Tabe Neke Paulus ¹ Neke Paulus, ye jaji rasul sa leka meresia atawa nyelalo meresia, et nyelalo Kristus Yesus ali Allah Ma ye nemuet Da neke ekang ulun mate. ² Ade, ke kawus erai butung erai iman ye be sendro-sendro ali ap dian jemaat jemaat te Galatia. ³ Anugerah ali damai sejahtera dian ko ke Allah Ma taka ali Tuhan Yesus Kristus, ⁴ ye apu ngokoi Unuk-Da dian dosa-dosa taka di nyelamat taka neke zaman ye jahat nehe ihe nget kehendak Allah ali Ma taka. ⁵ Dian Da lah kemuliaan empe seola-ola ye . Amin Je Naan Erai Injil ⁶ Ap manam nget me lekah ye ko ngikah Da, ye nook ko nyelalo anugerah Kristus, ali mulik tong Injil ye bali. ⁷ Ye bene, beloh naan Injil ye bali. Et naan besenu ulun ye apu pekare ko ali kakan ngemutar mulik li Injil Kristus. ⁸ Et, aka empe kain atawa erai ulun malaikat neke surga nengkabar tong ko Injil ye sa sengkune ali se ya apu kain tengkabar tong ko, terkutuklah da! ⁹ Nget ye apu kain ulek semale ye ali nehe ap ulek li, aka naan ulun ye nengkabar tong ko Injil ye belawenan ali ye apu ko terima, dion da na kutuk. ¹⁰ Se nehe ko desung ngeto persetujuan meresia atawa persetujuan Allah? Atawa, se ap kea nginam pesanang meresia? Se kira ye ap kea nginam pesanang meresia, ap sa lah hamba Kristus. Ngalun Paulus Temunan Kerasulan Da ¹¹ Kawan erai butung, ap kakan ko ketoan leka Injil ye apu ap tengkabar sa ye Injil ene meresia. ¹² Ap sa nerima ye neke meresia, atawa ap mempelajari ye neke meresia, et ap nerima ye lalo penyataan neke Kristus Yesus. ¹³ Leka, ko apu keringa leen alan bolum ap ye ola neke agama Yahudi, ap penare jemaat Allah ali pemereket ye tamam ali beusaha dian pehansur ye. ¹⁴ Ap pengeone suang hal agama Yahudi, oro pengeone na taning ali ulun-ulun sepantar te botuk bangsa ap. Ap pengemahing suang ngejalani adat istiadat datu nini ap. ¹⁵ Et, kede Allah, ye apu memisah ap neke suang butung ne ap ali apu hakun noak ap lalo anugerah-Da, berkenan ¹⁶ ngulek Tia-Da suang ap dian ap mahan nengkabar Da te botuk ulun-ulun sa Yahudi, ap sa lekah kaweng nasehat tong erai ulun ade. ¹⁷ Ap ade sa tulak tong jaa Yerusalem di sengkeruku ali dali ye apu jaji rasul semale ap, et ap lekah tulak tong wilayah Arab ali mulik li tong jaa Damaskus. ¹⁸ Talu taun ukah iro, ap tulak tong jaa Yerusalem dian mengketaru ali Kefas ali nono sendro da seola lime belas olo. ¹⁹ Et, ap sa kite erai ade neke rasul-rasul bali, selain Yakobus, erai butung Tuhan. ²⁰ Ap yakin ali ko te one Allah leka se ye ap surat tong ko ehe sa opau. ²¹ Uli kero, ap tulak tong wilayah Siria ali KIlikia. ²² Ap male na kentaru ali aln pribadi ene jemaat-jemaat suang Kristus ye naan te wilayah Yudea. ²³ Dali je ringket keringa, "Da, ye bayuh penare taka, neke nengkabar iman ye bayuh pini kakan na pehansur da. ²⁴ Dali memuliakan Allah leka ap.