¹ Apas jaman dee Jubata manyak bauwakng kai daapm baragam macam cara bakata ka enek moyang dirik lewat parantara na' nabi-nabi, ² tarus ka jaman ahir nyian Ia udah bakata ka dirik ba parantara Anak-Ke, nang udah Ia natapatn jaji nang berhak narima sagala nang ada. Dihe koalah Jubata udah nyajiatn dunia nyian. ³ Ia koa cahaya kamuliaan Jubata ba gambar ujut Jubata ba nunyakng samua nang ada ba pakataatn-Ne nang barinsik kakuasaan. Ba apas Ia udah ngadaatn panyucian dosa, Ia duduk ka sabalah kanan Nang Sidiaya'k, ka tampat nang tingi. ⁴ jauh labih tingi dari pada malaekat-malaekat, sama aya saparati dama nang dimareatn ka Ia jauh labih gagas dari pada dama kabatnne. ⁵ Barang ka sae gek ka antara malaekat-malaekat koa suah Ia bakata: "Anak-Ku Kao! Kao udah Ku maranakatn ka ari nyian?" ba "Aku ana jaji Apak-E, Ba Ia akan jaji Anak-Ku?" ⁶ Ba sawaktu Ia ngicakng ugak Anak-Ke nang sulong ka dunia, ia bakata: "Samua malaekat-malaekat Jubata harus nyambah Ia." ⁷ Ba parihal malaekat-malaekat Ia bakata: "Nang minjawat malaekat-malaekat-Te jaji badai ba palayan-palayan-Ne jaji nyala api." ⁸ Tapi parihal Anak Ia bakata: "TahtaNyu, O Jubata, tatap untu salama-lamae, ba tungkat karajaan Nyu koa tungkat Kabanaratn. ⁹ Kao nyintai kaadilan ba teget ka ka kajahatan; barang koa Jubata, Jubata-Nyu udah ngurapi Kao ba binyak jaji tanda kasukaan, malabihi ayukng-ayukng sakutu-Nyu." ¹⁰ Ba: "Ka pamulaanne, o Jubata, Kao udah minjawat dasar bumi, ba angit koa buatan kokot-Nyu. ¹¹ Samua koa ana binasa, tapi Kao tatap ada, ba samua koa ana jaji bonto' aya pakean; ¹² aya tolen baju ana Kao ngolong kabatnne, ba aya maok baranak kabatnne ana di robah, tapi Kao tatap sama, ba tahutn-tahutn-Nyu ina ba kaudahatn." ¹³ Ba ka sae gek ka antara malaekat koa suah Ia bakata: "Duduklah ka sabalah kanan-Ku, sampe Ku pinjawat munsuh-munsuh-Nyu jaji paninyakatn paha-Nyu?" ¹⁴ Buke' me samua koa roh-roh nang malayani, nang di ngutus untu malayani kabatnne nang harus namu kasalamatan?