6 ¹ Taim Sanbalat, Tobia na Gesem em ol lain Arabia wantaim ol arapela lain birua bilong mipela i harim olsem mi i wokim banis gen na stretim gut, tasol mi i no wokim bikpela dua long ples bilong kam insait yet, ² Sanbalat na Gesem i salim tok i kam long mi na i tok, " Yu mas kam na bungim mipela long Ono wanpela ples i stap daun." Tasol ol i bin tingting long bagarapim mi. ³ Mi salim ol man bilong karim tok i go na tokim ol olsem, " Mi i mekim bikpela wok tru olsem na mi bai i no inap long kam daun. Bilong wanem na wok bilong mi i stap yet na bai mi lusim na kam daun long bungim yupela?" ⁴ Ol i salim wankain tok i kam long mi 4-pela taim tasol mi i bekim tok long ol wankain tasol. ⁵ Sanbalat i salim ol man bilong karim tok raun i kam long mi 5-pela taim wantaim pas em i holim long han bilong em. ⁶ Na em i raitim olsem, "Stori i go long olgeta hap kantri na wankain tok tasol Gesem i bin wokim na i tok olsem, yu na ol lain bilong Juda i bin pasim tok long pait olsem na yu i wokim banis gen. Long dispela stori, ol i tok olsem yu i laik kamap king bilong ol. ⁷ Yu bin makim ol profet long tokaut long nem bilong yu long Jerusalem na tok olsem, ' I gat wanpela king i stap long Juda!' Yu mas save olsem king bai i harim ol dispela stori. Olsem na yupela i mas kam na yumi toktok wantaim." ⁸ Na mi bekim tok i go long em olsem, " I nogat kain ol samting i bin kamap olsem yu tok long em, yu yet i kamapim long bel bilong yu." ⁹ Ol i laik mekim mipela pret na ol i ting olsem, " Ol bai rausim han bilong ol long wok na wok bai i no inap pinis." Tasol nau, God, plis inap bai yu strongim han bilong mi long wok. ¹⁰ Mi i go long haus bilong Semaia pikinini man bilong Dilaia, pikinini man bilong Mehetabel husait i stap kalabus long haus na em i tok, "Yumi mas i go bung wantaim long haus bilong God, insait long tempel na pasim dua long wanem ol bai i kam long kilim yu. Ol bai i kam long kilim yu long biknait." ¹¹ Na mi bekim tok olsem," kain man olsem mi inap ranawe? Inap man olsem mi i go insait long tempel bilong sevim laip bilong em yet? Bai mi i no inap i go insait!" ¹² Mi luksave olsem em i no God husait i bin salim em tasol Tobia na Sanbalat i bin baim em long mekim sampela tok giaman long mi. ¹³ Ol i baim em long mekim mi pret na bihainim tok bilong em na mekim mi sin, long wanem ol i laik bagarapim nem bilong mi na semim mi. ¹⁴ God bilong mi, tingim Tobia na Sanbalat na olgeta wok ol i wokim na tu tingim profet meri Noadia na olgeta arapela profet husait i mekim mi pret. ¹⁵ Olsem na banis i bin pinis long 25 dei bilong mun bilong Elul, bihain long 52 dei. ¹⁶ Taim ol lain birua bilong mipela i harim na olgeta kantri i stap klostu i lukim dispela, ol i pret na pundaun bikpela tru long ai bilong ol yet. Long wanem ol i save olsem God i helpim mipela long pinisim olgeta wok. ¹⁷ Long dispela taim ol bikman i gat gutpela nem long Juda i salim planti pas i go long Tobia na ol pas bilong Tobia i kam long bek long ol. ¹⁸ I gat planti lain manmeri bilong Juda i bin tok promis long em long wanem em i tambu man bilong Sekania, pikinini man bilong Ara. Pikinini man bilong em Jehoanan i maritim pikinini meri bilong Mesulam husait i pikinini man bilong Beresia. ¹⁹ Ol i tokim mi long ol gutpela pasin bilong em na tokim em long ol toktok bilong mi. Tobia i bin salim ol pas i kam long mekim mi pret.