¹ Abhakuru bhaye bhonsego bhakeemirira, bhakamuhira Yesu ku Pilato. ² Bhakaamba okumujongera kwa obhuhaari, Bharagamba ega omutu unu tumunyooreri arahabhya abhantu bha ekyaro kyetu, kwa okubha arabhakan'ya bhatatobha erigooti ku omutungi omukuru wetu; na aragamba ega weeki ng'o omukama Kristu; ³ Nho Pilato akamubhuurya ega, uuwe nuuwe omukama wa Abhayahudi? Yesu wonse akagamba ega, Ndegwa uuwe omwene otubhwiri." ⁴ Pilato akabhakeerya abhakuru bha bhasyengeri, hamwi na omuganda gha abhantu ega, omuntu unu arirora obhusarya bhuyo bhonsego." ⁵ Nawe abhantu bhayo, bhakakomererya ega. Arasigirirya abhantu, kwa obhwihigirya bhwaye ku kyaro kyonsego kya abhayahudi yaambira Galilaya na bhoono yahikiri Yudea." ⁶ Pilato hanu yeegwa gayo, akabhabhuurya nyoore Yesu mumugalilaya. ⁷ Hanu yaamanya ega, mumugalilaya wa obhutungi bhwa Herode, akamuhira ku weeki, kwa okubha eginsiku giyo, Herode yaaringa Yerusalemu hayo. ⁸ Herode hanu yaamurora akajomerwa bhukong'u. Kwa yaaringa yeegwiri amang'ana gaaye. Yeegombanga okumurora kwa eribhaga etambi, naho omwene arore ebhika bhinu arakora. ⁹ Herode akamubhuuririrya amang'ana amaaru, nawe Yesu ataakyukya ering'ana. ¹⁰ Abhakuru bha, abhasyengeri na abheehigirya bha amaragiriryo ga Waryubha bhaaringa ho, bharamujongera kwa abhuhaari bhukong'u. ¹¹ Herode wonse, na abhasirikare bhaye bhakaamba okumujeera, bhakamusekerera, bhakamwibhohya engibho gya ekikama. Nho Herode akamuhindya ku Pilato. ¹² Herode na Pilato bhaaringa abhisigu akwambira hayo, bhakabha abhasaani. ¹³ Pilato akabhakumanya abhakuru bha abhasyengeri na abhatungi bha Abhayahudi, hamwi na abhantu bha mumugi. ¹⁴ Akagamba ega, mundeteeri omuntu unu muragamba ega, yaaringa arahabya abhantu bhoono mwitegerere mwigwe. Neekomerye bwaheene okujongera kwenyu kwonsego, bhutari ho obhusarya bhwobhwonse bhunu naruuji. ¹⁵ Kora Herode wonse ataruuji abhusarya bhwobhwonse bhurya, nkyo kikoreri amuhunjukirye kuoni, mumanye ega, omuntu unu ataakora ering'ana eribhibhi rinu riraakore yeetwe; ¹⁶ Kwa ego ndamutema ebhibhoko ndamara ndamuhatira. ¹⁷ (Kira kunyangi ya epasaka hanu yaahikanga yeenderwanga Pilato okumuhatira omubhohwa oumwi.) ¹⁸ Nawe abhantu bhayo bhonsego bhakajirira kwa hamwi ega muruusye ho omuntu uyo; otusikurire Bharaabha. ¹⁹ Bharaabha uyo yaaringa abhoherwe murigereja. Kwa okubhwa yaaringa akoreri ekisiyomba mumugi na yaaringa yetiri omuntu. ²⁰ Pilato akeenda akuhatira Yesu. Ego akagamba nabho kweki. ²¹ Nawe bheeki bhakagendererya okutema ekituri mubhambe kumusarabha! mubhambe ekumusarabha. ²² Akabhakeerya kweki orwa kasatu ega, Akoreri obhubhibhi ki? Ndegwa ntakurora abhusarya bhuyo bhonsego bhunu bhuraakore yeetwe kwa ego ndamutema ebhibhoko ndamara ndamuhatira. ²³ Nawe abhantu bhayo bhakagendererya okutema ekituri bhukong'u ega Yesu abhambwe kumusarabha kubhumaririryo ekituri kyabho kikamuhiga. ²⁴ Mbe, Pilato akabhahatirirya Abhayahdi bhayo okukora kya ego bhareenda. ²⁵ Akabhasikurira Bharaabha okurwa murigereja yaaringa abhoherwe kwa okukora ekisiyomba na obwiti akabhahaana Yesu naho bhamukore kya ego bhareenda. ²⁶ Hanu abhasirikare bhaaringa bharamuhira Yesu okumubhamba kusarabha bhakasikana na omuntu umwi eriina ryaye Simioni wa mumugi gwa kurene eribhaga riyo, yaasahanga mumugi gwa Yerusalemu. Bhakamugwata, bhakamwitiikya omusarabha gunu Yesu yaaringa yetikiri, akabha aragenda enyuma ya Yesu. ²⁷ Abhantu emiganda na emiganda bhakamuseeta Yesu. Gati yaabho bhaaringa mo abhakari bhanu bhaamukuriranga na okuruguura. ²⁸ Yesu akabheekyukirya akabhakeerya ega, Bheenyu abhakari bha Yerusalemu mutige okunkurira oni! mwikurire bheenyu abheene, na mukurire abhaana bheenyu? ²⁹ Mumanye bhujomu ega egisiku giriija ginu abhantu