4 ¹ Olsem na ol brata bilong mi, mi save laikim yupela na laik tru long lukim yupela. Yupela em amamas bilong mi na prais mi winim. Long dispela rot yupela i mas sanap strong insait long Bikpela,ol gutpela poroman. ² Mi askim yu Iodia na mi askim yu Sintike long sanap long wanpela tingting tasol insait long Bikpela. ³ Tru tumas, mi laikim olsem yupela ol tru wanwok bilong mi i mas helpim ol dispela meri. Ol i karim hevi wantaim mi long mekim wok bilong Bikpela i go moa yet. Na tu wantaim Klemen na ol narapela wanwok bilong mi husait nem bilong ol i stap long Buk bilong Laip. ⁴ Amamas insait long Bikpela olgeta taim. Na me tok gen amamas insait long Bikpela. ⁵ Larim ol man i ken luksave long ol gutpela pasin bilong yu long wanem Bikpela i stap klostu. ⁶ Noken wari long wanpela someting. Long olgeta something, beten na askim wantaim tok tenkyu i go long God. Larim God i ken luksave long ol askim bilong yu. ⁷ Na bel isi bilong God we em i winim tingting bilong man, i ken banasim bel na tingting bilong yupela insait long Krais Jisas. ⁸ Long pinisim tok, ol brata, wanem samting em i tru, wanem samting em inap long kisim biknem, wanem samting em i stret, wanem samting em i nogat asua, wanem samting em i naispela, wanem samting em i gutpela luksave long em, sapos i gat wanpela samting em i gutpela olgeta, sapos igat wanpela samting inap long kisim bik nem orait yupela i mas tingting long ol dispela. ⁹ Ol samting yupela i bin lainim na kisim, na harim na lukim insait long mi, yupela i mas mekim na God bilong bel isi bai stap wantaim yupela. ¹⁰ Mi amamas tumas long Bikpela long wanem nau, yupela i tingim mi gen. Trutru, yupela i save tingting long helpim me bipo tasol nogat rot olsem na yupela i no helpim mi. ¹¹ Mi i no tok olsem long tokim yupela olsem mi sot long wanpela samting. Mi bin lainim long amamas long wanem samting mi gat long en long olgeta taim. ¹² Mi save long kamap olsem man i nogat planti na man i gat planti. Long olgeta rot na long olgeta samting, mi bin painim aut rot bilong kisim kaikai o stap hangre na long i gat planti o ino gat planti. ¹³ Mi i ken mekim olgeta samting insait long Krais husait i save strongim mi. ¹⁴ Tasol, yupela i mekim gut long karim ol hevi bilong mi wantaim. ¹⁵ Yupela ol lain Filipai i save olsem long stat bilong gutnius, Taim mi lusim Mesedonia, i nogat wanpela Sios i save sapotim mi long pasin bilong givim na kisim,yupela tasol i save mekim. ¹⁶ Na tu taim mi i bin stap longTesalonika, yupela save helpim mi long ol nid bilong mi planti taim. ¹⁷ Ino olsem mi painim rot bilong kisim planti presen, nogat. Mi laik lukim wanem samting God i ken givim yu taim yu mekim olsem. ¹⁸ Mi bin kisim olgeta samting na planti moa tu. Mi bin kisim ol samting yu i bin salim i kam long Epaproditus long mi. Ol dispela samting em i olsem gutpela smel na gutpela ofa we God i laikim na hamamas long en. ¹⁹ God bilong mi bai inapim olgeta nid bilong yupela , wantaim ol gutpela samting bilong en, insait long Biknem bilong Krais Jisas. ²⁰ Nau long God em i Papa bilong yumi, bai em i ken kisim biknem oltaim oltaim. I tru. ²¹ Toktok amamas long olgeta bilip manmeri insait long Krais Jisas. Ol brata husait i stap wantaim mi i salim tok amamas long yupela tu. ²² Olgeta bilip manmeri long hia i tok amamas long yupela. na ol hauslain bilong Sisa tu i tok amamas long yupela. ²³ Larim marimari bilong Bikpela Jisas Krais i ken stap wantaim spirit bilong yupela.