¹ Akaró eka wartapehi te'kiche ã Capernaunña uwãri an tis aakerpé, toh peshma weshkrii ekama akaoña aakii. ² Akema we0ri atauwehrií, akaró che' chitirii, toh kosapo ya chani asken aahkertihii, Jesúsma aña'ró ti'kakii. ³ Akanskua arwã tis te' krii a ekaña pe'krii arwã archawã as, Pesh ka'lerii toh atukinerii. ⁴ Akanskua eka nebolertihi eka abriña pesh wriharishki, ekama awartukrii ata'wã achihii aekaña aakrii, akaró toalerwã toh, atapakuaña nebori ekaña, ekama monokrii toh wasá arwã archanawarii chrechiwaruri. ⁵ Pi fé ró chei, Jesús ti'kii toh arwa archanawarii: "Yea, pi warkuama ke ĩ pikachituwã". ⁶ Escribas tis chií aña chrechií achihrii pesh turusañá ameshkerurí: "¿Inkashki toh arwãma ñehí ĩnké? ¡Toh warkua ñahta! ⁷ ¿Taro eirosa toh warkua akachuí Patatishta pero eiruwá? ⁸ Jesúsmá waripé, arihií ã kuansaro toh eka ameshkrií asaaña akrí aekape. Eka ti'kakií: "¿Inkro ameshkersa ihi pi turusañá? ⁹ Iro tis eñasa? Ñahparí toh arwã archanowaro, "Pi warkuama ke inpikachituwá, ñahprá: Ishtakú, pi wãsa sukuhu, tahteshkú? ¹⁰ Akashkuá pawaí eilerpisa toh a tús ayerwã atapun akachuwa kukña warkuá kahpeshta", Eka ti'kií toh archanawaro: ¹¹ "Tasma ta'pikaawá paró: Sukuhu pi lechoí, naú pi kaoña". ¹² Ekama wãripe ishtakí sukuhí a lechoro, apaski toh akaoriñá krih awakiñá, akena ekalerma chiktirí aakrí wishkera gloria Patatishtaro, ñehra: "Untasma tis chani chamarnurí toh akenaro". ¹³ Ekama warki apaskí asoké, toh pesh wrihama te'kri ekañá, Ekaya kahchawishkuarurí. ¹⁴ Akashkuá Eka ateshkuama, Eka cheí Leví ró, Alfeo, ayerwã, achihiri toh ñahrii a ohá uwahitukerurii ama ti'kii: "Tarachahú". Ekama ta ishtaki arachihii. ¹⁵ Akanskua Jesús aaishkuama toh Leví e'waruriña, aoh uwa'ta tis we' chilerurii toh peshma warkua ishtalerii Jesús yó aaishkrii aracha'nata tis we'chirii, Ékama arachi'lerurii. ¹⁶ E'kakes toh escribama, Fariseoslerii, toh Jesús ró cherii aaishkii toh pesh warkua ishtayó a oh uwa'tayó. Ekama tikiri asu'nataró: "¿Akaró eka iris e'wasã toh aoh uwa'tayó toh pesh warkua ishtayó?" ¹⁷ E'kakes Jesús weshkuama iró tihkakii aekarowá: "Toh peshma tapuh kakachui apeshyó tohma tis chani médico, toh pesh archanawaperó ñe'lerwá untassi, tasma te'tahari arwanparó toh pesh eñaleri apesh warkua ishtaperó". ¹⁸ Toh Juan arachahtama toh Fariseori ayunaishkaishkrii, eka te'kera ye'rií: ¿Irish toh Juan asu'natama toh Fariseo asu'natari ayunaishkersa, pi asu'natama ayuna ishkertuwá?" ¹⁹ Jesús ma tihkii: "¿Arihlerti toh achihleri asawa sukuhlerya ayunaishkerti toh asenma atewata ekayó achihii? Akaro toh asenma kuaakerpé ekayó tohma ayunaishkertiíwá. ²⁰ Akaski tohchema te'kerpé toh asen karpeshpiché karaaki ekayó toh che'ripé, ekama ayuna ishkerpé. ²¹ Arwa as chani sukus'tuwá toh kawá we'kai toh akobama eña ta'ró. Akanski atawe'wai ayaspé ekaña awe'kai eña ta'ri akasnki kresh tishpé. ²² Arwá as chani to'na we'kaas achehtuwa toheña tahas asaaña achihií: Ki'wama, toh ato'nai atauhpé akawai toh ato'na tonshpé, toh odreswá, toh achihiña achahuwa to'na we'kai toh odres we'ka asaña". ²³ Toh Sábadoriche Jesús tohkechki tisma awawá tishkaña toh subakta ishkera uwehrií toh espigasí ã trigorí. ²⁴ Toh Fariseosma ti'kiri ekaro: "Chaũ, ¿Irish ishkaishkersa toí akaro tohma eñaí toh Sábadochẽ?" ²⁵ Ekama ti'kakií: "¿Pama tisnani aweshkertihí toh David ishkiro akashkua eka uwaro kií, eka toh arwãlerma ekayo akrí? ²⁶ ¿Inkashki tokisa Patatishta a kaoñá toh abiatarma paré sumorí, ekama tis kawishkí toh ekayo aakerurí?" ²⁷ Jesúsma ñehí: "Toh Sábadoma toh peshrish kaaí, toh pesh tis tahí a Sábadoí. ²⁸ Akashkua, toh arwã a yerwãma Señorrí, toh Sábado wahí".