¹ Udah yatn, Yesus bakata ka para nak buah-Nya, ''Batu sandungan pasti akan ada, tetapi bahayalah urankg yang nyebabkan'e ² Lobeh baik habuah batu kilangan nak ikat ka lier'e datn inya di lambong ka dalapm laut daripada inya manjadi sandungan untok onak-onak kocek tok. ³ Ati-atibah! Mok miyadekkau babuat dosa taadap ikau, tegur'e inya;mok inya nyosal dosa'e ampun'e inya. ⁴ Bahkan, mok inya badosa taadap ikau habanyak tujoh kali dalapm satu ari, datn babalik ka ikau tujoh kali hambel bakata, 'Aku manyosal,'ampun'e inya.'' ⁵ Kata rasul-rasul yatn ka Tuhan, ''Tambah'e lah iman kamek!'' ⁶ jawab Tuhan ka hidak, '' mok ikau ada iman habosak begek sabek jak, ikau dapat mangatakan ka pucok murbei tok, 'Tacabutlah dari tanah datn tanam'e di laut,'datn pucok yatn akan taat ka ikau.'' ⁷ ''Hopaikah dari antara ikau yang ompok hamba, yang hodak membanjak atau mengembala, akan bakata ka hamba'e yatn katika inya babalik dari uma,''Mari, dudok lah datn makan? ⁸ Ukankah inya malah nak bakata ka hambanya yatn.''Siap'e makanan untok aku datn bapakailah yang patut untok malayanku ha'agik aku makan datn minum. haudah yatn, orok lah ikau taok makan datn minum'? ⁹ Opaikah inya akan batarima kaseh ka hambanya yatn karena mangerjakan yang dihuroh'e? Pian jum watn ikau. ¹⁰ Opai bila ikau udah ngreja hamua yang di huroh ka ikau, haruslah ikau bakata, ''kamek adalah hamba yang ndak baroga. kamek hanya ngareja opai yang wajib kamek kereja'e.'' ¹¹ Dalapm pajalan'Inya manuju Yerusalem, Yesus manyusor hapanjang pabatasan antara Samaria datn Galilea. ¹² Pas tamak ka habuah desa, inya batomu watn hapuloh urankg kusta yang badiri jaoh-jaoh dari'Inya, ¹³ datn hidak baseru watn babungi kojang, ''Yesus, Guru, kosal'e kamek!'' ¹⁴ Katika Yesus maliat hidak, Inya bakata ka hidak,'' pogi am datn liat'e dirikkau ka iman-iman.''Datn, katika hidak dalapm pajalanan, hidak manjadi tahir. ¹⁵ Katika halah hikok dari hidak maliat bahwa dirikinya udah baik, inya babalik datn mamuji Allah watn bunyi kojang, ¹⁶ lalu basujud di adap kaki Yesus datn baterima kaseh ka-Inya. Urankg tok adalah urankg samaria. ¹⁷ Udah yatn, Yesus bakata ka urankg yatn, ''Ukankah ada hapuloh urankg yang udah di tahir'e? Di onikah hambilan urankg yang laing? ¹⁸ Ndak adakah di antara hidak yang babalik untok mamuliakan Allah halaing urankg asing tok? ¹⁹ Lalu, Yesus bakata ka'inya, ''Bangun datn pogilah, iman kau udah nyalamat'e ikau.'' ²⁰ Katika ditanyak babaropai uarankg Farisi tentang tika oni karajaan Allah nak datang, Yesus manjawab hidak watn bakata, ''karajaan Allah nak datang ndak ada tanda-tanda yang dapat taliat, ²¹ ndak akan ada urankg yang bakata, ''Liat, karajaan Allah ada di hitok!' atau 'karajaan Allah ada di hinun!' karena habonar'e karajaan Allah ada di tongah-tongah ikau.'' ²² Udah yatn, Yesus bakata ka onak buah-Inya,''Nak datang saat'e ikau aus ungoh maliat ha'ari dari ari-ari Onak mansia, tatapi ikau ndak dapat maliat'e. ²³ Urankg-urankg nak bakata ka ikau, 'Liat, di hinun!' atau 'Liat, di hitok!' Akan tetapi, ndak am ikau pogi datn ma'gak urankg-urankg yatn.'' ²⁴ ''Sebab upa kilat yang mamancar dari ujong langit yang laing, upayatn jum Onak Mansia pada ari-Inya. ²⁵ Akan tatapi, Onak mansia harus tapajoreh banyak hal talobeh dolok datn ditulak oleh generasi tok. ²⁶ Datn, upa yang udah tajadi pada ari-ari di zaman Nuh, upa yatn jum kalak pada ari-ari Onak mansia, ²⁷ Urankg-urankg makan datn minum, menikah datn dinikah'e hampai pada ari Nuh masok ka dalapm bahtera datn datanglah banjer bosar lalu mabunoh hidak hamua. ²⁸ Hama hal'e yang tajadi pada zaman Lot, saat yatn urankg-urankg makan, minum, mamoli, manjual, mananam, datn mambangun. ²⁹ Namun, pada ari katika Lot manigal'e kota sodom, api datn balerang jatuk dari langit upa ujan datn mabunoh hidak hamua. ³⁰ Mintoklah keadaan'e pada ari katika Onak Mansia dinyata'e. ³¹ Pada ari tok, hopai pun yang hodang barada di atap rumah, datn barang-barang'e ada di dalapm rumah, usahlah inya turun untok ngbek'e; datn hopai pun yang hodang barada di uma, usahlah inya pulang. ³² Ingat'e opai yang tajadi pada istri Lot! ³³ Hopai pun yang bausaha manjaga panyawak'e, akan losi panyawak'e. Datn hopai pun yang losi panyawak'e, akan menyelamatkaninya. ³⁴ Aku bakata ka ikau, pada malam yatn akan ada 2 urnakg yang tidok di 1 tempat tidok. Akan tatapi, haurankg akan di bawa, hodangkan yang laing akan di tingal'e. ³⁵ Dua batinak akan mangaliling topong bahamah. Yang haurankg akan dibawa, hodangkan yang laing akan ditingal'e ³⁶ [Upa yatn jum dua pakerja di uma, yang haurangk akan di bawa, hodangkan yang laing akan di tingal'e.''] ³⁷ Lalu onak buah batanyak ka Yesus,'' Di oni, Tuhan?'' Jawab Yesus ka hidak, ''Di oni ada bangkai, dihiyant burong olang akan bakumpol.''