1
Nyianlah pamulaan Injil parihal Yesus Karistus, Anak Jubata.
2
Saparati tatulis daapm kitap nabi Yesaya: "Tee'lah, Aku nyuruh-utusan-utusan noho'ik Kao, ia akan nyiapatn maraga untu'-Nyu;
3
ada suara urakng nang ngampak ka padang gurun: siapatnlah maraga untu' Tuhan, paocorlah maraga untu' Ia",
4
ayakoalah Yohanes Pambaptis muok ka padang gurun ba ngampakatn: "Batobatlah ba bare'lah dirinyu dibaptis, Jubata akan ngampuni dosanyu."
5
Tarus ataknglah ka ia urakng-urakng dari saluruh daerah Yudea ba samua panduduk Yerusalem, ba sambi ngako'k dosae kabatnne dibaptis ka sungai Yordan.
6
Yohanes make jubah bulu unta ba ikat pinggang kuit, pamakanan ne buntak ba madu daapm abut.
7
Nyianlah nang ia maritaatn: "Apas aku akan atakng Ia nang labih bakuasa dari pada aku; membungkuk ba muka' tali kasut-Te pun aku ina' layak.
8
Aku maptis kao ba ai'k tapi Ia akan maptis kao ba Roh Kudus.
9
Sawaktu koa ataknglah Yesus dari Nasaret ka tanah Galilea, tarus Ia dimaptis ka sungai Yordan di Yohanes.
10
Sawaktu Ia muok dari ai'k, Ia nee'k angit rojek, ba Roh Kudus aya burukng dara turutn ka atas-Se.
11
Tarus kadangaratnlah suara dari saruga: "Kaolah Anak-Ku nang Kukasihi'k, ka Kaolah Aku senang."
12
Apas koa Roh mimpin Ia ka padang gurun.
13
Ka padang gurun koa Ia diapm ampat puluh ari lamae, dicobai' di Ibalis, Ia ada dikoa kaantara binatang liar ba malaekat-malaekat ngalayani' Ia.
14
Apas Yohanes dinangkap ataknglah Yesus ka Galilea maritaatn Injil Jubata,
15
Jakata-E: "Waktu e udah ganap; Karajaan Jubata udah samak. Batobatlah ba picaya'klah ka Injil!"
16
Sawaktu Yesus gik bajaatn nutuatni'k danau Galilea, Ia nee'k Simon ba Andreas, adik Simon. Kabatnne agik nabaratn jala ka danau, barang kabatnne panjala ikatn.
17
Yesus bakata ka kabatnne: "Ijeklah, tunaan Aku kao mao'k Ku jajiatna'k panjala manusia."
18
Tarus kabatnne langsung ningaatn jalae ba nunaan Ia.
19
Apas Yesus narusatn pajaanan-Ne sadikit agik, Ia nee'k Yakobus, anak Jebedeus, ba Yohanes, adik e, agik ngamasatn jala ka daapm parahu.
20
Yesus bijak nyaru'ik kabatnne tarus kabatnne koa ningaatn apa'ke, Jebedeus ka daapm parahu ba urakng-urakng upahatnne
21
Kabatnne sampe ka Kapernaum. Apas ari Sabat mulai'k, Yesus langsung taama'k ka daapm rumah sambayang ba ngajar.
22
Dangan heran nangar pangajaratn-Ne, barang Ia ngajar kabatnne aya urakng nang bakuasa, ina' aya tolen ahli-ahli Taurat
23
Pas waktu koa ka daapm rumah sambayang koa ada seko' nang karasukan roh jahat. Urakng kao ngampak:
24
"Ahe urusan-Nyu ba kami, hei urakng Nasaret? Kao atakng mao' binasaatna'k kami? Aku nauan sae Kao: Nang Kudus dari Jubata."
25
Tapi Yesus ngarahakngi'k ia, jakata-E: "Diam, kaluarlah dari ia!"
26
Roh jahat koa nguncakng-nguncakng urakng koa, ba sambi ngampak ba suara nyarekng ia kaluar dari urakng koa.
27
Urakng samua kaheranan, sampe ngomongan koa, jare: "Ahe nyian? Sote' ajaran barahu. Ia bakata bakuasa. Roh-roh jahat pun Ia marentah tarus roh-roh koa taat ka Ia."
28
Tarus gaceh tasiarlah kabar parihal Ia ka sagala panjuru ka saluruh Galilea.
29
Apas kaluar dari rumah sambayang koa Yesus ba Yohanes ampus ka rumah Simon ba Andreas.
30
Datu'k nang bini Simon tagurikng barang rongko'k demam. Kabatnne langsung matakatn kaadaanne koa ka Yesus.
31
Ia ampus ka tampat nang bini koa, tarus nyingii'k kokotte Ia ngumpatatn ia, lalu ilanglah angat te. Apas koa nang bini koa ngalayani'k kabatnne.
32
Dah mao'k maam, apas mataari taama', dingicaknglah ka Yesus samua urakng rongko'k ba nang karasukan setan.
33
Tarus bakarumunlah samua panduduk kota'k koa ka muha pintu.
34
Ia nyamuhan manyak urakng nang menderita bamacamp-macam panyakit ba ngoser manyak setan; Ia ina'k muihan setan-setan koa bakata, barang setan-setan koa nganal Ia
35
Bakaapm sidi, sawaktu ari masih galap, Ia umpat lalu kaluar. Ia ampus ka tampat nang sunyi'k lalu badoa dikoa.
36
Tapi Simon ba na' ayukng-ayukng nge nyoso Ia;
37
sawaktu namuan Ia kabatnne bakata; "Samua urakng ngagui'k Kao."
38
Ia nyahuti'k: "Ijeklah diri'k ampus ka tampat lain, ka kota'-kota' nang basamakatn, biar dinaun ugak Aku maritaatn Injil, barang untu' koalah Aku atakng."
39
Tarus ampuslah Ia ka saluruh Galilea ba maritaatn Injil daapm rumah-rumah sambayang kabatnne, ba ngoser setan-setan.
40
Seko'k urakng nang balaeko atakng ka Yesus, sambi ba lutut ka adapatn-Ne ia mohon bantoan-Ne, jare: " Kade Kao mao'k kao bisa nyamuhatn aku."
41
Tarus tagaraklah ati-E kasihatn, tarus Ia nyooatn kokot-Te, nyangkam urakng koa tarus bakata: "Aku mao'k jajilah kao samuh."
42
Salapas koa ugak ilanglah panyakit laekoe urakng koa, tarus jaji baraseh.
43
Bijak ia nyuruh urakng koa dari ba paringatan nang karas:
44
"Ingatlah, amelah kao mare'k nauan ahe-ahe parihal nyian ka sae pun, tapi ampuslah, teeatnlah diri'knyu ka imam ba persembahatnlah untu' pamaresahatnnyu persembahan, nang dimarentahatn di Musa, jak jaji bukti untu kabatnne."
45
Tapi urakng koa ampus mare'k nauan paristiwa koa ba nyabaratn ia kamae-mae, sampe Yesus ina'k bisa agik tarang-tarangan taama'k ka daapm kota'. Ia diapm ka luar ka tampat-tampat nang sunyi; tapi urakng tarus ugak atakng ka Ia dari sagala panjuru