17 ¹ God Yawe, harim prea bilong mi. Putim yau na harim singaut bilong mi na helpim mi. Long maus bilong mi, mi no save giaman long beten olsem na yu harim prea bilong mi. ² Bai yu helpim mi na bai mi winim kot. Yu save lukim wanem pasin em i stret. ³ Sapos yu kam long mi long nait, na yu skelim bel bilong mi, yu no inap lukim tingting nogut i stap long mi, na mi no inap toktok long en. ⁴ Tok i kam long maus bilong yu i banisim mi long mi noken bihainim pasin bilong kros na pait. ⁵ Mi save wokabaut long rot bilong yu na lek bilong mi i no save abrus. ⁶ Mi singaut long yu na yu bekim prea bilong mi, God, yu harim mi taim mi toktok. ⁷ Long gutpela pasin bilong yu, soim bikpela marimari bilong yu long mipela na helpim mipela long hait long ol birua ⁸ Lukautim mi olsem yu save lukautim ai bilong yu,na haitim mi aninit long han bilong yu. ⁹ long ai bilong ol man nogut husait ol i bagarapim mi, na ol birua husait ol i banisim mi. ¹⁰ Ol i no save marimari long wanpela man, ol i save toktok tasol long apim nem bilong ol yet. ¹¹ Ol i bihainim lek bilong mi na banisim mi na was long putim mi i go daun long graun. ¹² Ol i olsem laion i laik kilim abus na i olsem laion i hait i stap long bus. ¹³ God Yawe, kirap na pait long ol birua bilong mi. Kisim bainat bilong yu na pait long ol birua na kisim bek mi long ol pasin nogut. ¹⁴ God Yawe, kisim bek mi long han bilong ol man i save bungim ol samting bilong graun, na bai yu laikim tumas long kisim ol gutpela samting , ol bai i gat planti pikinini na bai ol i givim olgeta gutpela samting bilong ol long ol pikinini bilong ol. ¹⁵ Taim mi lusim slip na kirap na lukim yu, mi lukim stretpela pasin bilong yu na mi amamas.