4 ¹ Taim olgeta manmeri i brukim wara Joden pinis, God Yawe i tokim Josua. ² "Makim 12-pela man namel long ol manmeri, wanwan man bilong wanwan haus lain. ³ Na tokim ol olsem, "Kisim 12-pela ston namel long wara Joden long hap drai graun ol pris i bin sanap long em na bai yu kisim i go na putim long ples yu bai slip long en long nait." ⁴ Na Josua i singautim 12-pela man husait em i bin makim long ol hauslain bilong ol Israel, wanpela long wanwan hauslain. ⁵ Josua i tokim ol, "Go bihain long bokis kontrak bilong God, Yawe God bilong yupela taim yupela i brukim namel bilong wara Joden. Wanwan bilong yupela bai apim ston na karim long solda bilong yupela, inap long namba bilong ol manmeri long hauslain bilong Israel. ⁶ Dispela bai i kamap olsem mak bilong ol pikinini bilong yupela long bihain, taim ol i askim na tok, wanem em as bilong dispela ston long yu? ⁷ Na bai yu tokim ol olsem, 'Wara Joden i bin bruk long namel, taim bokis kontrak bilong God Yawe i go pas na wara Joden i bruk long namel taim ol i abrusim wara Joden. Olsem na dispela ston bai i kamap mak bilong ol manmeri long Israel oltaim."' ⁸ Ol manmeri bilong Israel i mekim olsem Josua i tokim ol. Ol i kisim 12- pela ston long namel bilong wara Jodan, olsem God Yawe i tokim Josua. Ol i putim ston long namba bilong ol manmeri long hauslain bilong ol Israel. Ol i kisim ol ston i go wantaim long hap ol i bin taitim sel na stap long em. ⁹ Na Josua i putim 12-pela ston namel long wara Jodan, long hap ol pris bin putim lek mak, taim ol i karim bokis kontrak na sanap long en. Mak long dispela hap i stap i kam inap nau. ¹⁰ Ol pris i karim bokis kontrak na sanap namel long wara Joden i stap inap God Yawe i tokim Josua long tokim ol manmeri em i pinis, wantaim ol tingting Moses i tokim Josua. Ol manmeri i hariap na i brukim wara Joden. ¹¹ Taim olgeta manmeri i brukim wara Joden pinis, pris i karim bokis kontrak bilong God Yawe na i go pas long ol. ¹² Ol hauslain bilong Ruben, ol hauslain bilong Gad na ol hap hauslain bilong Manase i abrusim ol manmeri bilong Israel na i mekim kamap bikpela ami, olsem Moses i bin tokim ol. ¹³ Olsem klostu 40,000 man i kisim ol samting bilong pait na ol i go pas long pait bilong God Yawe, ol i pait long ples daun bilong Jeriko. ¹⁴ Long dispela taim God Yawe i mekim Josua i kamap bikpela man tru long ai bilong ol Israel. Na ol i litimapim Josua wankain olsem ol i bin litimapim Moses long taim bilong em. ¹⁵ Na God Yawe i tokim Josua olsem, ¹⁶ "Tokim ol pris, husait i karim gutpela toktok bilong bokis kontrak long ol i mas kam antap na go autsait long wara Joden." ¹⁷ Olsem na Josua i tokim ol pris," Kam antap autsait long wara Joden." ¹⁸ Taim ol pris i kisim bokis kontrak i kam autsait long wara Joden, ol i apim lek bilong ol i kam autsait long drai graun na wara Joden i kambek na ron wankain olsem em i save ron bipo, bihain long 4-pela dei. ¹⁹ Ol manmeri i kam aut long wara Joden long namba 10-dei bilong namba 1 mun.Na ol i stap long Gilgal, long hap san kamap bilong Jeriko. ²⁰ Na 12-pela ston ol i kisim i kam aut long wara Joden, Josua i kisim na lainim antap long Gilgal. ²¹ Em i tokim ol lain manmeri long Israel olsem." Bihain ol tumbuna pikinini bilong yupela i askim ol papa bilong yupela na i tok olsem, wanem em as bilong dispela ston?" ²² Tokim ol pikinini bilong yupela olsem, em i ples ol Israel i bin brukim wara Joden long drai graun. ²³ God Yawe, em God bilong yu i draim wara Joden taim yu brukim, wankain tasol God Yawe i bin mekim long solwara Retsi, taim mipela i brukim na i kam. ²⁴ Olsem na olgeta manmeri bilong graun i mas save long han bilong God Yawe i strongpela na yupela bai litimapim God Yawe, God bilong yupela oltaim."