13 ¹ Nau Josua i kamap lapun pinis na God Yawe i tokim em, ''Yu lapun pinis tasol i gat planti graun i stap long yu bai kisim. ² Ol dispela graun i stap yet, em ol graun bilong ol Filistia na ol Gesu, ³ long Siho i stap long hap san kamap long Isip na i go olsem long hap not long mak bilong Ekron, wanem em i graun bilong ol lain Kenan, ol 5-pela hetman bilong ol lain Filistia em ol i bilong Gasa, Asod, Askelon, Gat na Ekron i stap long graun bilong ol lain Avi. ⁴ Long hap saut olgeta graun bilong ol Avi na olgeta graun bilong ol lain Kenan long Ara graun bilong ol Saidon i go olgeta long Apek long mak bilong ol Amo, ⁵ ol graun bilong ol lain Geba, olgeta graun bilong Lebanon i go olsem long hap san kamap, long Bal Gat aninit long Maunten Hemon i go long Lebo Hamat. ⁶ Na olgeta manmeri bilong ol liklik ples maunten bilong Lebanon i go olgeta long Misrepot Maim wantaim olgeta manmeri bilong Saidon. Bai mi go pas long ol ami bilong Israel na rausim ol i go pastaim. Noken lusim tingting long givim ol graun long ol manmeri bilong Israel olsem bilong ol yet, olsem mi bin givim oda long yu. ⁷ Brukim na skelim dispela graun i go long 9-pela lain tumbuna olsem graun bilong ol yet na i go long hap lain manmeri bilong Manase.'' ⁸ Narapela hap bilong lain manmeri bilong Manase, ol lain bilong Ruben na ol lain bilong Gad. Moses i bin givim pinis graun long ol long hap sait long wara Jodan long sait bilong san kamap, ⁹ long Aroe, em stap long arere long wara Anon wanpela biktaun i stap namel long maunten long olgeta stretpela ples antap long maunten long graun bilong Medeba i go olgeta long Dibon, ¹⁰ olgeta biktaun bilong Sion, king bilong ol Amo, husat i stap king long Hesbon na i go long mak bilong graun bilong ol Amon, ¹¹ Gilet na long hap graun bilong ol lain Ges na ol lain Makat, na olgeta hap graun bilong Maunten Hemon, olgeta hap graun bilong Basan i go olgeta long Saleka, ¹² olgeta kindom bilong Og long graun bilong Basan, husat i lukautim Astarot na Edrei, dispela em ol liklik hap lain bilong Refaim, em Moses i bin paitim ol na rausim ol i go aut. ¹³ Tasol ol manmeri bilong Israel i no rausim ol manmeri bilong Gesu o ol manmeri bilong Makat. Ol manmeri bilong Ges na ol manmeri bilong Makat ol i stap yet wantaim ol manmeri bilong Israel i kam inap nau. ¹⁴ Long ol lain bilong Levi tasol Moses i no givim graun long ol. Ol ofa i go long God Yawe, God bilong ol Israel, ol i kukim long paia i kamap olsem skel bilong ol, olsem God Yawe i bin tokim Moses long mekim. ¹⁵ Moses i givim graun long wan wan famili long ol lain manmeri bilong Ruben. ¹⁶ Mak bilong graun bilong ol i stat long Aroe, long arere bilong wara Anon na biktaun i stap namel long ples i daun, na ol stretpela graun i stap klostu long Medeba. ¹⁷ Ruben tu i kisim Hesbon na ol biktaun i stap antap long ol stretpela hap bilong Dibon, Bamot Bal, Bet Bal Meon ¹⁸ na Jahas, Kedemot, Mepat, ¹⁹ na Kiriataim, Sibma na Jeret Saha long liklik maunten bilong ples daun. ²⁰ Ruben kisim tu Bet Peo, ol ples i go daun long ol maunten bilong Piska na Bet Jesimot, ²¹ olgeta ol biktaun i stap long stretpela hap long ol maunten na olgeta kindom bilong Sion, king bilong ol Amo i bin i stap king long Hesbon, dispela king Moses i bin winim wantaim ol hetman bilong Midia, Evi, Rekem, Su, Hu na Reba, dispela ol pikinini man bilong king bilong Sion, ol i bin stap long dispela hap graun. ²² Ol manmeri bilong Israel i kilim Balam pikinini man bilong Beo, wantaim ol arapela man i bin mekim posin o sanguma, ol i kilim ol long bainat. ²³ Mak bilong graun bilong Ruben em long Wara Joden, dispela em mak bilong graun bilong ol. Dispela graun wantaim ol biktaun na ol liklik hauslain em bilong ol lain manmeri bilong Ruben stret, ol bin brukim na skelim i go long wanwan famili bilong ol ²⁴ Dispela graun Moses i bin givim long wanwan famili bilong ol lain manmeri bilong Gad. ²⁵ Graun bilong ol em, Jase wantaim ol biktaun bilong Gilet na hap graun bilong ol Amon i go long Aroe, long hap san kamap bilong Raba, ²⁶ long Hesbon i go long Rama Mispa na Betonim, long Mahanaim i go long graun bilong mak bilong Debi. ²⁷ Long hap ples daun, Moses i givim dispela ol graun long Bet Haram, Bet Nimra, Sukot na Sapon na ol arapela graun bilong Sion, king bilong Hesbon wantaim wara Jodan olsem mak i go daun long pinis bilong Solwara bilong Kineret na i go moa na abrusim wara Jodan long hap san kamap. ²⁸ Ol dispela graun em wanwan famili long lain bilong Gad i kisim wantaim ol biktaun na ol liklik hauslain. ²⁹ Moses i bin givim graun long ol hap lain manmeri bilong Manase. Ol i bin makim long givim i go long wanwan famili bilong hap lain manmeri bilong Manase, ³⁰ Mak bilong graun bilong ol i stat long Mahanaim, olgeta graun long Basan na olgeta graun i stap aninit long Og king bilong Basan na olgeta biktaun bilong Jai, ol i stap long Basan, 60 pela biktaun olgeta, ³¹ hap bilong Gilet, Astarot na Edrei ol biktaun bilong Og long Basan. Ol i bin makim bilong ol wanwan famili long hap lain bilong Maki pikinini man bilong Manase em ol hap lain bilong Maki long wanwan famili. ³² Dispela graun Moses i bin makim bilong ol long ol ples i stret long Moap i go abrusim wara Jodan na i go long Jeriko long hap san kamap. ³³ Moses i no bin givim graun long ol manmeri bilong lain bilong Levi. God Yawe, God bilong ol Israel, em ol samting ol bai kisim bilong ol yet olsem em i bin tokim ol long en.