¹ Kanyatootn ampat ka Yesus Kristus , nang di mare' Allah ka Io koo sa' magari'otn ka amba-amba-E tantang hal-hal nang arus tajadi. Yesus Kristus bakato nyian malalui' malaekat -E supayo di sampeotn ka Yohanes, amba-E. ² Yohanes dah jadi saksi firman Allah ba Yesus Kristus, samuo nang dah io nanang. ³ Di barakati'lah urokng nang maco ngan suaro koat firman parambuatan nyian lalu di barakati' ugo' ne'ido' nang nangarotn io lalu ngarajaan dameo nang dah tatulis kadoopme, karamo waktue dah samak. SALAM YOHANES KA KATUJUH UMAT KA ASIA ⁴ Ampat ka Yohanes, ka katujuh umat nang ado ka Asia. Anugerah ba damai sajahtaro tuk kau ampat ka Io nang dah ado,lalu nang mao' atokng; ba nang ampat katujuh roh nang ado ka adapotn takhta-E, ⁵ lalu ampat ka Kristus Yesus, Saksi nang paling ngarebet sidi, nang doho'-doho' bangkit ka antaro urokng mati ba panguaso rajo-rajo ka dunio. Ka io nang ngasihi' diri' lalu ngapasotn diri' ampat ka doso-doso diri' ba darah-E, ⁶ lalu dah ngamuat diri' jadi sete' karajaan, imam-imam nu' Allah ba Bapa'-E, nu'-Elah kamuliootn ba kakuasootn sampe salama-lamae! Amin.* ⁷ Tananglah, Yesus atokng ba awan-awan, lalh, tiap mato nanang ka Io, tamasuk ne'ido' nang dah nusuk-Io ; lalu samuo bangso ka dunio pasti batanvisotn karamo Io. Au', nyian pasti tajadi! Amin. ⁸ "Aku nyian Alfa ba Omega, firman Tuhan Allah, nang ado, Nang dah ado, lalu nang mao' atokng, Nang Mahakuasa." PANANANGAN YOHANES TANTANG ANAK MANUSIO ⁹ Aku, Yohanes, kamaru' ba sabayangu nang ngicokng bagiotn doopm kasusohotn, doopm karajaan, lalu kataatotn ka doopm Yesus, barado ka pulau nang di sabut Patmos karamo firman Allah ba kasaksiotn Yesus. ¹⁰ Aku dikuasai' Roh* pado ari Tuhan, lalu aku nangar suaro nyarekng amoat ka balakangku angayo bunyi sarompet, ¹¹ nang bakato, "Tulisotnlah samuo nang kau nanang kadoopm buku lalu kiriman koo ka tujuh umat: Efesus, Smirna, Pergamus, Tiatira, Sardis,Filadelfia, ba Laodikia." ¹² Lalu, aku mamaik nanango suaro nang bakato ka aku, Pas aku mamaik, aku nanang tujuh poho sensan amas, ¹³ lalu katangoh-tangoh poho lampu koo, aku nanang seko' urokng angayo kamudo' manusio,* make juboh sampe kapoho ba salempang amas ka dada-E. ¹⁴ Kapalo ba buuk-E putih angayo bulu kambing, saputih salju; lalu mata-E angayo api nyalo. ¹⁵ Poho-E mangkilat angayo timago nang jadi baro doopm parapiotn lalu suara-E angayo gamuruh ai' boho' . ¹⁶ Ka kokot kanan-E, Io nangkapi' tujuh bintokng lalu ampat ka moot-E kauar sete' mando tajopm ba mato duo, lalu muha-E bacahayo angayo mata ari tangkoh. ¹⁷ Waktu aku nanang Io, aku ka raboh ka poho-E angayo urokng mati. Tapi, Io muangan kokot kanan-E ka atasku lalu bakato, "Ame gai'; Akulah Nang Pamulo ba Nang Pangabisan, ¹⁸ lalu Nang Idup. Aku dah mati, tapi tananglah Aku idup sampe salama-lamae, lalu Aku nangkapi' kunci maut ba kuncj Hades. ¹⁹ Karamo koo, tulisotnlah hal-hal nang dah kau nanang, lalu hal-hal nang tajadi kanio' ba hal-hal nang mao'tajadi ako'e. ²⁰ Nyianlah rahasio tantang tujuh bintokng nang kau nanang ka kokot kanan-Ku ba tujuh poho sensan amas koo. Tujuh bintokng koo bo para malaekat ampat ka tujuh umat; lalu tujuh poho sensan koo tujuh umat."