¹ Pilatuspun ngambik Yesus sepaya dicambuk. ² Padak tentaha nganyam kawat beduhik pakai ngawai mahkuta. Sidak ngelegak iya dikepala Yesus, alu mehik Ia jubah ungu. ³ Sidak alu datang ahung Ia sambil bandai," Salam, Haja uhang Yahudi!" sambil sidak ngucuh Ia. ⁴ Pilatus keluah lagik alu bandai ahung uhang-uhang iyak," Pantau, aku ngemaik uhang ahung kian, sepaya kian ketau, aku nisik nemu penyalah Ia. ⁵ Kehena iyak meh Yesus keluah. Ia agik makai mahkuta dahi duhik-duhik,seta bebaju ungu. Alu Pilatus madah sidak," Pantau, ituk meh mensia iyak!. ⁶ Seta padak imam kepala dengan padak pemimpin Yahudi ngeliat Yesus, sidakpun bandai kayah-kayah," Salib magang Ia, salib magang Ia! Pilatus bandai ahung sidak," Baik magang Ia untuk kian, alu kian salib, kehena aku nisik nemu sutik penyalahpun ahung Ia." ⁷ Uhang Yahudi nyaut ia," Kami bisik ukum, kehena ukum iyak, Ia ahus mati, kehena Ia nyadi dihik Ia kedihik Anak Allah. ⁸ Seta Pilatus ninga sidak ngeluah umung baka iyak, ⁹ ia alu jadi takut. iapun tamak lagik ke kantuh gubernur alu bandai ahung Yesus," Dahi mena Nuan ituk datang?" tapi Yesus nda nyaut ia. ¹⁰ Pilatus bandai ahung Yesus," Apa Nuan nemauk bandai dengan aku? Apa Nuan nda ketau bahwa aku bisik kuasa untuk ngelepas Nuan atau menyalib Nuan?" ¹¹ Yesus nyaut ia,"Nuan seahus iya nisik kuasa ngelawan Aku, kecuali hal iyak udah di behik ke nuan dahi atas. Jadi sepa yang udah nyehah Aku ahung nuan, dusa ia lebih besah." ¹² Ninga saut Ia baka iyak, Pilatus jekak encuba ngelepas Ia, Tapi padak Yahudi betumbau kuat-kuat," Entik nuan ngebibas Ia, nuan ukan kaban Kaisah; Sepa yang ngawai dihik ia haja, ia ngelawan Kaisah. ¹³ Seta Pilatus ninga umung sidak baka iyak, ia ngemaik Yesus keluah, duduk di bangku pengadil yang disebut sidak 'Litostrotos, tapi alam bahasa Ibrani, Gabata. ¹⁴ Datang meh ahi besiap pakai Paskah, kiha-kiha tengah ahi, Pilatus madah denga uhang Yahudi," Pantau, ituk meh Haja kian! ¹⁵ Sidak betumbau kayah-kayah," Jauh kan Ia, Jauh kan Ia, salib magang Ia!" Ahuskah aku nyalib Haja kian? Padak imam kepala nyaut," Kami nisik haja kecuali Kaisah." ¹⁶ Pilatuspun nyehah Yesus ahung sidak sepaya disalib. ¹⁷ Sidak alu ngambik Yesus, Iapun keluah ngemaik salib pakai Ia kedihik ke ahung yang sidak sebut, Ahung Tengkuhak," yang kalau alam bahasa Ibrani" Golgota" ¹⁸ Sidak nyalib Yesus diak, behimbai denga dua uhang. Yesus ditengah sidak dua. ¹⁹ Pilatus nulis sutik tanda alu ngelegak iya ahung salib. Ditulis diak: YESUS NAZARET HAJA UHANG YAHUDI. ²⁰ Banyak uhang Yahudi maca tanda iyak, kehena ahung Yesus disalib dampin kuta. Tanda iyak ditulis alam bahasa Ibrani, Latin alu bahasa Grika. ²¹ Alu padak imam kepala Yahudi bandai ahung Pilatus," Anang nulis Hajas uhang Yahudi, tapi baka yang Ia sebut," Aku meh Haja uhang Yahudi." ²² Pilatus nyaut," Apa yang aku tulis udah tetulis." ²³ Tuntung padak tentaha nyalib Yesus, sidak ngambik