40 ¹ God Yawe i toktok yet long Jop na i tok, ² " Husat man inap long painim asua na stretim ol rong bilong God i gat olgeta strong? Man husat i kros wantaim God, larim em i mas bekim tok bilong God." ³ Bihain, Jop i bekim tok bilong God Yawe na i tok, ⁴ "Lukim, mi man nating na olsem wanem bai mi inap long bekim tok bilong yu? Bai mi pasim han long maus bilong mi. ⁵ Mi toktok wanpela taim na bai mi i no inap bekim tok, tru olsem long namba tu taim mi tok gen na bai mi i no inap tok moa yet." ⁶ Orait God Yawe i bekim tok bilong Jop namel long strongpela ren na win na i tok, ⁷ Nau yu mas putim belt long bodi bilong yu wankain olsem man, long wanem bai mi askim yu long bekim ol toktok bilong mi. ⁸ Ating bai yu tok mi i no stretpela? Ating bai yu kotim mi na strongim tok olsem yu yet i stretpela? ⁹ Tru olsem yu i gat wanpela han i wankain olsem God? Bai yu inap singaut strong wankain olsem nek bilong em? ¹⁰ Nau yu mas karamapim yu yet wantaim glori, gutpela nem na mas putim yu yet i stap wantaim biknem na gutpela pasin. ¹¹ Rausim nambaut ol belhat bilong yu i stap yet na lukim ol man husat i apim nem bilong ol yet na putim ol i kam daun. ¹² Lukim olgeta man husat i apim nem bilong ol yet na putim ol i kam daun na krungutim ol man nogut long wanem hap ol i sanap long em. ¹³ Planim ol long graun wantaim, kalabusim ol na haitim pes bilong ol long ples hait. ¹⁴ Bihain, bai mi mekim gutpela toktok long yu olsem han sut bilong yu yet i ken savim yu. ¹⁵ Nau lukim dispela bikpela animol mi bin wokim taim mi mekim yu, em i save kaikai grass olsem wanpela bulmakau. ¹⁶ Lukim, ol strong na pawa bilong em i stap long sait bodi na bel bilong em. ¹⁷ Em i mekim tel bilong em i olsem diwai sida na ol rop na mit bilong lek i pas wantaim. ¹⁸ Ol bun bilong em i olsem bras na ol lek bilong em i olsem ol ain. ¹⁹ Em i namba wan long ol wokman bilong God. God wanpela tasol i mekim em na bai inap long winim em. ²⁰ Long wanem, ol maunten i givim kaikai long em na ol animol i stap long bikpela hap grass i pilai klostu tasol. ²¹ Em i slip aninit long lotus flawa namel long ol arapela grass, we i kamap olsem haus bilong em. ²² Ol lotus flawa i karamapim em wantaim sedo bilong ol na ol liklik diwai i stap klostu long liklik han wara i raunim em. ²³ Lukim, sapos wanpela wara i ron strong na rausim ol samting i stap arere, em i no pret na maski wara Joden i tait strong tru i kam long maus bilong em, em i sanap strong. ²⁴ Husat man bai inap long kalabusim em wantaim huk o sutim nus bilong em wantaim ring?