110 ¹ God Yawe i tok long Masta bilong mi, "Sindaun long han sut bilong mi, inap mi mekim ol birua bilong yu i mas kam ananit long lek bilong yu." ² God Yawe bai holim stik bilong strongpela pawa long maunten Saion na bai yu bosim ol birua bilong yu. ³ Ol pipol bilong yu bai bihinim yu long holi bilas long laik bilong ol yet long dei bilong pawa bilong yu na ol yangpela man tu bai kirap long bik moning long helpim yu olsem wara long gras. ⁴ God Yawe i tok aut pinis na i no inap long senis, "Yu pris oltaim oltaim, olsem pasin bilong Melsisedek" ⁵ Bikpela i stap long han sut bilong yu. Em bai i kilim ol king long taim na dei belhat bilong em i kirap. ⁶ Em bai skelim olgeta kantri, em bai pulapim ples bilong pait wantaim ol dai man, em bai kilim olgeta lida bilong olgeta kantri long graun. ⁷ Em bai drin long liklik wara long rot na em bai i apim het i go antap long soim olsem em i winim pait.