13 ¹ Nau klostu long Dei bilong Passova. Jisas i save pinis olsem taim bilong em i kamap pinis long lusim dispela graun na igo long Papa. Em i laikim tumas ol lain bilong em hia long graun, na em i laikim ol moa yet igo inap long taim em i dai. ² Nau satan i putim tingting pinis long bel bilong Judas Iskariot pikinini bilong Saimom, long putim Jisas long han bilong ol birua. ³ Jisas i save pinis olsem, Papa i bin givim olgeta samting long han bilong em olsem em i kam long God na em bai i go bek long God. ⁴ Jisas i kirap na lusim kaikai na rausim longpela saket bilong em. Na em i kisim wanpela taul na pasim long namel bilong em. ⁵ Na em i kapsaitim wara igo insait long wanpela dis na wasim lek bilong ol disaipol na draim long taul em i pasim long namel bilong em. ⁶ Em i kam long Saimon Pita na Pita i tokim em olsem, "Bikpela, yu laik wasim lek bilong mi?" ⁷ Na Jisas i bekim tok bilong em olsem, wanem samting Mi mekim nau, em yu no long save, tasol bihain bai yu save." ⁸ Pita i tokim em, "Yu no inap wasim lek bilong mi."Jisas i bekim tok olsem, "Sapos mi no wasim lek bilong yu orait yu i no stap hap bilong mi." ⁹ Saimon Pita i tokim em olsem, "Bikpela yu noken wasim lek bilong mi tasol, yu wasim han na het bilong mi tu." ¹⁰ Jisas i tokim em, "Husait ol man i waswas pinis, ol ino inap long waswas gen, tasol ol i mas wasim lek bilong ol tasol,yupela i kamap klin pinis, tasol ino olgeta bilong yupela i kamap klin. ¹¹ Jisas i save pinis husait bai putim em long han bilong birua, olsem na em i tok, "I no Yupela olgeta i kamap klin." ¹² Taim Jisas i wasim lek bilong ol pinis, orait em i kisim saket bilong em na em i sindaun gen na em i askim ol olsem, "Yupela i save long as bilong dispela pasin mi mekim long yupela? ¹³ Yupela i save kolim mi 'Tisa' na 'Bikpela' em i stret, Mi yet Mi Tisa na Mi yet Mi Bikpela. ¹⁴ Sapos Mi Bikpela na Tisa na Mi wasim lek bilong yupela, yupela tu i mas mekim wankain pasin na wasim lek bilong ol arapela. ¹⁵ Long wanem mi soim piksa long yupela bai yupela i ken mekim wankain pasin olsem mi bin mekim long yupela. ¹⁶ Tru tumas, mi tokim yupela, wokboi ino winim bosman bilong em na mausman husait i karim tok i go em i no winim man husait i salim em. ¹⁷ Sapos yu save long as bilong dispela samting na yu bihainim dispela tok, yu i ken amamas. ¹⁸ Mi no mekim dispela tok long yupela olgeta, mi save long husait mi bin makim, tasol mi mekim dispela tok bai tok bilong God i mas kamap tru. Man husait i kaikai bret wantaim mi, em bai birua long mi. ¹⁹ Nau mi tokim yupela long ol dispela samting na bihain em i kamap, bai yupela i bilip olsem Mi Yet Mi Stap. ²⁰ Tru tumas, mi tokim yupela, sapos yupela kisim husait mi salim i kam, yupela kisim mi na sapos yupela i kisim mi, yupela i kisim husait i bin salim mi i kam." ²¹ Taim Jisas i mekim dispela tok, bel bilong em i hevi na em i tokaut olsem, "Tru tumas wanpela bilong yupela bai putim mi long han bilong birua." ²² Ol disaipol i lukluk long ol yet na tingting planti long em i toktok long husait. ²³ Igat wanpela disaipol Jisas i save laikim tumas, i sindaun na pas klostu long Jisas. ²⁴ Na Saimon Pita i mekim sain long han bilong em long dispela disaipol, " Askim em,em i toktok long husait?" ²⁵ Na disaipol i stap klostu long Jisas i silip i go klostu na askim em olsem, "Bikpela, dispela man em husait?" ²⁶ Na Jisas i bekim tok olsem, "Bai mi kisim hap bret na putim long sup na givim em, em dispela man tasol." Olsem na taim em i putim bret long sup, na em i givim long Judas, pikinini bilong Saimon Iskariot. ²⁷ Bihain long Jisas i givim bret long em, satan i go insait long Judas. Na Jisas i tokim em olsem, "Wanem samting yu laik mekim, yu mekim hariap." ²⁸ Nogat wanpela man i sindaun long tebol i save long wonem as Jisas i mekim dispela tok long em. ²⁹ Sampela man i ting, Jisas i tokim em long baim ol kaikai samting bilong bikpela dei bilong lotu o bilong givim long ol tarangu lain long wanem. Judas i save lukautim bek moni. ³⁰ Bihain long Judas i kisim bret, wantu tasol em i go ausait. Em i tudak pinis. ³¹ Taim Judas i go pinis, Jisas i tok, "Nau pikinini bilong man i kisim biknem na God i kisim biknem long pikinini bilong man. ³² Biknem bilong God bai kamap ples klia insait long pikinini na wantu tasol,God bai givim biknem long Em. ³³ Ol liklik pikinini, mi stap liklik taim tasol wantaim yupela. Na yupela bai painim mi, olsem mi bin tokim ol Juda olsem, 'Wanem hap mi go long en, em yupela i no i nap kam.' Wankain tok nau mi givim long yupela tu. ³⁴ Nau mi givim nupela lo long yupela olsem, yupela i mas laikim ol arapela, olsem mi bin laikim yupela, olsem tasol yupela tu i mas laikim ol arapela. ³⁵ Long dispela pasin tasol ol manmeri bai save olsem, yupela ol disaipol bilong mi, sapos yupela i laikim tru ol arapela. ³⁶ Saimon Pita i tokim em, "Bikpela yu bai go we?" Na Jisas i bekim olsem, "Wanem hap mi bai go long en, em yu i no inap long bihainim mi, tasol bihain bai yu inap long go bihainim mi. ³⁷ Pita i bekim tok olsem, "Bikpela, bilong wanem mi no inap bihainim yu nau? Bai mi lusim laip bilong mi yet long yu." ³⁸ Jisas i bekim tok, "Yu inap lusim laip bilong yu long mi? Tru tumas mi tokim yu,kakaruk ino krai yet, bai yu tok tripela taim olsem, yu no save long mi."