24 ¹ Na Josua i bungim olgeta lain manmeri bilong Israel long taun Sekem na singautim ol hetman bilong Israel, lida bilong ol, ol bikman bilong ol na ofisa bilong ol na ol i go sanap long ai bilong God Yawe. ² Josua i tokim olgeta manmeri olsem, ''God Yawe, God bilong Israel, i tok, 'Ol tumbuna bilong yupela bipo i stap hapsait long Wara Yufretis. Tera, papa bilong Abram na papa bilong Naho na ol narapela tumbuna bilong yupela i bin lotu long ol god giaman. ³ Tasol mi bin kisim papa bilong yupela i kamaut long hapsait bilong Wara Yufretis na kisim em i kam long graun Kenan na givim em planti tumbuna lain manmeri long pikinini man bilong em Aisak. ⁴ Orait, long Aisak mi givim em Jekop na Iso. Mi givim ol liklik maunten kantri sait bilong Seir long Iso i ken kisim, tasol Jekop na ol pikinini bilong em i go daun long Isip. ⁵ Mi salim Moses na Aron i go long Isip na mi mekim nogut na bagarapim tru ol manmeri bilong Isip wantaim ol kain hevi. Bihain long dispela, mi kisim yupela i kamaut. ⁶ Mi kisim ol tumbuna lain bilong yupela i kamaut long Isip na ol i kam long Solwara Retsi. Ol Isip i ronim ol wantaim karis na hos i kam olgeta long Solwara Retsi. ⁷ Taim ol tumbuna lain bilong yupela i singaut long God Yawe, em i mekim tudak i kamap namel long yupela na ol Isip. Em i mekim solwara i kam antap long ol na karamapim ol. Yupela i bin lukim ol samting mi bin mekim long Isip. Na yupela i bin stap long ples wesan nating longpela taim tru. ⁸ Mi kisim yupela i kam long graun bilong Amor, husait i stap long narapela sait bilong Jodan. Ol i pait long yupela na mi bin putim ol birua long han bilong yupela. Mi bagarapim ol na yupela i kisim graun bilong ol. ⁹ Na Balak, pikinini man bilong Sipo, king bilong Moap, i kirap na pait long yupela Israel. Em i singautim Balam pikinini man bilong Beo na salim em long mekim toktok nogut long bagarapim yupela. ¹⁰ Tasol mi no bin harim toktok nogut bilong Balam, nogat, mi mekim em i mekim gutpela toktok bilong helpim yupela. Na mi kisim bek yupela long han bilong Balam. ¹¹ Yupela i go abrusim Joden na kamap long Jeriko. Ol lida bilong Jeriko i pait wantaim yupela, wantaim ol Amor, ol Peres, ol Kenan, ol Hit, ol Girgas, ol Hiv na ol Jebu. Mi givim yupela strong long winim ol na putim ol i kam aninit long yupela. ¹² Mi salim honet i go pas long yupela, na rausim dispela tupela king bilong Amor i kam long han bilong yupela na olgeta dispela ol samting i no kamap long bainat o long strong bilong bunara bilong yupela. ¹³ Mi givim yupela graun yupela i no bin wok long en na ol biktaun yupela i no wokim na nau yupela i stap long en. Yupela kaikai pikinini bilong diwai wain na oliv em ol samting yupela i no bin planim long han bilong yupela.' ¹⁴ Nau yupela mi mas pret long God Yawe na lotu long em wantaim olgeta stretpela pasin na bilip, rausim olgeta ol giaman god, ol tumbuna lain bilong yupela i bin lotu long en hapsait long Yufretis na insait long Isip na lotu long God Yawe. ¹⁵ Sapos yupela i no laik lotu long God Yawe, orait yupela i tokaut nau husait yupela i laik lotu long em, dispela ol god giaman bipo tumbuna lain i bin lotu long en long Yufretis o ol god giaman bilong Amor, nau dispela graun bilong ol yupela stap long en. Tasol mi wantaim ol femili bilong mi, bai mipela i lotu long God Yawe tasol.'' ¹⁶ Ol