¹ Lalu, aku nanangseko' malaekat koat kaine turutn ampat ka Sarugo, bapakean awotn ba daukrajoado ka atas kapalae, lalu muhae angayo mataari, lalu pohoe angayo tihokng api. ² Malaekat koo nangkapi' sege' buku kenek nang tabuko'. Lalu, Io ninyakotn poho kanane ka laut ba poho keba'e ka darat, ³ lalu ngampak koat sidi suarae, angayo singa nang ngaum koo; lalu ako' io ngampak, tujuh gamuruh guntur madangarotn suaro ne'ido'. ⁴ Waktu ka tujuh guntur koo dah ako' ba suaro, aku pasti nulisotn io, tapi aku nangar suaro ampat ka Sarugo bakato, "Segelah dameo nang dah ka tujuh guntur koo ngatootn! Ame di tulisotn!" ⁵ Ako' koo, malaekat nang ku nanang badiri ka laut ba nang ka darat koo ngangkat kokot kanane ka angit, ⁶ lalu basumpoh atas damo-E nang idup salama-lamae, nang ngamuat angit ba sagalo isi'e, lalu dunio ba sagalo isi'e, lalh laut ba sagalo isi'e, pasti ino' di tundo-tundo agi', ⁷ tapi pado maso bunyi malaekat ka tujuh, waktu io mao nyiup sarompete, jadi taganapi'lah rahario Allah, angayo nang Io nyampeotnka para nabi*." ⁸ Ako' koo, suaro nang tai aku nangar ampat ka Sarugo bakato agi' ka aku, ja katae," Ampus lalu icokng golongan buku tabuko' ampat ka mokot malaekat nang badiri ka atas laut ba darat koo." ⁹ Jadi, aku ampus ka malaekat koo lalu minto' io mareotn golongan buku kenek koo ka aku. Lalu, malaekat koo bakato ka aku, "Icoknglah buku nyian lalh tajarlah, koo pasti ngamuat parutngu pahit, tapi ka moot ngu, koo pasti taraso manse' angayo madu." ¹⁰ Lalu, aku ngicokng buku kenek ampat ka kokot malaekat koo lalu ku najar, ka moot ku taraso manse' angayo madu; dah ako' aku najar io, parutku jadi pahit. ¹¹ Lalu, io ba kato ka aku, "Kau arus bacurito agi' k adapotn samanyak bangso ba kaum ba bahaso ba rajo-rajo."