baju Ia, dihansik sidak jadi empat bagi, suhang tentaha sutik bagi, piyak ugak dengan jubah Ia, Jubah Ia nisik pakai jait, ditenun dahi atas kebabah. ²⁴ Sidakpun alu bepekat, Jubah ituk nda usah kita hansik, kita cabut undi magang,kita pantau, sepa yang behak ngempu ia. Hal iyak ahus tejadi,kehena kitab firman yang bandai," Sidak magi baju Aku sesama sidak, alu dengan jubah Aku, sidak cabut undi, ahus digenap. Baka iyak meh yang dikeheja padak tentaha. ²⁵ Yang bedihi dampin salib Yesus, Indai Ia, menyadik indai Ia, Maria bini Kleopas, seta Maria Magdalena. ²⁶ Waktu Yesus mantau indai Ia dengan muhid yang dikegauk Ia dampin Ia, Ia bandai dengan Indai Ia," Enduk, ituk meh anak nuan!" ²⁷ Alu Ia bandai dengan muhid yang dikegauk Ia, Pantau, ituk meh indai nuan. Dahi ahi iyak, muhid yang dikegauk Ia, ngemaik indai Ia kehumah ia. ²⁸ Abis iyak Yesus, kehena Ia udah ketau bahwa semua iyak pituk udah tuntung, sepaya kitab-kitab iyak benah, Ia bandai," Aku aus." ²⁹ Sutik alat yang penuh dengan angguh masam,udah disiap diak. sidakpun ngelegak sutik spons yang penuh dengan angguh masam dibatang hisop alu disuap ke mulut Yesus. ³⁰ Setelah Yesus ngambik cukak iyak, Ia bandai," Udah genap." Ia nunduk kepala Ia, nyehah ruh Ia. ³¹ Alu padak uhan Yahudi, kehena ahi penyiap, sepaya mayat-mayat iyak nda agik datas salib selamak Sabat ( kehena Sabat ahi pentin) mintak ahung Pilatus, sepaya kaki-kaki sidak yang dukum iyak dipatah, alu mayat-mayat dituhun. ³² Alu datang meh padak tentaha matah kaki uhang petama dengan uhang yang kedua yang disalib besama dengan Yesus. ³³ Seta sidak datang ahung Yesus, sidak mantau bahwa Yesus udah mati, sidakpun nda matah kaki Ia ³⁴ Tapi bisik suhang tentaha nikam Yesus pakai kujuh, tau-tau kelauh meh dahah becampuh aik. ³⁵ Seuhang yang udah ngeliat iyak besaksi, kesaksi ia iyak benah. Ia ketau bahwa apa yang ia umung benah, baka iyakmeh sepaya kian semua pecayak. ³⁶ Hal ituk udah tejadi sepaya kitab iya dapat digenap," Nisik sutikpun dahi tulang Ia akan dipatah." ³⁷ Sekali lagik kitab firman yang lain bandai," Sidak akan mantau ahung Ia yang sidak tikam." ³⁸ Abis iyak, Yusuf Arimtea, seuhang muhid Yesus yang selalu belabuk kehena takut dengan uhang Yahudi, mintak ijin ahung Pilatus, jekak ngambik mayat Yesus. Pilatus mehik ijin ahung ia. Yusuf pun datang ngambik mayat Yesus. ³⁹ Nikodemuspun datang ugak, ia yang petama kali datang ahung Yesus pada malam ahi. Ia ngemaik mur yang udah dicampuh hempah-hempah yang behat iya kiha-kiha tiga hibu sehatus gham . ⁴⁰ Sidak ngambik mayat Yesus alu mungkus iya makai kain lenen dicampuh hempah-hempah, baka kebiasaan uhang Yahudi entik ngubuh mayat. ⁴¹ Pituk ahung Ia disalib ada taman, alam taman iyak ada kubuh yang agik bahu, alam iyak napan bisik uhang yang dikubuh. ⁴² Kehena ahi iyak ahi pesiapan pakai uhang Yahudi, kehena kubuh iyak dampin, sidakpun ngelegak Yesus ke dalam iya.