¹ un ombe ñamao Ananías, kú muhé ri éle ñamao Safiraa bendé un piaso ri erensia, ² éle kelá kú un patte ri burú (muhé éle a sabé) í a trée má uto patte pa ponelo aí pié ri má apóstoles. ³ Poro Pedro a chitía: "Ananías, ¿ pokke Satanás a yená kolasó sí pa bo mbilé a epiritu santo pa bo kelá kú un patte ri plesio ri tiela? ⁴ Miendla taba sí bendé ¿ akaso nú asendá ri bo? repué ri bendé tiela, ¿nú siguí siendo ri bo? ¿ kumo güe ke bo a pensá é kusa endi kolasó? bo a mbilé a má ombe nú, sinú a Rioso". ⁵ Kuchando é palabra, Ananías a kaí i a lungá miero a miní pó chochá endi tó lo ke a kuchá. ⁶ Má majaná a yegá ri flende, a ombobé éle, a kaggá éle pó juera pa entelá ⁷ Repué ri trilingó ora, muhé ri éle a lendrá sin sabé lo ke a pasá. ⁸ Pedro a chitía kú éle: "chitía si enú a bendé má tiela pó é kantirá." Éle a chitía. "Asina güe pó e kantirá." ⁹ Antonse Pedro a chitía kú ané: "¿ Kumo güe ke enú a poné ri akuédo pa probá epiritu ri Ño? Miná, má pié ri lo ke a enterrá maílo sí aí puetta, ané tán saká bo tambié. ¹⁰ Éle endi e momendo memo a kaí endi pié ri ané a repirá pó utimo be, má majaná a lendrá i ané a topetá kú éle muetto; ané a kaggá éle juela i ané a seputá éle jundo kú eposo ri éle. ¹¹ A miní un chochá ri miero pa tó má ilesia, i andi tó lo ke a kuchá tó e kusa. ¹² Un chochá ri señá kú marabiyaa taba pasá pó mano ri mpa apóstoles, tó anpe taba jundo aí portiko ri Salomón. ¹³ Poro narie taba kú baló pa jundá kú ané nú, poro tó má jende asé tené repeto ri ané endi teruño. ¹⁴ I má kreyende asé konbetí a Ño, pó chochá ri ombe i muhé , ¹⁵ ata pundo ke ané taba kaggá má jende chakoso pó kaya akostao endi balentiela kú kamiya, pa kuandi Pedro pasá sombla ri éle kaí endi aggú ri lo ke tá chakoso. ¹⁶ Tambié asé jundá un chochá ri jende ri uto teruño arereró ri Jerusalén, i a tré má chakoso kú tó má akongojao ri epiritu pueko i susio i tó ané sendá kulao. ¹⁷ Poro sumo saserdote ea lebandá, i tó má gende lo ke taba kú éle (ke sendá má saduseos); i ané yená ri selo ¹⁸ i ané a ichá mano a má apóstoles i a ichalo endi tramakuá. ¹⁹ Poro pó okurana un angél ri Ño a abrí puetta ri tramakuá i a trelo pa juela, i a chatía: ²⁰ "Un bae, paleno endi masiruma ri sioso i chitiá kú tó má jende má palabra ri é mbila" ²¹ Kuandi ané a kuchá é kusa, ané a lendrá endi masiruma ri Rioso pó amanesiá i a insiñá. Poro sumo saserdote i lo ke tá kú éle a miní, i a konboká konsilio, i tó má karrusiano ri teruño ri Israel, i ané a mandá a tré má apóstoles ri tramakuá. ²² Poro má chechelo ke bae a topetá kú ané nú endi tramakuáé a infommá: ²³ "Suto a topetá kú tramakuá selaó i bié empréñao i má chechelo endi puetta, poro kuandi suto a abrí tén ná nú lendro". ²⁴ Aora kuandi má kamaján ri masiruma ri Rioso i má plinsipales saserdote a kuchá e palabra, ané taba péplejo kú má apóstoles i ke tá salí ri é kusa. ²⁵ Antonse agguiéa miní i a chitiá: "Má ombe ke enú a meté endi tramakuá atá palao endi masiruma insiñando a má jende" ²⁶ Asina ke kamaján ri má chechelo a bae i a tré lo má, poro sin sokoyá, poro ané teneba miero ri jende pokke ané polé ndale kú piegra. ²⁷ Kuandi ané trelo, i a ponelo ri lande ri konsilio. Sumo saserdote a interrogá ané, ²⁸ chitiando: "Suto a kombesá kú enú pa nú endi é nombe, i toabiá, enú tá yená a Jerusalén kú é insiñansa, i kelé tré pola ri ombe pa andi suto". ²⁹ Poro Pedro i má apóstoles a lepondé: "Suto tén ke oberesé a Rioso en bé ri má ombe. ³⁰ Rioso tatá ri tatá suto a lebandá a Jesús, lo ke enú a matá, guindándolo endi un palo. ³¹ Rioso a esatá poniendolo aí mano rerecha kumo chelinjo i salbaró, pa ndá lependimiendo a Israél, i peddó ri pekaro. ³² Suto sendá perito ri é kusa, i tambié espiritu sando, é lo ke Rioso ndá a tó jende lo ke asé oberesé". ³³ Kuandi má jende ri konsilio a kuchá, ané a enbejuká i keleba matá a má apóstoles. ³⁴ Poro un Fariseo ñamao Gamaliel, piacha ri leí ke a sendá onrao pó tó teruño, a lebandá i a mandá pa saká má apóstoles pa juela pó un momendo. ³⁵ Antose éle a chitiá: "Ombe ri Israel paleno tañió lo ke enú tá asé kú é jende. ³⁶ Un tiembo. Teudas a lebandá kombesióke éle jüe agguié, u un numangó ri ombe sendá kumo kúalingonaná a jundá. Éle jüe i a kelá endi ná. ³⁷ Repué ri é ombe, Judas ri Galilea, a lebandá é má ría ri senso, i a yebá trá ri éle un chochá ri jende, éle tambié a lungá i tó má jende lo ke a oberesé éle jüe regao. ³⁸ Aora i a chitiá, apateno ri é má ombe i rejá ané tá solo, pokke si lo ke ané tá asé sendá ri ombe, tán kabá. ³⁹ Poro si sendá ri Rioso, enú sendá kapá ri a kabá kú é kusa nú; asina ke enú ata trompiá é kú Rioso". Asina ke ané a poné ri akkuedo. ⁴⁰ Antonse ané a ñamá a má apóstoles i a kujelo i a malpolialo i a mandálo pa nú chitiá má endi nombe ri Jesús i má apóstoles a bae. ⁴¹ Ané a salí ri konsilio kú jarochería pó sé mereserores ri sufrí pó é nombe. ⁴² Ri é memo ria endi relande, andi masiruma ri Rioso i ri possá endi possá ané a siguí insiñando i chitiando ri Jesús kumo Kristo.