¹ Ka lain ari Yesus mulai agi'k ngajar ka sisi danau. Lalu atakng urakng nang manyak sidi jumbalah he ngarumutni'k Ia, sampe Ia naik ka sabuah parahu nang agik balabuh lalu duduk di koa, sedangkan samua urakng manyak koa ka darat, ka sisi danau koa. ² Ba Ia ngajaratn manyak hal daapm paumpamaan ka kabatnne. Daapm ajaran-Ne koa Ia bakata ka kabatnne: ³ "Dangaratnlah! Ada seko' urakng pamanih kauar untu' naburatn banih. ⁴ Sawaktu ia naburatn banih ada sabagian banih koa jantu'k ka sisi maraga, tarus ataknglah burukng lalu matoki'k ia sampe abis. ⁵ Sabagian jantu'k ka tanah nang babatu-batu nang ina' manyak tanahhe, lalu banih koa pun tumuh, barang tanahhe mepes. ⁶ Tapi apas mataari tarabit, layu'lah ia ba jaji karikng barang ina' ba akar. ⁷ Sabagian agi'k jantu'k ka tompoatn duri, lalu makin aya'k lah tompoatn duri koa ninihi'k tanaman koa sampe mati, ina jaji babuah. ⁸ Ba sabagian jantu'k ka tanah nang baik, ia tumuh subur babuah, hasille ada nang tau puluh kai lipat, ada nang nang anam puluh kai lipat, ada nang saratus kai lipat." ⁹ Tarus jakata Yesus: "Sae nang ada ba tarenyekng untu' nangar, haruslah ia nangar!" ¹⁰ Sawaktu Ia babaro, pangikut-pangikut-Te badua balas murit koa nanyaan parihal paumpamaan koa. ¹¹ Ja Yesus: "Ka kao udah dimareatn kuasa, tapi ka urakng-urakng luar sagala sesuatu disampeatn daapm paumpamaan, ¹² biar: "Sakaipun nee'k, kabatnne ina'k nanggap, sakaipun nangar, kabatnne ina'k ngarati, biar kabatnne ame babalik ba di ampuni'k. ¹³ Tarus Ia bakata ka kabatnne: "Ina'k me kao ngarati paumpamaan nyian? Kade' yakoa yamae kao bisa ngarati paumpamaan nang lain? ¹⁴ Pamanih koa nang naburatn firman. ¹⁵ Urakng-urakng nang ka pinggir maraga, tampat firman koa dinaburatn, ialah kabatnne nang nangar firman, lalu ataknglah Ibalis tarus naap firman nang baru' di naburatn ka kabatnne koa. ¹⁶ Yakoa ugak nang dinaburatn ka tanah nang ba batu-batu, ialah urakng-urakng nang nangar firman koa ba langsung narima' ia ba ati nang senang, ¹⁷ tapi kabatnne koa ina' ba akar ba tahan sabantar kahe. Kade'k pas waktu atakng penindasan gek penganiayaan barang oleh firman koa, kabatnne koa langsung murtad. ¹⁸ Ba nang lain koa nang di naburatn ka tompoatn duri, koa nang nangaratn firman koa, ¹⁹ lalu kakuatiran dunia nyian ba tipu daya kakayaan ba kainginan-kainginan ka hal nang lain taama'klah ninihi'k firman koa sampe ina'k babuah. ²⁰ Ba ahir e nang dinaburatn ka tanah nang baik, ialah urakng nang nangar ba nang nyambut firman koa tarus babuah, ada nang tau puluh kai lipat, ada nang anam puluh kai lipat, ba ada nang saratus kai lipat." ²¹ tarus Yesus bakata ka kabatnne: "Urakng ngicakng lampu buke' supaya ditarohi'k ka babah tampat tidur, tapi biar ditarohi'k ka atas lampu badiri. ²² Barang ina' ada sesuatu nang tataporatn nang ina'k akan di batakatn, ba ina'k ada sesuatu nang rahasia nang in'k akan tasingkap. ²³ Saepun nang ada ba tarenyekng untu' nangar, haruslah ia nangar!" ²⁴ lalu Ia bakata agik: "Ingatlah ahe nang kao dangar! Ukuran nang kao make untu' ngukur akan di ukuratn ka kao, ba salabihe akan ditambahatn agik. ²⁵ Barang sae nang mempunyai'k, ka ia ana akan dibarei'k, tapi sae nang ina'k punya'k, ahe pun ugak nang ada ka ia akan ditaap dari ia." ²⁶ lalu ja Yesus: "Aya iyanlah hal kerajaan Jubata koa: saumpama urakng nang naburatn banih ka tanah, ²⁷ lalu ka maam ari e ia tidur ka siakng ari e ia umpat, tarus banih koa ngauaratb comok e,lalu comok koa makin tingi, ayamae jaji e urakng koa ina'k nauan. ²⁸ Tanah babaroe ngauasatn buah, mula-mula tangke e, lalu ege'k e, apas koa ege'k-ege'k nang barinsi'k ka daapmme. ²⁹ Kade' buah he koa udah cukup masak, urakng koa langsung mebet ia, barang musim bahanyi udah atakng ³⁰ Jakata-E agik: "ba ahe harusse diri'k bandingkan Kerajaan Tuhan koa, gek ba paumpamaan mae gek diri'k mao'k ngambaratn ia? ³¹ Hal Kerajaan koa saumpama ege'k sesawi nang dinaburatn ka tanah. Memang ege'k e koa nang paling ene'k dari pada samua jenis banih nang ada ka dunia. ³² Tapi kade'k ia ditaburatn, ia tumuh ba jaji labih aya'k dari pada samua sayuran nang lain ba ngauasatn cabang-cabang nang aya'k, sampe burukng-burukng ka angit pun basarakng ka daapm me. ³³ Daapm manyak paumpamaan nang aya koa, Ia maritaatn firman ka urakng sasuai ba pengertian urakng-urakng, ³⁴ ba tanpa paumpamaan Ia ina'k bakata-kata ka urakng, tapi ka murit-murit-Te Ia nguraikan sagala e sacara rinci. ³⁵ Ka pada ari koa ugak, sawaktu abut udah patakng, Yesus bakata ka kabatnne: "Ijeklah diri'k batolak ka sabarang." ³⁶ Kabatnne ningaatn urakng manyak koa, tarus ngicakng Yesus ka daapm parahu, Yesus duduk lalu parahu-parahu nang lain nunaan Ia. ³⁷ Tarus ataknglah angin topan nang aya'k sidi, ba ombak nyambur taama'k ka daapm parahu, sampe parahu koa mulai'k bainsi'k di ai'k. ³⁸ Waktu koa Yesus gi'k tidur ka buritan ka sabuah tilam. Tarus murit-murit-Te ngumpatatn Ia lalu bakata ka-Ia : "Guru, Kao ina'k paduli se diri'k binasa?" ³⁹ Ia pun umpat, merai'k angin koa pun ugak bakata ka danau koa: "Diam! Tananglah!" Tarus angin koa diam ba danau koa tanang sidi. ⁴⁰ Lalu Ia bakata ka kabatnne: "Ngahe kao gai'k sidi? Ngahe kao ina'k picaya'k?" ⁴¹ Kabatnne jaji gai'k sidi lalu bakata seko'k ba nang lain: "Sae kira'k e urakng nyian, sampe angin ba danau pun taat ka-Ia?"