22
1
Bihain dispela ensel i soim mi wara bilong laip, em i klin olsem skai. Em i ran i kam aut long sia King bilong God na bilong Pikinini Sipsip bilong em,
2
i go namel long dispela bikpela taun. Long tupela sait bilong dispela wara i gat diwai bilong laip, na dispela diwai i save karim 12-pela kain kaikai bilong em, na i save karim kaikai long olgeta mun. Lip bilong dispela diwai bai i mekim orait olgeta manmeri bilong olgeta hap ples.
3
Na bagarap bai i no moa stap. Na sia king bilong God na Pikinini Sipsip bai i stap insait long bikpela taun, na ol wokman bilong em bai i wok long em.
4
Ol bai i lukim pes bilong em, na nem bilong em bai i stap long pes bilong ol.
5
Tudak bai i no stap moa. Na lait bilong lam na lait bilong san bai i no stap moa, bilong wanem bikpela lait bilong God bai i lait antap long ol. Na ol bai i stap oltaim oltaim.
6
Dispela ensel i tokim mi olsem, "Ol dispela samting God i soim yu i tru olgeta na bai i kamap. Bikpela, husait i God bilong ol spirit bilong ol profet, i salim ol ensel bilong em long soim ol wok manmeri bilong em long ol samting we bai i kamap klostu taim."
7
"Lukim! Bai mi kam klostu taim! Husait ol manmeri i bihainim tok i stap long dispela tok profet", ol i ken amamas.
8
Mi Jon, mi dispela man husait i harim na lukim ol dispela samting. Taim mi harim na lukim ol dispela samting, mi brukim skru long lek bilong dispela ensel husait i soim mi ol dispela samting, long mi bai i lotu long em.
9
Na em i tokim mi, "Yu noken mekim olsem! Mi wankain wokman olsem yu na ol arapela profet,na wankain tu olsem ol man husait i save bihainim tok bilong God. Em God wanpela tasol bai yumi lotu long em!"
10
Na em i tokim mi, "Noken pasim ol tok i stap long dispela buk bilong tok profet, bilong wanem taim i kamap klostu pinis.
11
Long man i save mekim sin, larim em i go moa long mekim sin,, na long man i save mekim stretpela pasin, larim em i go moa long mekim stretpela pasin. Long man husait i save stap holi, larim em i ken stap holi.
12
"Harim! Bai mi kam klostu taim. Na bai mi bringim pei bilong mi i kam wantaim long givim i go long wanwan manmeri long wanem pasin ol i mekim.
13
Mi yet mi Alpa na Omega, na bai mi stap paslain, na bai mi stap las.
14
Ol stretpela lain manmeri bai i kisim tok orait long kaikai long dispela diwai i gat laip, na bai ol i go insait long dua bilong bikpela taun bilong God.
15
Ol lain husait i stap autsait, em ol lain husait i save mekim pasin saguma,na pasim pamuk, na pasin bilong kilim man, na pasin bilong lotuim god giaman, na olgeta husait i save laikim pasin bilong giaman.
16
Mi Jisas, mi bin salim ol ensel bilong mi i kam long ol sios long tokaut long ol dispela samting. Mi lain bilong pikinini bilong king Devit na mi dispela sta i save lait long moning".
17
Spirit bilong Bikpela na dispela meri bilong marit i tok, "Kam!" Husait man i harim i ken tok, "Kam!" Husait nek drai long wara, larim em i kam, na husait i laikim tru long dring, kam long mi na bai mi givim em dispela wara i gat laip.
18
Mi tokim olgeta lain manmeri husait i harim tok i stap long dispela tok profet olsem: Sapos ol i putim narapela tok i go antap long tok bilong God, bai God i givim ol, ol hevi we ol i raitim long dispela buk.
19
Sapos wanpela man i rausim ol tok insait long dispela tok profet , bai em i no inap kisim kaikai long dispela diwai i gat laip, na bai God i rausim em long dispela bikpela taun bilong God we ol i raitim long dispela buk.
20
Dispela man husait i tokaut long ol dispela samting, em i tok, "Yes! Mi bai kam klostu taim. "I tru! Bikpela Jisas, kam!
21
Marimari bilong Bikpela Jisas Krais i ken stap wantaim yupela olgeta. I tru.