¹ Waktu koo, Rajo Herodes ngangkat kokote ka sangape urokng jemaat sa' ngarongoi ne' ido' . ² Io munuh Yakobus, kamaru' Yohanes, make mando. ³ Pas Herodes nanang kalakuane koo ngarepoot ati urokng-urokng Yahudi, io langsung nangkap Petrus gae. Kajadiane nyian waktu Ari Rayo Roti Ano' Bargi. ⁴ Ako' io nangkap Petrus, io minjaro lalu io nyarohot ka ampat urokng tantara sa' ngawasi io, maksute ako' Paskah baru io tabanano ka urokng rami. ⁵ Waktu Petrus di nahan ka pinjaro, jamaat sega' basampok ka Allah sa' Petrus. Malaekat Tuhan Ngapasot Petrus ampat ka pinjaro ⁶ Maam koo, waktu Herodes nabanano Petrus kauar, Petrus gi' tidur ka antaro duo tantara, di ngikat ba duo ege rante, samuhae panjago ngawasi ka muho pintu pinjaro. ⁷ Lalu, tanang, ado seko' malaekat Tuhan badiri ka samak Petrus cahayo ba sinar ka sel pinjaro koo, lalu malaekat koo napok rusuk Petrus ngumpatot Io,sambil ba kato,"Ancang umpat!"rante-rante koo bajantoatni apas ampat ka kokote. ⁸ Lalu malaekat koo ba kato ka io, "Ikat pingakngu pake sandalngu." Io nurutilah. Lalu, ba kato ka io,"Pake bajungu ampus ba aku!" ⁹ Lalu, Petrus kauar nunoot malaekat koo. Io no' nahui sabanare kalo' nang tajadi ka malaekat koo nyato, io ngiro kahe pananangane ajo'. ¹⁰ Pas ne'ido' dah ngalewati panjago nang sete ba nang ka duo, ne' ido' sampe ka pintu garbang basi nang nujuo' ka koto. Pintu garbang koo bo tabuko' sandiri, lalu ne' ido' kauar bajoot sampe ka ubok, angkat malaekat koo ningoot Petrus. ¹¹ Waktu Petrus sadar ameo nang tajadi ka diri'e, io bakato "Kanio', aku banar-banar nahui Tuhan ngirim malaekatE ba nyalamatot aku ampat ka Herodes ba nang samuae urokng Yahudi maoan." ¹² Ako Petrus nahui koo, io ampus ka rumoh Maria, uma' Yohanes nang ba damo Markus ugo', di koo urokng ba kumpul ngan basampok. ¹³ Waktu Petrus nodok pintu gerabang, ado seko' palayan ambini nang badamo Rode mukoot io pintu. ¹⁴ Dah io nganali' angkoo suaro Petrus, karamo karepoot io ano' muko' pintu, tapi taamo' kadoop babatak Petrus ado badiri ka muho pintu gerbang. ¹⁵ Ne'ido' bakato ka Rode, "Dah gilo kau!" Tapi Rode bakato memang sidi ado, tapi ne'ido' tatap bakato, "Nang koo bo malaekate." ¹⁶ l Tapi, Petrus tarus-tarusan nodok, waktu ne'ido' muko pintu, lalu nanang Petrus, ne'ido' takajut. ¹⁷ Tapi dah Petrus mare isarat ba kokote pok ne'ido' diam, io nyaritoot ka ne'ido' jamae Tuhan nabanan io kauar pinjaro. Lalu , io bakato, "Sampeot barito nyian ka Yakobus ba kamaru'-kamaru' nang saiman." Lalu io barangkat ampus ka tampat nang lain. ¹⁸ Ampagie, ributlah samuo saridadu ka koo masalahe ameo nang dah tajadi ka Petrus. KEMATIAN HERODES ¹⁹ Waktu Herodes no' tamu ngagui Petrus, io mareksai samuo panjago lalu io marentohot pok ne'ido' dibunuh. Lalu, Herodes turutn ampat ka Yudea ka Kaisarea lalu diop kanaun. ²⁰ Waktu koo, Herodes bero sidi ka urokng-urokng Tirus ba Sidon, lalu ba pakat, ne'ido' atokng ngadap Herodes, lalu ako' mujuk Blastus, pangurus rumoh tango' rajo ne'ido' minto ba damai karamo tampat ne'ido' namu kiriman makanan ampat ka tampat Herodes. ²¹ Atokng ka ari nang dah ne'ido' nantuot, Herodes make baju rajo, duduk ka bangku pangadilot, ba pidato ka ne'ido'. ²² Rakyat tarus ngampak, "Nyianlah suaro allah, buke manusio!" ²³ Jakoo ugo' seko' malaekat Tuhan nampar io karamo io ano' ngamulioot Allah lalu io entokng najar, lalu mati. ²⁴ Tapi bo, firman Tuhan makin idup ba lipat-lipat. ²⁵ Lalu, Barnabas ba Saulus puok ampat ka Yerusalem ako' ne' ido' ngakoot palayanane. sambil mabo Yohanes, nang ba damo ugo' Markus.