bharigamba ega nyakara abhagumba bhanu bhatakeebhwiri na egi mbeere ghabho gitakanenerye abhana. ³⁰ Eribhaga riyo, abhantu bharikeeryo eginkuku ega. Mutugwire na ebhwisha mutukundikirirye.' ³¹ Kwa ensonga ya ega nyoore bharakora ego ku oni, omuti omubhisi, eribha enyako bhukong'u ku bheenyu omuti omomu. ³² Abhasirikare bhakamuhira Yesu hamwi na bha abhusarya, bhabhiri naho bheetwe hamwi. ³³ Hanu bhaahika ahasi hanu harabhirikirwa ekihuuri kya omutwe nho bhakamubhamba kumusarabha bhakamubhamba na bha obhusarya bhahiri bhayo oumwi orubhaara rwaye rwa obhuryo na oundi orubhaara rwaye rwa obhumosi. ³⁴ Yesu akagamba ega, Tata; obhabhire kwa okubwa bhatamamanyiri kinu bharakora. Abhasirikare bhayo hanu bhaamara, bhakagabhana egingibho ghaye kwa okugitemera ekuura. ³⁵ Abhantu bhaaringa bhweemiriri hayo bharamaahirira ganu garakoreka. Abhakuru bha Abhayahudi, bhakamujeera bhakagamba ega Ndegwa yaatuuryanga abhandi; Mbe bhoono yeetuurye omwene, nyoore ng'o Kristu omwahurwa wa Waryubha" ³⁶ Abhasirikare bhonse bhakamujeera, bhakamusutarira, bhakamuhaana omusuka gwa amarwa. ³⁷ Bhakamukeerya ega, Nyoore heene uuwe mumukama wa abhayahudi ituurya uuwe omwene; ³⁸ Eguru kumusarabha gunu yaaringa abhambirwe ko, bhaatuura ko amang'ana ganu, unu ng'o omukama wa Abhayahudi. ³⁹ Oumwi gati ya bha abhusarya abhabhiri bhanu bhaaringa bhabhambirwe kumusarabha hamwi akamutuka Yesu ega, mubhuheene ega uuwe nuuwe Kristu? Mbe ituurya uuwe omwene; otutuurye na bheetu bhonse. ⁴⁰ Nawe owa obhusarya oundi akamukemera omurikyaye ega uuwe otakoobhoha Waryubha? Uuwe wonse onyooreri obhujibu bhuyo bhuyo? ⁴¹ Bheetu tujibhiibwe kwa obhuheene ganu ngo endini ya ganu twaakora. Nawe omuntu unu, ataakora obhusarya bhuyo bhwonsego. ⁴² Hanu yaamara akukemera omurikyaye akagamba ega Yesu unhiituke oni hanu wakasohe mu bhukama bhwaho. ⁴³ Yesu akakyukya ega Ndakukeerya, obhuheene ega reero wakabhe hamwi na oni murwire. ⁴⁴ Hanu yaahika ensa, esansabha omubhasu, eryubha rikasima ekisunte kikakurya mukyaro kyonsego mpaka hanu yaahika ensa kenda. ⁴⁵ Eshuuka inu yaaringa eturungajiibhwe munyumba enkuku ya murisyengerero rya Waryubha ekatamuka amabhaara gabhiri. ⁴⁶ Yesu akakura kwa eriisi enene ega, Tata omutima gwani ndagutuura mumabhoko gaaho. Hanu yaamara okugamba gayo gukawa mo. ⁴⁷ Omukuru wa abhasirikare hanu yaarora ganu gakorekeri, akamukumya Waryubha aragamba ega, mubhuheene ega omuntu unu yaaringa wa heene. ⁴⁸ Abhantu bhonsego, bhanu bhaaringa bheekumenye okumaaha amang'ana gayo hanu bhaarora ganu gakorekeri, bhakahunjuka iika owabho, bhareetematema kubhikubha bhyabho kwa okusurumbara. ⁴⁹ Nawe bhanu bhaaringa bhamumanyiri bhakeemirira hare bhakamaahirira ganu garakoreka, gati yaabho, bhaaringa ho abhakari bhanu bhaamuseetanga okurwa mu kyaro kya Galilaya. ⁵⁰ Yaarinha ho omuntu umwi, eriina ryaye Yusufu, wa mumugi gwa Arimataya, gunu gwaaringa mukyaro kya Yudea. ⁵¹ Yaaringa omuntu wa heene embere ya Waryubha yaaganyiriranga obhukama bhwa Waryubha bhuuje. ⁵² Mbe akagya ku Pilato akasabha omubhiri gwa Yesu. ⁵³ Pilato hanu yeekirirya, Yusufu akagwikya okurwa kumusarabha akagukundikirya ensanda, akagutuura mumbihira inu yaaringa ebhajirwe kwitare, inu yaaringa ekyari okubhiikwa mo omuku oundi. ⁵⁴ Orusiku ruyo rwaaringa, orwa kaatanu, na ndwo rwaariga orusiku rwa okuseenya kwa esabhato, orusiku rwa esabhato rwa esabhato rwaaringa rwambiri. ⁵⁵ Mbe abhakari bhanu bhaaja hamwi na Yesu okurwa Galilaya, bhakamuseeta Yusufu mumbihira, bhakamaaha kya ego omubhiri gwa Yesu guteerwe mo. ⁵⁶ Nho bhakahunjuka iika, bhakaseemya amaguta na abhurange bhwa okuhaka omubhiri gwa Yesu bhakamuunya orisiku rwa esabhato, kya ego yaaringa eragiriribhwe na amaragiriryo ga Waryubha.