¹ Ahi petama minggu iyak petang benah,ahi agik kangap, Maria Magdalena datang kekubuh, ia ngeliat batu udah dikansat kesisi kubuh. ² Iapun mbuang datang ahung Simon Petrus dengan padak muhid lain yang di kegauk Yesus, ia bandai ahung sidak, Sidak udah ngemaik Tuhan keluah dahi kubuh, kami nda ketau kemena sidak ngelegak Ia. ³ Petrus dengan muhid yang lain pun alu keluah, sidak angkat kekubuh. ⁴ Sidak dua mbuang besama dengan padak muhid tapi lebih duluk dahi Petrus datang kekubuh. ⁵ Ia mantau kedalam, ia ngeliat kain dilegak diak, tapi ia napan tamak kedalam. ⁶ Simon pun datang abis ia, alu tamak kekubuh. Ia mantau kain lenen dilegak diak ⁷ dengan baju yang dilegak datas kepala Ia. Kain iyak nda dilegak besama dengan kain lenen, tapi digulung kedihik ditahuh dilain ahung. ⁸ Alu padak muhid yang lain tamak, ia yang duluk datang kekubuh iyakpun tamak ugak, ia mantau dan ia pecayak. ⁹ Kehena sampai ahi iyak sidak napan ketau andai kitab, bahwa Yesus ahus di angkat dahi kematian. ¹⁰ Padak muhidpun alu pulang ke humah sidak. ¹¹ Maria yang bedihi diluah kubuh nangis. Tengah ia nangis ia mantau kalam kubuh. ¹² Ia ngeliat dua malaikat makai jubah putih, tengah duduk, suhang di kepala suhang lagik di kaki ahung mayat Yesus di galai. ¹³ Sidak bandai ahung ia, Enduk, ngapa nuan nangis?" Ia nyaut sidak dua," kehena sidak udah ngemaik mayat Tuhan aku keluah, aku nda ketau dimena sidak ngelegak Ia." ¹⁴ Abis ia ngumung baka iyak, ia malit tubuh ia,alu ngeliat Yesus tengah bedihi dadap ia, tapi ia nda ngelalak bahwa iyak Yesus. ¹⁵ Yesus bandai ahung ia," Ngapa nuan nangis, Nduk? Sepa yang digegak nuan?" Pikih ia iyak penyaga taman, maka ia alu ngumung," Tuan, entik nuan yang ngeluah Ia padah ahung aku, dimena nuan ngelegak Ia, aku jekak ngemai Ia pulang. ¹⁶ Yesus bandai ahung ia," Maria." Ia bebalit alu bandai dengan Ia dengan bahasa Aram,Rabuni, yang heti ia " Guhu." ¹⁷ Yesus bandai ahung ia," Anang nyamang Aku, kehena Aku napan nait ke ahung Bapak, tapi pulang meh dengan ahung bala menyadik Aku, padah dengan sidak, bahwa Aku jekak nait ahung Bapak Aku, Bapak nuan seta Allah Aku dengan Allah nuan. ¹⁸ Maria Magdalena datang madah sidak padak muhid Ia," Aku udah ngeliat Tuhan, Iapun bandai ahung aku. ¹⁹ Pas ahi jekak malam ahi iyak, ahi minggu petama, sementaha pintu humah padak muhid udah ditutup kehena takut dengan uhang Yahudi, Yesus datang dan bedihi ditengah-tengah sidak, alu bandai ahung sidak," Damai untuk kian." ²⁰ Abis Ia bumung baka iyak, Ia madah kesidak tangan Ia dan sisi badan Ia. Seta sidak ngeliat Tuhan, sidakpun hambik. ²¹ Yesus bumung agik ahung sidak," Kiha iya damai beseta kian. Baka Bapak udah ngihin Aku, bvaka iyak ugak meh Aku ngihin kian." ²² Abis Yesus bandai baka iyak, Ia ngesu ahung sidak sambil bumung," Tehimak meh Ruh Kudus. ²³ Sepa mgang yang dusa ia kian ampun, dusa-dusa sidak udah diampun, sepa magang yang dusa-dusa ia kian tahan nda diampun, dusa-dusa sidak tetahan nda diampun. ²⁴ Tomas, salah suhang dahi sidak dua belas, yang ditingkau sidak Didimus, nisik diak waktu Yesus datang. ²⁵ Abis iyak muhid yang lain madah ia,' Kami udah ngeliat Tuhan." Ia pun nyaut sidak," Kecuali aku udah mantau tangan Ia ada tanda paku-paku,alu aku nyucuk jahi aku kalam bekas paku-paku, alu ngelegak tangan aku kalam sisi Ia, aku nda akan pecayak." ²⁶ Setelah lapan ahi, padak muhid Ia bekumpul lagik. Tomas ada diak ugak. Yesus datang sementaha pintu-pintu agik tetutup, Ia bedihi dientaha sidak, alu bandai," Kiha ia damai beseta kian." ²⁷ Alu Ia bandai dengan Tomas," Dampin kituk dengan jahi-jahi nuan, pantau tangan-tangan Aku, dampin kituk meh dengan tangan nuan, legak kesisi tubuh Aku, anang tanpa iman, tapi ahus pecayak. ²⁸ Tomas nyaut Ia," Tuhan aku dan Allah aku," ²⁹ Yesus bandai ahung ia," Kehena nuan udah ngeliat Aku, nuan pecayak. Bebahagia meh uhang-uhang yang napan ngeliat, tapi udah pecayak." ³⁰ Pituk, Yesus udah banyak ngawai tanda-tanda dadap padak muhid Ia, tanda-tanda yang napan ditulis alam kitab ituk, ³¹ tapi hal-hal ituk udah tetulis sepaya kian pecayak bahwa Yesus iyak Kristus, Anak Allah, sepaya waktu kian pecayak, kian bulih pengidup alam nama Ia.