41 ¹ Inap yu tromoi huk na hukim traipela masalai i bikpela moa long pukpuk ol i kolim Leviatan i kam autsait long solwara wantaim huk bilong hukim pis? ² O inap yu pasim maus bilong em wantaim rop? Inap yu pasim rop i go insait long nus bilong em, o subim huk i go insait long wisket bilong en a? ³ Yu ting em inap long askim yu planti taim long lusim em i go a? Yu ting em bai tok isi isi tasol long yu? ⁴ Ating em bai wokim kontrak wantaim yu long yu kisim em olsem wokman bilong yu oltaim? ⁵ Ating yu bai pilai wantaim em olsem yu save pilai wantaim wanpela pisin yu save lukautim? Yu ting yu inap long pasim rop long en isi tru na givim ol wokmeri bilong yu? ⁶ Yu ting ol bisnis man inap tok pait long baim em a? Yu ting bai ol i katim i go liklik na salim long ol maket ples? ⁷ Ating yu inap sutim planti spia na haitim skin bilong em o sutim het bilong en long supsup bilong sutim pis a? ⁸ Putim han antap long en wanpela taim tasol, bai yu pilim strong bilong em. Na yu i no inap long lusim tingting long dispela pait, long dispela pasin bai yu les long traim gen. ⁹ Harim, dispela kain tingting bilong husait i laik holim pas masalai i bikpela moa long pukpuk ol i kolim Leviatan i giaman tok tasol, ating ol man bai pundaun long graun taim ol i go long ai bilong em? ¹⁰ Nogat wanpela man i gat kain strong bilong givim pret long masalai i bikpela moa long pukpuk ol i kolim Leviatan bilong solwara. Sapos nogat, husait tru inap long mekim kain ol pasin na husait inap long winim mi? ¹¹ Husait pastaim i givim wanpela samting long mi olsem dinau na mi no bekim? Olgeta samting i stap long dispela graun i bilong mi wanpela tasol. ¹² Nau bai mi toktok wantaim yu long dispela masalai i bikpela moa long pukpuk ol i kolim Leviatan long strongpela bun bilong em, o long naispela bodi bilong em. ¹³ Husait inap rausim ol grile long skin bilong en? Husait inap tru long go klostu liklik long maus bilong en? ¹⁴ Na husait inap opim maus bilong em na sekim ol traipela tit bilong en? ¹⁵ Baksait bilong em i gat grile i wankain olsem strongpela hap plang bilong pait i stap strong na pas wantaim. ¹⁶ Ol dispela grile i pas gut wantaim bai win i no inap i go insait namel long ol. ¹⁷ Ol i stap pas wantaim strong tru inap long wanpela samting i no inap skelim ol i go hap hap. ¹⁸ Taim em i laik kus lait i save sut i go nambaut na ai bilong em i olsem lait bilong monin san. ¹⁹ Long maus bilong em paia i lait na bruk i go nabaut olsem ol liklik paia lait. ²⁰ Na long nus bilong en smuk i kamap olsem sospen wara i hat tru na i stap antap long paia. ²¹ Taim em opim maus, win bilong em i save mekim paia lait bikpela na i kam aut long maus. ²² Long nek bilong en i gat strong, olsem na ol i save pret nogut taim ol i lukim em. ²³ Ol hap skin bilong em i pas wantaim gut tru na i stap strong bai nogat man i rausim. ²⁴ Na bel bilong en i strong tru na i no save pret long wanpela samting. Em i strong moa olsem ston bilong kurungutim wit. ²⁵ Taim em i kirap na sanap ol bikpela na strongpela man i save surik, taim em i wokabaut na paitim wara ol i save pret na stap isi na tingting planti. ²⁶ Maski ol man i katim em long bainat na tromoi ol bikpela o liklik spia na ol sap samting long skin bilong en, i no inap em kisim bagarap. ²⁷ Em i save lukim ain olsem kunai gras i drai na strongpela bras wankain olsem diwai i sting pinis. ²⁸ Wanpela spia tasol ol sutim i kam em i no inap mekim em i ranawe. Sapos ol i sutim ston long katapel i olsem win i karim skin bilong wit tasol. ²⁹ Stik i gat wanpela hap i bikpela i olsem wanpela liklik stik na em i harim nois bilong longpela spia i pairap olsem samting nating. ³⁰ Ol grile long bel i olsem sap bilong sospen graun i bruk. Taim em i wokabaut long graun malumalum, ol grile i wokim mak olsem man i katim baret. ³¹ Em i save mekim samting olsem wara i boil taim em wokabaut na em i mekim waitpela mak i kamap long solwara. ³² Na mak bilong rot em i bihainim long solwara i lait tumas olsem het gras bilong ol lapun. ³³ Long graun dispela masalai i bikpela moa long pukpuk ol i kolim Leviatan, no gat wanpela i wankain. Olsem na em i no gat pret long wanpela. ³⁴ Em i lukim ol pikinini man bilong dispela wel abus i apim nem bilong ol i olsem samting nating na em i stap king bilong ol.