5 ¹ Bihain mi lukim dispela man i sindaun long sia king na long han sut bilong em. Em i holim wanpela buk ol i raitim insait na baksait wantaim na i igat 7-pela mak i pasim dispela buk. ² Mi lukim wanpela strongpela ensel i singaut strong na i tok, "Husait inap tru long opim dispela buk na brukim ol dispela mak?" ³ I nogat wanpela man long heven o antap long graun o ananit long graun husait inap long opim dispela buk o long ritim. ⁴ Mi krai bikpela long wanem ino gat wanpela man inap long opim dispela buk o long ritim. ⁵ . Tasol wanpela bilong ol hetman i tokim mi, "Noken krai. Lukim! Dispela Laion bilong lain Judah, na tumbuna bilong Devit, em i win pinis. Em inap long brukim 7-pela mak na opim dispela buk." ⁶ Na mi lukim wanpela Piknini Sipsip i sanap wantaim ol hetman namel long sia king na ol 4-pela samting igat laip. I luk olsem ol i bin kilim dispela Pikinini Sipsip. Em igat 7-pela kom na 7-pela ai. Dispela i makim 7-pela spirit bilong God we em i bin salim igo aut long olgeta hap graun. ⁷ .Em i go kisim dispela buk long han sut bilong dispela man husait i sindaun long sia king. ⁸ Taim Pikinini Sipsip i kisim dispela buk, ol 4-pela samting igat laip na 24-pela hetman i daunim ol yet long pes bilong em. Wanwan bilong ol i gat gita na ol gol dis i pulap wantaim naispela smel smuk, i makim prea bilong ol bilip manmeri. ⁹ Ol i singim nupela song olsem, " Yu inap tru long brukim ol mak na opim dispela buk. Long wanem, ol i bin kilim yu dai na long blut bilong yu tasol, yu baim bek olgeta lain manmeri, wantaim kainkain tokples, na long olgeta hap graun i kam long God. ¹⁰  Yu mekim ol i kamap lain manmeri bilong God na ol i kamap ol pris bilong mekim wok bilong God, na ol bai bosim dispela graun." ¹¹  Bihain mi lukim na harim nek bilong ol planti ensel i stap raunim sia king, na ol 4-pela samting igat laip, na ol hetman. Namba bilong ol i olsem 10 tausen bilong 10 tausen na tausen bilong tausen. ¹²  Ol i singaut wantaim wanpela nek olsem, " Dispela Pikinini Sipsip ol i bin kilim, em inap tru long kisim biknem, blesing, glori, sawe, strong na pawa." ¹³  Mi harim olgeta samting God i bin mekim i stap long heven na antap long graun na ananit long graun na insait long solwara. Ol i tok aut olsem."Givim Biknem, glori na pawa igo long dispela man husait i sindaun long sia king, na igo long dispela Pikinini Sipsip, long bosim oltaim oltaim. ¹⁴  Orait, 4-pela samting igat laip i tok,"I tru!" Na ol hetman i daunim ol yet na lotu.