¹ Yesu hanu yaaringa akyari mumrisyengerero erikuku rya Waryubha, akarora abhaami bharatuura emituho gyabho mwisandiko rya egimbirya. ² Akarora na omusino umwi omutaka, oratuura mo egimbirya ebhiri egyenego. ³ Mbe, Yesu akagamba ega, "Ndabhakeerya obhuheene gya omusino omutaka unu, ng'o aturiri mwisandiko, egimbirya gya obhwera okukira abhandi bhayo bhonsego. ⁴ Ndagamba ega, kwa okubha abhandi bhayo bhonsego, bharusirye emituho gya ebhintu bhinu bhiratama, okurwa kubhintu bhinu bhareenda. Nawe omusino omutaka unu, arusirye ebhintu bhyaye bhyonsego!" ⁵ Abheehigira abhandi bha Yesu, bhaaringa bharahairira erisyengerero erikururya Waryubha, kya ego ryaaringa rikonerwe kwa amagina amajomu, hamwi na emituho ginu abhantu bhaarusiryanga Waryubha. Kimwi, Yesu akagamba ega, ⁶ "Eribhaga ririja, rinu amang'ana gonsego ganu murarora bhoono ega, garihanyurirwa hansi, kora erigina rimwi ritaritama eguru ya erindi!" ⁷ Mbe, abheehigira bhayo, bhakamubhurya ega, "Omwihigirya amang'ana gayo garikoreka ruha? Na nkimanyi riryo ki, kinu kiryo rokya ega, garingi hang'i okukoreka?" ⁸ Yesu akabhakyukya ega, "Mwiyangarire, mutariya okungienereribhwa. Abhantu abhaaru bhariija bharagamba ega, bhaana obhutungi bhwani. Kira oumwi arigamba ega, 'Oni noni Kristu!' Kweki, bharigamba ega, 'Obhuteero bhwa ekyaro bhuringi hang'i!' Abhantu bhayo, mutabhasoorana. ⁹ Kweki, hanu muriigwa amang'ana ga eriihe, na eritongiana, mutoobhoha! Ereenderwa gayo gakoreke okwamba, nawe obhuteero bhwa ekyaro, bhukyari." ¹⁰ Yesu akagendererya okubhakerya ega, "Ekyaro ekimwi, kirirwana na ekindi na obhukama obhumwi, bhurirwana na obhukama obhundi. ¹¹ Kira ahasi haribha na ebhirigiti ebhinene, enjara enduru, na amarweri amabhibhi bhukong'u. Na okurwa murwire, kuribhaho ebhimanyiri ryo ebhinene. Abhantu bharirora, amang'ana amarito ganu garibhakanga bhukong'u. ¹² "Nawe eibhaga gayo gonsego gataratuuka, abhantu bharibhahira ku abhakuru bha amasinagogi, naho mubhohwe murigereja enu muranyankibhwa. Na abhandi murihirwa okujibhibhwa ku bhakama na abhanangwa ku orusumo rwani. ¹³ Kwa ego, murinyoora omweya gwa okungambira. ¹⁴ "Kwa ega, mwamure mumitima gyenyu ega, mutige okusemya ganu murigamba, okwibhagirira mumakeusi. ¹⁵ Oni omwene, ndibhahaana egintungwa, na amang'ana ganu murigamba, abhasigu bheenyu bhatariganga kora bhatarigaha kaana. ¹⁶ "Murikorerwa eniku kora abheebhuri bheenyu, abhamura bheenyu, abhahiiri bheenyu na abhasaani bheenyu. Gati yeenyu, abhandi muriitwa. ¹⁷ Abhantu bhonsego, bharibhasoka ku orusumo rwani. ¹⁸ Nawe, amang'ana gayo, gataribhanya haara, kora orutuukya orumwi kumitwe gyenyu rutaribhura. ¹⁹ Obhuhoru bhwenyu bhurituribhwa hanu murikong'ererya." ²⁰ "Nawe, hanu murirora ega, omugi gwa Yerusalemu