7 ¹ Bihain mi lukim 4-pela ensel i sanap long 4-pela hap kona bilong dispela graun, na ol i pasim strong win long kamap long 4-pela hap kona bilong dispela graun na long solwara, na long ol diwai. ² Mi lukim narapela ensel i kam antap long san kamap, dispela ensel i gat mak bilong God long em. Em i singaut strong long ol 4-pela ensel husait i bin kisim tok orait long bagarapim dispela graun na solwara. ³ Noken bagarapim graun, solwara na ol diwai inap mipela i putim mak long het bilong ol wokman bilong God pastaim. ⁴ Mi harim namba bilong ol lain manmeri husait i kisim pinis mak bilong God, em i olsem 144,000  bilong ol lain bilong Israel. ⁵ Insait long ol dispela lain, 12,000 manmeri bilong lain Juda, 12,000 lain manmeri bilong Ruben, 12,000 lain manmeri bilong Gad. ⁶ 12,000 lain manmeri bilong lain Asa, 12,000 lain manmeri bilong lain Naptali, 12,000 lain manmeri bilong lain Manase. ⁷ 12,000 lain manmeri bilong lain Simion, 12,000 lain manmeri bilong lain Livai 12,000 lain manmeri bilong lain Isaka, ⁸ 12,000 lain manmeri bilong lain Jebulun, 12,000 lain manmeri bilong lain Josep, na 12,000 lain manmeri bilong lain Benjamin i bin kisim mak pinis . ⁹ Bihain long ol dispela samting, mi lukim bikpela lain manmeri i planti tumas long man ino inap long kauntim ol i kam long olgeta ples na long olgeta lain manmeri bilong olgeta hap graun, na bilong olgeta kainkain tokples. Ol i sanap klostu long sia king long pes bilong Pikinini Sipsip. Ol i werim longpela waitpela klos na holim lip bilong pam diwai  long han bilong ol. ¹⁰  Na ol i bikmaus na singaut olsem, God bilong mipela i sindaun long sia king bilong em na Pikinini Sipsip i kisim bek mipela long pasin nogut. ¹¹  Olgeta ensel i sanap raunim sia king, na ol hetman na 4-pela wail abus olgeta i daunim ol yet igo daun tru na putim pes igo daun long graun long pes bilong God. Na ol i lotu long em., ¹²  Na ol i tok, "Tru tumas! Liptimapim nem bilong God igat olgeta strong. Givim biknem na glori long em. Na tok tenkyu long God igat gutpela tingting na save, em i save stap oltaim oltaim! I tru!" ¹³  Bihain wanpela hetman namel long ol i askim mi na i tok, "Ol lain i werim waitpela klos, ol i bilong wanem lain na ol i kam long wanem hap? ¹⁴  Na mi tokim em, "Bikman, mi no save," na em i tokim mi olsem, "Dispela ol man husait i bin kam aut long dispela taim bilong bikpela hevi. Ol i bin wasim klos bilong ol na mekim kamap waitpela insait long blut bilong Pikinini Sipsip bilong God. ¹⁵  Long dispela as, ol i stap klostu long sia king bilong God na ol i lotu long em long san na long nait insait long haus bilong em. Na man husait i sindaun long sia king bai i lukautim ol. ¹⁶  Olsem na ol bai i no inap long hangre gen long kaikai o nek bilong ol i no inap drai long wara gen. San bai i no inap kukim ol na paia tu ino inap kukim ol. ¹⁷  Dispela Pikinini Sipsip i stap namel long sia king bai i stap wasman bilong ol, na em bai lukautim ol na givim ol wara igat laip. Na God bai i rausim olgeta ai wara long ai bilong ol.