhakabha bhareekara murisyengerero erikuru rya Waryubha, enu bharamukumya.