gwinarirwe na abhasiri kare, mbe mumanye ega, eribhagarya okugusarya rihikiri. ²¹ Hayo, bhanu orinyoora bharingi mumugi gwa Yudea, bhakenyere munkuru. Bhanu orinyoora bharingi Yerusalemu muyo, bharwe mo bhwangu. Na bhanu orinyoora bharingi mumigunda, bhatahunjuka mumugi muyo. ²² Kwa okubha, eginsiku giyo, ngyo gya okuriha ekisiyomba, naho amang'ana gonsego ganu gaang'orwa, garahikira obhuteero bhwago. ²³ Kuginsiku giyo, abhakari bha eginda na bhanu orinyoora bharanen'ya, bharinyanka bhukong'u kwa okubha kuribha na enyanko enene bhukong'u mukyaro. kweki, Waryubha arijibhya abhantu bha mukyaro. ²⁴ Abhantu abhandi bhariitwa kwa amapanga. Abhandi bharigwatwa na okuhirwa mubhyoro ebhindi, omugi gwa Yerusalemu guritungwa na abhantu okurwa kubhyoro ebhindi, bhanu bhataringi Abhayahudi mpaka eribhaga ryabho rya okutunga hanu ririhwa. ²⁵ "Kuribha na ebhimanyiriryo kuryubha, omweri, na eginyota. Na mukyaro hanu, eginyanja giribha na amabho oka na enyanko na obhwobha. ²⁶ Mbe, gayo gonsego garituuka mukyaro, abhantu bharyobhoha bhukong'u. Bharigwa erihiku kwa ekisigo kya okukangwa, enu bharaga nyirira amang'ana amabhibhi bhukong'u, ganu garaatuuke mukyaro na ebhintu bhya murwire bhiribha bhirasingisa. ²⁷ "Hayo nho, murimurora omwana wa Adamu, araaja okurwa mumasaaru, aringi na eginguru na obhutungi obhukuru. ²⁸ Mbe, amang'ana gayo, hanu garyamba okukoreka, mwikong'ererye, okuterema kwa okubha eribhagarya okutuuribhwa kwenyu, orinyoora riringi hang'i!" ²⁹ Kweki, Yesu akabhakeerya abheehigira bhaaye ekirengyo ega, "Mumaahe omutini, na emiti egindi gyonsego. ³⁰ Hanu murarora ega, omuti gwambiri okusebhuk, rumwi ego mwamanya ega, eribhaga rya eriranga riringi hang'i. ³¹ "Ego ego, na bheenyu hanu murirora amang'ana ganu garakoreka, mumanye ega, obhukama bhwa Waryubha bhuringi hang'i. ³² Ndabhakerya obhuheene ega, abhantu bha orwibhuro runu, bhatarikwa eribhaga ganu gonsego gakyari okukoreka. ³³ Orwire na ekyaro bhirihwa, nawe amang'ana gani gariguma eginsiku gyonsego! ³⁴ "Mwiyangarire! Emitima gyenyu gitariija okugwatwa na orunamba rwa okukora amang'ana ga mukyaro bhuyagayaga, okurehwa, na obhobha bhwa obhuhoru. Nyoore ti ego, orusiku rwa okuhunjuka omwana wa Adamu ruribhaajira mutamanyiri. ³⁵ Orusiku ruyo, ruribhaajira rumwi ego abhantu bhonsego bhamukyaro. ³⁶ Kwa ego, mubhe mwiseemerye eribhaga ryonsego! Mugendererye okumusabha Warybha, naho abhabheere okwambuka gonsego ganu garituuka, na okwimirira embere ya omwana wa Adamu." ³⁷ Mbe, kuginsiku giyo, Yesu yaaringa areehigirya abhantu murisyengerero erikuru rya Waryubha. Obhutiku, yaagyanga okurora munkuku inu erabhirikirwa emijeituni. ³⁸ Abhantu abhaaru bhaamwenjanga nyenkyo juri, okugya murisyengerero, naho bhamwitegerere.