¹ Lino lishororo lya Yesus Kirisitus olyo atapire Hompa Karunga ku kwendi ashi ghuye nga tape naku neyeda vakareli vendi kwavyo nga vishoroko munkwangu. Hompa Karunga kwa tapire mbudi yendi ku pitira mwa mu Engeli wendi ogho atumine ntani ghuye ngayi tape kwa mukareli wendi Yohanes. ² Yohanes atapa ghumbangi waku hamena ku nkango da Hompa Karunga ntani na ghumbangi wa kuhamena kwa Yesus Kirisitus, ntani atanta naku ghamba kwa navintje ovyo amonine. ³ Muna lirago ndjeghu waku dameka ku varura dino nkango da ghuporofete naku diyuvita ku vantu ntani muna lirago ndjeghu waku yuvha dino nkango naku ditambura ntani naku limburuka naku tikitamo navintje ovyo vatjanga mo, mbyovyo shi shirugho kuna ku kwangura ntani papepi shina kara, navintje ngavi shoroke naku tikamo. ⁴ Yohanes kuna ku tjangera ku mbunga Kirisite ntano-na-mbiri da mushirongo sha Asiya ashi: Nkenda na mbili yendi yikare papenu yaku tunda kwa Hompa Karunga ogho ana karoko weno, ntani ogho akaliroko paku tanga, ntani ndje nka ngaka karoko kumeho, ntani kumwe na mpepo ntano-na-mbiri odi dina karo kumeho ya shipundi shendi sha ghuHompa, ⁵ nkenda na mbili kwa tunda kwa Yesus Kirisitus, mbangi wa lipuro lya ghushili lyaku tikiliramo, mbeli waku hova ku vhumbuka ku mfa, ntani mupangeli wava Hompa vapa livhu. Ghuye kwatu hora mbyo atufera pa mfa dapa shikurushe naku tuyoghora ku ndjo detu na honde yendi - ⁶ Ghuye kwatu toghorora tukare va Pirisiteli na vapangeli vamu ghuntungi wa Hompa Karunga Shetu - ngatu karere naku tanga naku panda naku tapa mfumwa kwa Yesus Kirisitus wa nkondo nadintje dogoro naruntje na naruntje. Amen. ⁷ Kengenu, ghuye ngaya pa maremo; mantjo gha vantu navantje ngava mumona, kumwe navo vamutwiro lighonga pa mpati. Dimuhoko dapa livhu nadintje ngadi lira naku guva paku mukenga omo ana kuya. Vino Mo ngavi shoroka ngoli, Amen. ⁸ Hompa Karunga kwa ghamba ashi, "Ame Alpha na Omega, ntani ame waku tanga ntani ame waka hulilira,'' Ghuye kwa tanta nka ashi, ''Ame na karoko weno, ntani ame na kaliroko, ntani ame nka nganu ka karoko ku meho, ntani ame kwa kara na nkondo daku pangera navintje.'' ⁹ ''Ame, Yohanes-mukareli ghunyenu waku hepa muku yuvita mbudi ya ghuntungi wa Karunga naku lididimika mukonda ya lipuro na lipangero lyamu mwa Yesus Kirisitus - ogho vakwatire vamu tware pa shirudi sha lifuta sha lidina lya Patimosi mukonda yaku yuvita nkango da Hompa Karunga ntani naku tapa ghumbangi wa kuhamena viruwana vya Yesus Kirisitus. ¹⁰ Ame kwa kalire mu mpepo mu liyuva lya Hompa Karunga. Makura ame kwa yuvire liywi lyaku dameka ghunene kuna kutunda kuruku rwande kuna ku shiva yira marumbendo. ¹¹ Kuna ku ghamba ashi, ''Tjanga mu mbapira kwavino ghuna kumona, makura ghutume dino mbapira ku mbunga Kirisite dino ntano-na-mbiri - ku Efeso, naku Simerena, naku Peregamu, naku Tiyatira, naku Seredesa, naku Filedefiya ntani naku Lewodisiya.'' ¹² Ame makura anu piruka nukenge kuruku kwaghu ana ku ghambo ku kwande, tupu na piruka ngoli ame anu mono shitondo shakaro na maghuywekero gharamba matano-na-maviri sha ngorodo. ¹³ Pakatji ka shitondo shama ghuywekero kwa karapo waku fana yira mona muntu, ghuye kuna dwata lirwakani lyalire lyaku tika dogoro ku mpadi dendi ntani ghuye kuna ku manga ngama ya ngorodo pa nturo yendi. ¹⁴ Ku mutwe wendi na huki dendi kuna kene naku vembera yira huki da ndjwi da dikenu - daku fana yira mema gha lime - ntani mantjo ghendi kuna ku yukuma yira makara ghaku twera mundiro. ¹⁵ Ntani maghuru ghendi kwa fana yira shikugho sha ngoporo vana putju, ngoporo oyo vatereka mbyo vayi hemuna mu lidiko lyamu ndiro waku twera lya ghupyu, mbyo yaheka naku kushuka naku vembera ghunene, ntani liywi lyendi kwa fana yira mema ghaku duka ngudu naku pupira ghamayingi ngudu. ¹⁶ Ntani ghuye kuna kwa terere mbungururu ntano-na-mbiri mu lighoko lyendi lyaku rulyo, ntani mukanwa kendi kuna ku tundamo rufuro rwaku twepa rwaku teta kuviri. Ntani ku shipara shendi kuna ku vembera yira shite sha liyuva lyaku twera ghunene. ¹⁷ Opo na kengire ku kwendi, ame anu ku gandere ku mpadi dendi yira muntu wa kufa. Ghuye akambeke liwoko lyendi lya rulyo pa pande naku ghamba ashi, ''Kapishi ghukare na ghoma. Ame waku hova ntani ame waku hulilira ¹⁸ ntani ame kuna kara na monyo. Ame kwa fire, kenga kuno ku kwande, ame kuna kara na monyo wa na runtje! Ntani nka ame kwa kara na tjapi da mfa ntani nadi daku shirongo sha vafe. ¹⁹ Mpo ngoli ashi ove tjanga kwavi ghuna mono, tjanga kwa vino vina kushoroko weno, ntani navi ngavi shoroko kumeho. ²⁰ Lihoramo lya dino mbungururu ntano-na-mbiri odo ghuna mono mu lighoko lyande lya rulyo, ntani na shitondo sha maghuywekero gha ramba matano-na-maviri sha ngorodo kuna ku tanta ashi: Odino mbungururu ntano-na-mbiri kuna kara va Engeli vaku lipongero lya mbunga Kirisite dino ntano-nambiri, ntani shino shitondo sha maghuywekero gharamba matano-na-maviri kuna kara mapongero gha mbunga Kirisite dino ntano-na- mbiri.''