manmeri i bekim tok olsem, ''Bai mipela i no inap givim baksait long God Yawe na long lotu long ol god giaman, ¹⁷ long wanem em God Yawe, God bilong mipela husait i bin kisim mipela na ol lain tumbuna i kam aut long graun bilong Isip, kamaut long banis kalabus na mipela i lukim em i mekim ol bikpela mirakel na em i lukautim mipela gut tru long olgeta wokabaut mipela i bin go namel long olgeta kantri. ¹⁸ Na God Yawe i bin go pas long mipela olgeta manmeri, wantaim ol lain Amor husait i sindaun long dispela graun. Olsem na mipela tu bai i lotu long God Yawe, em God bilong mipela.'' ¹⁹ Tasol Josua i tokim ol manmeri olsem, ''Yupela i no inap lotu long God Yawe, bilong wanem em i holi na stretpela God, em i God bilong tingting nogut na em i no inap rausim ol pasin nogut na sin bilong yupela. ²⁰ Sapos yupela i givim baksait long God Yawe na lotu long ol narapela god, bai em i tanim na mekim nogut long yupela. Em bai bagarapim yupela bihain long em i mekim gut long yupela.'' ²¹ Tasol ol manmeri i tokim Josua olsem, ''Nogat, mipela bai i lotu long God Yawe" ²² Na bihain Josua i tokim ol manmeri olsem, ''Yupela yet i tokaut pinis na yupela i promis bai yupela i lotu long God Yawe tasol,'' orait na ol i tok, ''Yes em tok mipela i mekim long maus bilong mipela yet.'' ²³ ''Nau yupela rausim ol dispela ol narapela god bilong narapela hap i stap wantaim yupela na tanim bel i go long God Yawe, em i God bilong ol Israel.'' ²⁴ Ol manmeri i tokim Josua olsem, ''Bai mipela i lotu long God Yawe, God bilong mipela. Bai mipela i harim tok bilong em tasol.'' ²⁵ Long dispela de long taun Sekem Josua i mekim wanpela strongpela kontrak wantaim ol manmeri. Em i givim ol dispela lo long ol i mas bihainim. ²⁶ Josua i raitim olgeta dispela tok bilong lo long buk bilong God. Em i kisim ol bikpela ston na sanapim i go antap aninit long diwai ok i stap klostu long haus sel bilong God Yawe. ²⁷ Josua i tokim olgeta manmeri olsem, ''Lukim dispela ol ston bai i stap strong bilong autim tok wantaim mipela. Em i gat olgeta tok God Yawe i tokim yumi. Olsem bai em i stap witness wantaim yumi, yupela i noken giamanim God bilong yupela.'' ²⁸ Olsem na Josua i salim ol manmeri i go long graun bilong wan lain bilong ol yet. ²⁹ Bihain long dispela ol samting Josua pikinini man bilong Nun, wok boi bilong God Yawe, em i stap inap 110 yia na em i dai. ³⁰ Ol i planim em namel long boda bilong mak bilong graun bilong ol wan lain bilong em, long Timna Sera, em i stap long liklik maunten kanntri bilong Efraim, long hap not bilong Maunten Gas. ³¹ Olgeta manmeri bilong Israel i lotu long God Yawe long taim bilong Josua i stap lida na ol i lotu yet long God taim ol narapela hetman husait i kamap bihain long Josua, ol dispela hetman i lukim planti samting God Yawe i bin mekim long helpim ol Israel. ³² Ol manmeri bilong Israel i kisim bun bilong Josep i kamaut long Isip na ol i planim long Sekem, long liklik hap graun Jekop i bin baim long ol pikinini man bilong Amor, papa bilong Sekem. Em i bin baim long 100 silva con na em kamap olsem samting bilong ol tumbuna lain pikinini bilong Josep. ³³ Eleasar pikinini man bilong Aron tu i dai. Ol i planim em long Gibea, biktaun bilong Finias pikinini man bilong em, long wanem ol i bin givim long em. Em i stap long liklik maunten ples bilong Efraim.