¹ Vanankore vambunga ya Judah na Benjamin avayuvhu ashi ovo vakavyukiro kughupika kuna kutunga ntembeli ya Hompa, Karunga wa Israel. ² Ava yendi kwa Zerubbabel na matimbi ghamumara ghona, Avaghamba shi, "Renkenu tudike nanwe, morwa atwe natwe kwakareranga Karungu ndjegho mwakareranga nka atwe kwatameka kudjamba ndjambo kukwendu kutunda opo atuyita Esarhaddon,hompa wa Assyria, kulivango lino." ³ Ngoli Zerubbabel, Jeshua, na matimbi ghakuhupako gha lira ghona avaghamba shi: "Kapi tuna hepa mbatero yenu mukudika ntembeli ya Karunga wetu, morwa atwe twe ngatutungirango Hompa, Karunga wa Israel, yira momo aturawira hompa Sayires waPersia." ⁴ Vantu vamushirongo shino avaghupu unankondo wavantu vamu Judah; avarenkita vaJuda vatjire kutunga ntembeli. ⁵ Avafutu nka valipangero lyaPersia vadjonaure maghano ghavo. Evi ngoli kavavi ruwananga mushirugho shalipangero lya Sayires dogoro mulipangero lya Darius hompa wa Persia. ⁶ Palitameko lyalipangero lya hompa Ahasuerus avatjanga lirundiro lyakuhamena kuvatungi vamuJudah namu Jerusalem. ⁷ Mumayuva ghalipangero lya Artaxerxes va Bishlam, Mithredath,Tabeel novo vahaminino kwavo avatjangere hompa Artaxerxes wa Persia. Ntjangwatumwa yino kwayitjangire muliraka lya Aramaic ano pakuyivarura kuyitoroka. ⁸ Rehum mpititi yavo nakamutjangi wendi Shimshai avatjanga vya kuhamena kuJerusalem kwa hompa Artaxerxes murupe runo. ⁹ Mupangeli Rehum nakamutjangi Shimshai, ntani novo vahaminino kwavo, ovo vakaliro vapanguli namarenga ghamwe ghalipangero, vatungi muPersia, matimbi ghantundiliro ya Erech nagha ghamu Babiloni, ntani namatimbi ghantundiliro yaSusa (ndi po shi, va Elamitesi)-avatjanga ntjangwatumwa- ¹⁰ Avakupakerere navantu vamwe ovo aghupire munankondo Ashurbanipal mumandi ghavo avature mushitata sha Samaria, kumwe navantu vakuhupako ovo vakaliro muShirongo sha Utokero wa Mukuro wa Euphrates. ¹¹ Yino ndjo ntjangwatumwa oyo vatumine kwendi: " Kwa hompa Artaxerxes, vakareli voye, vantu vaShirongo sha Utokero wa Mukuro wa Euphrates, kunakutjanga vino ashi: ¹² Atwe kuna horo tu ku yivita ove hompa ashi vaJuda ovo vatundo muvirongo vyoye vimwe vaye muno vana yatura mu Jerusalem mbyo vana kutunga nkuru mbara yayidona ya vikotjangana. Vana mana kudika makuma nakutungurura ntateko dagho. ¹³ Hompa yiva ashi ntjene shi nkuru mbara yino vayidike ntani makuma ghayo ghapwe, vantu ngavashayeka kufuta kehe ushwi wamukatji kavampititi, nadimutero makura vino ngavi djonaghura shimbangu shamaliva shava hompa. ¹⁴ Weno morwa atwe twa limburukwa mo koye, ntani kapi tunahoro ngatumone vininke vyo vinadiro kukuwapera. Mbyo ngoli tuna kuvi kutuminina vino muku kutantera ¹⁵ ashi unakona kushana mbapira davakurona voye daumbangi naku dikushonga uyive shi yino nkuru mbara yayidona ya vikotjangana oyo ngayi djonaghuro va hompa na vapangeli vavirongo. Na kare kayiyitanga ma udito ghamangi kuvahompa navapangeli vavirongo. Vantu vamo vakalire udito kuvapangera. Yino ndjo konda yo vayi djonawilire nkuru mbara yinya vakavita vamu Babiloni. ¹⁶ Atwe kuna horo tukutantere ashi ntjene vayi tungurure nkuru mbara nakudika makuma ghayo, kapi ngauvhura kupangera shirongo sha Utokero wa Mukuro wa Euphrates. ¹⁷ Makura hompa atumu lilimbururo kwmupangeli Rehum na kamutjangi Shimshai navahameni vo vakaliro mu Samaria ntani navantu vakuhupako vo vakaliro kuShirongo shaUtokero wa Mukuro wa Euphrates ashi: "Mpora yikare nanwe". ¹⁸ Ntjangwatumwa you mwantumina vayivarurura nakuyitoroka kwande. ¹⁹ Ame kwatapa mpangero, makura mbyo vamona shi Jerusalem napakare ngoli yakalire kurwanitanga ghuna nkondo wa shina ghu hompa, ashi kwayura mo vakorokotji novo vakuyita maghudito. ²⁰ Vahompa vankondo kwapangera Jerusalem nka vakalire naghuna nkondo wavininke navintje muShirungo sha Utokero waMukuro wa Euphrates. Maushwi ghaku kupanga mu ghu hompa nadimutero kwavo kava vifutanga. ²¹ Weno, tapenu ngoli mpanero kovo vakafumu vashayeke kutunga yino nkuru mbara dogoro nganitape mpangero yande nka. ²² Ngoli taka mitenu mwasha vishuvilira vi. Nke vyo mupulitilira matjilito ghano ghakure dogoro ngava kantjunune ntjontjo yande? ²³ Opo vavarulire ntjangwatumwa ya hompa Artaxerxes kumeho ya Rehum, kamutjangi Shimshai, ntani navahameni vavo, makura ava yendi munkwangu ku Jerusalem nakuykatininika vaJuda vashayeke kudika nkuru mbara. ²⁴ Viruwana vya ntembeli ya Karunga mu Jerusalem avishaya dogoro mumwaka wauvviri walipangero lya Darius hompa wa Persia.