3 ¹ Joshua i kirap long moning taim tru na em i go wantaim ol lain manmeri bilong Israel long taun Sitim. Em wantaim ol lain manmeri bilong Israel i kamap long wara Joden na ol i wokim sel haus na stap long hap na bihain bai ol i brukim wara na i go long hapsait bilong wara. ² Bihain long tripela dei, ol ofisa i go namel long kem, ³ na ol i givim oda long ol manmeri olsem,"Taim yupela i lukim ol pris bilong ol lain Livai i karim bokis kontrak bilong God Yawe, God bilong yupela, yupela i mas lusim dispela ples na bihainim ol. ⁴ I mas i gat spes namel long yu na long bokis kontrak samting olsem 2,000 mita. Na noken kam klostu long em olsem na yu bai lukim wanem rot long i go long wanem bipo yupela i no bin i go long en." ⁵ Josua i tokim ol manmeri olsem, "Mekim pasin blong klinim yupela yet tumoro na God Yawe bai mekim ol mirakel namel long yupela." ⁶ Orait Josua i tokim ol pris, "Apim bokis kontrak na i go pas long ol manmeri," Olsem na ol pris i apim Bokis Kontrak na i go pas long ol manmeri. ⁷ God Yawe i tokim Josua olsem, "Long dispela dei bai mi mekim yu i kamap bikman long ai bilong ol manmeri bilong Israel. Na ol bai save olsem mi bin stap wantaim Moses, wankain tasol bai mi stap wantaim yu." ⁸ Yu bai givim oda long ol pris long ol bai karim bokis kontrak. "Taim ol i kamap long arere bilong wara Joden, ol i mas sanap isi insait long wara Joden." ⁹ Olsem na Josua i tokim ol lain manmeri bilong Israel olsem. "Kam long hia na harim, wanem tok God Yawe God bilong yupela bai toktok. ¹⁰ Na long dispela yupela bai i save olsem God i stap laip i stap namel long yupela em bai kisim yupela i go pas long ol Kenan,ol Hit, ol Hiv, ol Peris, ol Girgas, ol Amor na ol Jebus. ¹¹ Lukim, bokis kontrak bilong God Bikpela bilong olgeta hap graun i go paslain long yupela na i stap namel long wara Jorden. ¹² Nau makim 12-pela man long 12-pela lain bilong Israel. Makim wanpela man long wanwan lain. ¹³ Taim lek bilong ol pris i karim bokis kontrak bilong God Yawe Bikpela bilong olgeta graun i tasim Wara Joden, wantu tasol wara Joden bai i pinis olgeta na wara i save kam daun long antap i no inap ron i go daun. Na wara bai bung long wanpela hap." ¹⁴ Olsem na taim ol manmeri i redi long brukim wara Joden, ol pris i kisim bokis kontrak i mas i go paslain long ol. ¹⁵ Na taim ol dispela lain i karim bokis kontrak i kamap long wara Joden na lek bilong ol i go insait long arere bilong wara, taim bilong kisim kaikai olsem na wara Joden i tait tru. ¹⁶ na ol wara i kam daun long antap i go bung long wanpela hap. Na wara i stop long longwe hap na i no i kam moa long Adam dispela bik taun i stap klostu long Saretan na i go daun olgeta long sol wara Negev, sol wara i gat planti sol long en. Na ol manmeri i brukim wara klostu long Jeriko. ¹⁷ Ol pris i karim bokis kontrak bilong God Yawe i sanap long drai graun namel long wara Joden inap olgeta manmeri bilong Israel i wokabaut i go hapsait long drai graun.