¹ Tarus, udah lewat sangahe ari, waktu Yesus atakng agik ka Kapernaum, tasiarlah kabar, kade' Ia ada ka rumah. ² Tarus ataknglah urakng-urakng bakarumun sampe ina' ada agik tampat, sampe ka muha pintu pun ina' ada agik. Samintara Ia maritaatn firman ka kabatnne, ³ ada urakng-urakng atakng ngicakng ka Ia seko' urakng nang lumpuh, dimikut di ampat urakng. ⁴ Tapi kabatnne ina' bisa ngicakng ka Ia di urakng rami koa, tarus kabatnne muka' atap nang ka atas-Se; pas dah tabuka' kabatnne koa nurunan tilam tampat urakng lumpuh koa gurikng. ⁵ Sawaktu Yesus nee'k iman kabatnne koa, bakatalah Ia ka urakng lumpuh koa: "Hei anak-Ku, dosanyu udah dingamponi'k!" ⁶ Tapi dikoa ada ugak duduk sangahe eko'k urakng ahli taurat, kabatnne bapikir daapm ati: ⁷ "Ngahe urakng nyian bakata yakoa? Ia maleceh Jubata. Sae nang bisa ngamponi'k dosa salain dari Jubata koa babaro?" ⁸ Tapi Yesus langsung bijak naun daapm ati-E, kade'k kabatnne bapikir yakoa, tarus Ia bakata ka kabatnne; "Ngahe kao bapikir ayakoa ka daapm atinyu? ⁹ Mae gek nang labih mudah, ngataatn ka urakng lumpuh nyian: Dosanyu udah dingamponi, gek ngataatn: Umpatlah, angkatlah tilamnyu tarus bajaatn? ¹⁰ Tapi biar kao nauan, kade' ka dunia nyian Anak Manusia bakuasa ngamponi'k dosa" - bakatalah Ia ka urakng lumpuh koa -: ¹¹ "Kakao Ku bakata, umpatlah, angkatlah tampat tidurnyu ba puaknglah ka rumahnyu!". ¹² Tarus urakng koa pun umpat, langsung ngangkat tampat tidurre lalu ampus ka luar ka adapatn urakng-urakng koa, sampe dangan samua takjup lalu muliaatn Jubata, ja dangan koa: "Nang aya iyan nape' suah diri'k nee'k ¹³ Apas koa Yesus ampus agik ka pantai danau, tarus samua urakng manyak atakng ka-Ia, lalu Ia ngajar dangan koa. ¹⁴ Apas koa sawaktu Ia bajaatn lewat dikoa, Ia nee'k Lewi anak Alpius duduk ka rumah cukai lalu Ia bakata ka ia: "Tunaanlah Aku!" Tarus badirilah Lewi lalu nunaan Ia. ¹⁵ Apas koa sawaktu Yesus makatn ka rumah urakng koa, manyak panaap cukai ba urakng badosa makatn basama ba Ia ba na' murit-murit-Te ugak, barang manyak urakng nang nunaan Ia. ¹⁶ Sawaktu ahli-ahli Taurat dari golongan Farisi nee'k, kade'k Ia dah makatn ba na' panaap cukai ba urakng badosa koa, bakatalah kabatnne koa ka murit-murit-Te: "Ngahe Ia makatn basama ba na' panaap cukai ba na' urakng badosa?" ¹⁷ Yesus nangaratn ia lalu bakata ka kabatnne: "Buke' urakng sehat nang mararuatn tabib, tapi urakng sakit; Aku atakng buke' untu' nyaru'k urakng banar, tapi urakng badosa." ¹⁸ Sawaktu murit-murit Yohanes ba urakng-urakng Farisi gik bapuasa, ataknglah urakng-urakng lalu bakata ka Yesus: "Ngahe murit-murit Yohanes ba murit-murit urakng Farisi bapuasa, tapi murit-murit-Nyu ina'k?" ¹⁹ Ja Yesus nyahuti'k kabatnne koa: "Bisa gek ayukng-ayukng panganten nang laki bapuasa sedang panganten koa ada ba kabatnne? Salama panganten koa ada ba kabatnne, kabatnne ina'k bisa bapuasa ²⁰ Tapi waktue ana atakng panganten koa ditaap dari kabatnne, ka waktu koalah kabatnne bapuasa. ²¹ Ina' seko'k pun urakng nambalatn saimar kaikng nang nape susut ka baju nang lama, barang kade' yakoa kaikng panambal koa bisa ngarojekkatn, nang barahu ngarojek nang lama, lalu makin ayak'lah rojekke. ²² Yakoa ugak ina' seko'k urakng pun nang nginsi'ik anggur nang barahu ka daapm kantong kuit nang lama, barang kade'k ayakoa anggur koa ana bisa ngarojek kantong koa, sampe jajie anggur koa ba kantongnge dua-dua e tabuakng. Tapi anggur nang barahu haruslah di tarohatn ka kantong nang barahu ugak." ²³ Ka sete' ari waktu ari Sabat, Yesus bajaatn ka uma gandum, samintara bajaatn murit-murit-Te mebet egek gandum. ²⁴ Tarus ja urakng-urakng Farisi bakata ka Ia: "Tee'klah! Ngahe kabatnne koa minjawat hal nang ina'k dimuihan ka ari Sabat?" ²⁵ Ja Yesus nee'k kabatnne koa: "Nape'k suah me kao maca ahe nang dingalakukan di Daut, sawaktu ia ba nang nunaan ia kakurangan ba kaparatn, ²⁶ aya mae ia taama'k ka daapm Rumah Jubata waktu Abiatar jaji Imam Aya'k tarus makatn roti sajian koa-nang ina'k muih dimakatn salain imam-imam- ba mare'k ia ugak ka pangikut-pangikutte?" ²⁷ Tarus ja Yesus ka kabatnne: "Ari Sabat dingadaatn untu' manusia, ba buke manusia untu' ari Sabat, ²⁸ jaji Anak Manusia koa ugak Tuhan atas ari Sabat."