¹ Barang koa, hei kamaru'k-kamaru'k nang kudus, nang namu bagiatn daapm panggilan saruga, tee'lah ka Rasul ba Imam Ayak nang dirik ngakoi, yakoa Yesus, ² nang setia ka Ia nang udah natapatn Ia , ayamae Musa pun setia ka daapm saganap rumah Jubata. ³ Barang Ia di nee pantas namu kamuliaan labih aya'k dari pada Musa, sama aya saparati ahli bangunan labih dihormati dari pada rumah he nang dimangun. ⁴ Barang satiap rumah dibangun di urakng nang ahli bangunan, tapi ahli bangunan sagala sasuatue koa kahe Jubata. ⁵ Ba Musa memang setia daapm saganap rumah Jubata nang jaji palayan untu mare' kasaksian parihal ahe nang ana akan dibaritaatn apas koa, ⁶ tapi Karistus setia jaji Anak nang ngapalai'k rumah-He; ba rumah-He koa dirik, kade dirik sampe ka ahire kuat nyingiik kapicayaatn bapangarapatn nang dirik' muliaatn. ⁷ Barang koa, aya tolen nang dingataatn di Roh Baraseh: "Ka ari nyian, kade' kao nangar suara-E, ⁸ amelah karasatn atinyu aya tolen kamanasatn sawaktu pancobaan ka padakng gurun, ⁹ dimae na' enek moyangnyu nyobai'k Aku bacara nguji Aku, sakaipun kabatnne nee perbuatan-perbuatan-Ku, ampat puluh tahutn lamae. ¹⁰ Koalah gasa'k e Aku bera ka angkatan koa, tarus bakata; Sau kabatnne koa sasat ati, ba kabatnne ina nauan ka maraga-Ku, ¹¹ koalah Aku basumpah daapm bera-Ku; Kabatnne ina akan taama'k ka tampat parantiatn-Ku." ¹² Ati-atilah, hoi kamaruk-kamaruk, biar ka antara kao ame tadapati seko' urakng nang atie jahat ba nang ina' picaya barang ia murtat dari Jubata nang idup. ¹³ Tapi nasehati'lah nang seko ba nang lain satiap ari, salama masih bisa dikataatn "arinyian", biar ame ada ka antara kao nang jaji karas atie di madaaya dinipu ba dosa. ¹⁴ Barang diri'k udah namu bagian ka daapm Karistus, asal maan dirik kuat nyingiik sampe ka ahire ka iman dirik nang samula. ¹⁵ Tapi kade' suah dingataatn: "Ka ari nyian, kade' kao nangar suara-E? amelah karasatn atinyu aya tolen daapm kamanasatn", ¹⁶ sae gek kabatnne nang dah udah mangkitatn Jubata jaji bera, biar pun kabatnne nangar suara-E? Buke' me kabatnne samua kauar dari Mesir ka babah pimpinan Musa? ¹⁷ ba sae gek nang Ia mera'ik ampat puluh tahutn lamae? Buke me kabatnne nang babuat dosa nang bangke e baimpangan ka padakng gurun? ¹⁸ Ba sae gek nang dah Ia nyumpahi, kade kabatnne ina akan taama'k ka tampat parantiatn-Ne? Buke me kabatnne nang ina' taat? ¹⁹ Ayakoalah dirik nee, kade' kabatnne ina bisa taama'k barang kabatnne ina picaya.