¹ Ako' koo, aku maratian waktu Anak Domba muko' sege' dari tujuh segel koo, lalu aku nangar seko' dari ampat barang koo bakato suarae angayo guntur, "Je'!" ² Lalu, aku nanang seko' kudo putih lalh io nang duduk ka atase naapi' panoh sege'; ba sabuoh mahkota di mareotn ka io, lalu io maju supayo ngalohotn lalu manang. ³ Lalu, waktu Anak Domba Allah muko' segel nang kaduo, aku nangar barang nang kaduo bakato, "Je'!" ⁴ Lalu majulah seko' kudo lain nang bawarno meroh angayo nyalo api, lalu io nang duduk ka atase di mare' kuaso sa' ngicokngo' kadamaiotn ampat ka dunio jadi manusio soga' babunuh, lalu sege' mando kayo' di mareot ka io. ⁵ Lalu, waktu Anak Domba Allah muko' segel nang ka talu. aku nangar barang nang ka talu koo bakato, "Je'!" Lalu aku nanang seko' kudo itopm lalu io nang duduk ka atase nangkapi' sabuoh timbangan ka kokote. ⁶ Lalu, aku nangar angayo ado suaro ampat ka tangoh-tangoh kaampat barang koo, "Sacopak gandum 1 dinar, lalu 3 copak jelai 1dinar, tapi ame ngarusak minyak ba anggure!" ⁷ Lalu, waktu Anak Domba Allah koo muko' segel nang kaampat aku nangar barang nang kaampat bakato "Je'!" ⁸ Jadi aku nanang seko' kudo bawarno ijo pocet lalu io nang duduk kaatase badamo Maut ba Hades nuno'otn io. Lalu, kuaso dimareotn ka ne'ido' atas 1/4 dunio, sa" munuh make mando, kaparotn, panyakit, ba binatang-binatang liar ka dunio. ⁹ Waktu Anak Domba muko' segel nang kalimo, aku nanang ka baboh altar* jiwo-jiwo ne'ido' nang dah dimunuh karamo firman Allah ba karamo kasaksiotn nang dah ne'ido' patahankan. ¹⁰ Ne'ido' ngampak koat sidi, "Sangape lamo agi' oh, Tuhan nang kudus ba nang banar, Kau nahanan diri' ngakimi' ba malasotn daroh kami ka ne'ido' nang diopm ka dunio?" ¹¹ Lalu, ka masing-masing jiwo koo dimare' sege juboh putih lalu ne'ido' dimataki' bahawo ne'ido' arus istirahat agi', sampe jumbaloh ayukng-ayukng palayan ba kamaru'-kamaru' ne'ido' nang mao' dibunuh angayo ne'ido' jadi ganap. ¹² Lalu, aku nanang waktu Anak Domba Allah koo muko' segel nang ka anam, tajadilah gampo bumi nang koat sidi; mataari jadi itopm angayo saput karong nang dingamuat dari buuk lalu saluruh buotn jadi angayo daroh. ¹³ Lalu, bintokng-bintokng ka angit bajanto'atni' ka dunio nyian angayo puhutn aro' baguguratni' buah-buahe nang masih manto' waktu angin nguncokng koat sidi. ¹⁴ Lalu, tabalohlah angit angayo buku nang singolong, lalu tiap bukit ba pulo bapindoh ampat ka tampate. ¹⁵ Jadi, rajo-rajo ka dunio, ba para pangkayo',ba perwira-perwira, urokng-urokng kayo nang bakuaso, lalh samuo budak, lalu urokng bebas batapuk ka ubokng batu-batu ka bukit. ¹⁶ Ne'ido' bakato ka bukit-bukit ba ka batu-batu karang koo, "roro'lah timpo' kami lalu tapukotn kami dari adapotn Io nang duduk di atas takhta, ba murka Anak Domba! ¹⁷ Sabab, ari basar murka ne'ido' dah sampe lalu sape ge' nang biso batahan?"