9 ¹ Bihain namba 5 ensol i winim biugel bilong en. Mi lukim wanpela sta i stap long heven i pundaun kam daun long graun. Dispela sta i holim ki bilong hul i go daun na ino gat pinis bilong en. ² Em i opim hul we ino gat pinis bilong em, na bikpela smok i kam aut long dispela hul i olsem smok bilong bikpela paia. Bikpela smok i kam aut long dispela hul i mekim san na skai igo tudak. ³ Insait long dispela smok grasopa i kam aut long graun, na ol i gat strong olsem skopion bilong graun. ⁴ Ol i tokim ol long no ken bagarapim gras, o ol arapela grinpela bus samting na diwai, tasol ol i ken bagarapim ol man ino gat mak bilong God long pes bilong ol. ⁵ Ol ino kisim tok orait long kilim i dai ol dispela manmeri. Tasol ol i kisim tok orait long givim bikpela pen long ol insait long 5-pela mun tasol. Na pen bilong dispela samting bai i olsem posin bilong skopion i bagarapim wanpela man. ⁶ Long ol dispela taim ol manmeri bai i painim dai, tasol ol bai ino inap dai. Ol bai i gat bikpela laik long dai, tasol dai bai ino inap kisim ol. ⁷ Ol dispela grasopa i luk olsem ol hos ol i redim bilong igo pait. Samting olsem hat bilong king ol wokim long gol i stap long het bilong ol. Na pes bilong ol i oslem pes bilong ol man. ⁸ Het gras bilong ol i olsem het gras bilong ol meri, na tit bilong ol i olsem tit bilong laion. ⁹ Siot kapa bilong ol i olsem ol i wokim long aion. Na taim ol i pli, wing bilong ol i wokim nois olsem krai bilong planti karis na hos igo long pait. ¹⁰  Teil bilong ol i gat posin olsem teil bilong skopion, na long teil bilong ol i gat strong bilong bagarapim ol manmeri long 5-pela mun. ¹¹  Ensel bilong dispela hul i nogat pinis bilong em i lukautim ol olsem King. Nem bilong dispela ensel long tok ples Hibru em Abadon,na long tokples Grik em Apolion. ¹²  Nambawan taim nogut i kamap pinis. Lukim! Bihain long dispela samting tupela bikpela bagarap moa bai i kamap. ¹³  Namba 6 ensel i winim biugel bilong em, na mi harim wanpela nek i kam long 4-pela kom bilong alta ol i wokim long gol i stap klostu long God. ¹⁴  Dispela nek i toktok long namba 6 ensel husait i gat biugel na i tok, "Rausim ol 4-pela ensel mi kalabusim ol long bikpela wara Yufretis na ol i ken go fri." ¹⁵  Ol i bin lusim ol dispela 4-pela ensel igo fri long kilim namba 3 hap bilong ol manmeri. Ol dispela ensel i bin stap redi na wetim dispela aua, de, mun, na yia long kamap. ¹⁶  Namba bilong ol soldia husait i sinduan long hos i olsem 200-milion. Mi bin harim namba bilong ol. ¹⁷  Long driman bilong mi, mi lukim ol hos na ol man husait i sindaun long ol dispela hos olsem, siot kapa bilong ol i ret olsem paia, dakblu olsem smok na yelo olsem salfa ston. Ol het bilong ol hos i luk olsem het bilong ol laion, na paia, smok, na salfa i kam aut long maus bilong ol. ¹⁸  Wanpela tri hap bilong ol manmeri i dai long smok, paia, na salfa i kam aut long maus bilong ol. ¹⁹  Na strong bilong ol dispela hos i stap long maus bilong ol, na teil bilong ol i olsem teil bilong ol snek, na ol i gat het we i givim bagarap long ol manmeri. ²⁰  Ol arapela manmeri husait ino dai long ol dispela samting nogut, ol i no tok sori long pasin nogut ol i bin mekim. O ol i no lusim pasin bilong lotu long spirit nogut, na god giaman bilong gol, silva, bras, ston, na diwai samting i no gat ai long lukim, yau long harim, o lek bilong wokabaut. ²¹  Na tu ol ino tok sori long God long ol man ol i bin kilim na long ol sanguma pasin bilong ol, o god giaman ol i bin lotuim, o ol pasin pamuk we ol i bin mekim, na long ol samting we ol i bin stilim long ol arapela.