¹ Lalu sampelah kabatnne ka sabarang danau, ka daerah urakng Gerasa. ² Baru'k aja' Yesus turutn dari parahu, ataknglah seko' urakng nang karasukan roh jahat dari pakuburan namui'k Ia. ³ Urakng koa diapm di koa, ina'k ada seko'k urakng pun agi'k nang sanggup ngikat ia, sakaipun di rante, ⁴ barang udah pancah ia dingikat ba dingarante, tapi rante e ia mutusatn ba pangikatte ia ngancuratn, sampe ina' ada seko'k urakngpun nang cukup kuat untu' naap ia. ⁵ Siakng maam ia bakaliaran ka kuburan ba ka bukit-bukit sambi ngampak ba nokoi'k diri'k e ba batu. ⁶ Sawaktu ia nee'k Yesus dari jauh, batalama'klah ia ngampusi'k Yesus tarus nyambah Ia. ⁷ lalu ba suara nang karas ia ngampak; "Ahe urusan-Nyu ba aku, hei Yesus, Anak Jubata Nang Mahatingi? Demi Jubata, ame siksa aku!" ⁸ Barang sanape'k e Yesus bakata ka ia: "Hoi kao roh jahat! Kauarlah dari urakng nyian!" ⁹ Apas koa Ia batanya'k ka urakng koa: "Sae damanyu?" ia nyahuti'k: "Damaku Legion, barang kami manyak." ¹⁰ Ia minta'k sidi-sidi supaya Yesus ame ngoser roh-roh koa kaluar dari daerah koa. ¹¹ Ada dikoa ka sisi bukit manyak sidi babotn gik ngago'k makatn, ¹² tarus roh-roh koa minta'k ka Ia, "Suruhlah kami pindah ka babotn-babotn koa, biaratnlah kami namai'k ia!" ¹³ Yesus ngabulatn pamintaan kabatnne kao. Tarus kaluarlah roh-roh jahat koa ba nama'ik babotn-babotn koa. Komoan babotn nang kira-kira dua ribu jumbalahhe koa tarajutn dari sisi jurang ka daapm danau tarus mati lamas ka daapme. ¹⁴ Tarus darilah panyaga-panyaga babotn koa ba nyuritaatn parihal koa ka kota'k ba ka kampokng-kampokng sakitare. Tarus kaluarlah urakng untu' nee'k ahe nang udah jaji. ¹⁵ Kabatnne atakng ka Yesus ba nee'k urakng nang karasukan koa duduk, udah bapakean ba udah waras, urakng nang tadi e karasukan Legion koa. Jaji gai'k lah dangan koa. ¹⁶ Urakng-urakng nang udah nee'k babaro parihal koa bacurita ka dangan ahe nang udah jadi ka urakng nang karasukan setan koa, ba babotn-babotn koa. ¹⁷ Lalu dangan maksa Yesus biar ningaatn daerah he koa. ¹⁸ Sawaktu Yesus naik agik ka daapm parahu, urakng nang tadi karasukan setan koa minta'k biar dingijinan nunaan Ia. ¹⁹ Yesus ina' muihan, tapi Ia bakata ka urakng koa: "Puaknglah ka rumahnyu, ka urakng-urakng sakampokng, bare' nauanlah ka dangan sagala ahe nang udah dingalakukan di Tuhan ka kao ba ayamae Ia udah ngasihi'k kao!" ²⁰ Urakng koa pun ampuslah ba mulai'k maritaatn ka daerah Dekapolis sagala ahe nang udah diminjawat di Yesus ka atas diri'k e tarus dangan koa samua jaji heran. ²¹ Apas Yesus nyabarang agik ba parahu, urakng manyak baduyun-duyun atakng tarus ngarumutni'k Ia. Sedang Ia barada ka sisi danau, ²² ataknglah seko'k kapala rumah sambayang nang badama Yairus. Sawaktu ia nee'k Yesus tasungkurlah ia ka adapatn paha-E ²³ ba memohon sidi ka-Ia: "Anakku nang bini agi'k sakit amper mati, ataknglah kirae ba tarohatnlah kokot-Nyu ka atas ia, biar ia bisa salamat ba tatap idup" ²⁴ lalu ampuslah Yesus ba urakng koa. Urakng manyak baduyun-duyun nunaan Ia ba peset-peset ka samak-Ke. ²⁵ Ada dikoa seko'k nang bini nang udah dua balas tahutn lamae sakit pendarahan. ²⁶ Ia udah baulang-ulang dingobati'k di bamacam tabib, sampe udah ia ngabisatn samua nang ada ka ia, tapi sama sakai ina ada gunae malah sabalik'ke kaadaanne makin buruk. ²⁷ Ia udah nangar barita-barita parihal Yesus, tarus ka tangah-tangah urakng manyak koa ia nyamaki'k Yesus dari balakang ba nyangkam jubah-He. ²⁸ Barang jare: "Asal ku jangkam maan jubah-He, aku pasti tomo." ²⁹ Pas koa uga'k barantilah pendarahanne ba ia marasa, kade'k badanne udah tomo dari panyakitte. ³⁰ Sawaktu koa ugak Yesus nauan, kade' ada tenaga nang kaluar dari diri'k-E, tarus Ia malek ka tangah urakng manyak lalu batanya'k: "Sae nang nyangkam jubah-Ku?" ³¹ Murit-murit-Te nyahuti'k: Kita' nee'k babaro ayamae urakng-urakng nyian bapeset-peset kasamak-Nyu, lalu Kita' batanya'k: Sae nang nyangkam Aku?" ³² Lalu Ia nee'k sakuliling-Nge mao'k nee'k sae nang dah udah ngalakukan hal koa. ³³ Nang bini koa, nang jaji gai'k ba gangatar sawaktu nahui'k ahe nang udah jaji ka diri'k e, muok ba tasungkur ka adapatn Yesus ba ati nang tulus mare'k nauan sagalae ka Yesus. ³⁴ Tarus jakata-E ka nang bini koa: "O anak Ku, imannyu udah nyalamatatn kao. Puaknglah salamat ba tomolah dari panyakit nyu!" ³⁵ Sawaktu Yesus masih bakata ataknglah urakng dari kaluarga kapala rumah sambayang koa tarus bakata: "Anaknyu udah mati, ahe gunae agik kao nyusah-nyusahatn Guru?" ³⁶ Tapi Yesus ina'k maduliatn pakataatn dangan koa, Ia bakata ka kapala rumah sambayang koa: "Ame gai'k, picaya maan!" ³⁷ Tarus Yesus ina'k muihan seko urakng pun nang nunaan, kacuali Petrus, Yakobus, ba Yohanes, adi'k Yakobus. ³⁸ Kabatnne sampe ka rumah kapala rumah sambayang koa, dinaun Ia nee'k urakng-urakng bacurak, nangis, ngaruo ba suara nang nyarekng. ³⁹ Apas koa Ia taama'k tarus Ia bakata ka urakng-urakng koa: "Ngahe kita'k bacurak ba nangis? Kamuda'k nyian ina'k mati, tapi tidur!" ⁴⁰ Tapi dangan koa ngaakatn Ia. Tarus Ia ngoser samua urakng koa, lalu Ia maba apa'k ba uwe'k kamuda'k koa ba kabatnne nang basama-sama ba-Ia taama'k ka bii'k kamuda'k koa. ⁴¹ Lalu Ia nyingii'k kokot kamuda'k koa, jakata-E: "Talita kum," nang ba arti: "Hei anak-Ku, Aku bakata ka kao, umpatlah!" ⁴² Sakoa ugak kamuda'k koa bangkit badiri ba bajaatn, barang umurre udah dua balas tahutn. Samua urakng nang ada sidi heran, ⁴³ Ia bapasatn sidi-sidi ka kabatnne biar ame seko'k urakng pun nang nahui'k parihal koa, lalu Ia nyuruh dangan mare'k kamuda'k koa makatn.