12 ¹ Nau long 6-pela de bipo long Bikpela De Bilong Pasova bai kamap, Jisas i go long Betani long ples we Lasarus i stap, husat Jisas i bin kirapim em long matmat. ² Orait ol i wokim kaikai bilong Jisas, na Marta i wok long skelim kaikai, na Lasarus sindaun wantaim ol man na kaikai wantaim Jisas long tebol. ³ Maria i kisim hap kilo nambawan sanda, em i dia tumas na kam sindaun klostu long lek bilong Jisas, na welim lek bilong en na em i mekim drai long gras bilong em. Naispela smel bilong sanda i pulap insait long haus. ⁴ Wanpela disaipel bilong Jisas, nem bilong en Judas Iskariot husat em bai givim Jisas long han bilong birua bihain, em i tok, ⁵ "Long wanem yumi ino inap salim dispela sanda long 300 moni silva na givim long ol rabis man?" ⁶ Nau Judas i bin tok olsem long wanem em i no wari long rabisman, tasol em yet em i stil man, na em i save bosim beg moni bilong lain bilong Jisas, na em i save stlim sampla moni long em yet. ⁷ Na Jisas i tok, "Larim dispela meri long holim dispela sanda inap long dei mi dai na ol i planim mi. ⁸ Ol rabis man bai i stap wantaim yupela olgeta taim tasol mi bai no inap long stap wantaim yupela." ⁹ Planti manmeri bilong Juda ol i save olsem Jisas i bin stap long Betani na ol i kam i no long lukim Jisas tasol. Nogat. Ol i laik lukim Lasarus, husat Jisas i bin kirapim em long ples matmat. ¹⁰ Ol bikpris i bin tok namel long ol yet olsem ol i laik kilim i dai Lasarus tu ¹¹ long wanem, planti Juda i ting long samting Jisas i bin mekim long Lasarus na ol i lusim ol na bilip long Jisas. ¹² Long narapela de planti manmeri i kam bung long bikpela de bilong lotu. Na taim ol i harim olsem Jisas i kam insait long Jerusalem, ¹³ ol i kisim ol han bilong diwai pam na ol i go aut long bungim em na singaut, "Hosana! God i mekim gut long dispela man husat i kam long nem bilong Bikpela. Em i King bilong Israel." ¹⁴ Jisas i bin painim wanpela yangpela donki na em i bin sindaun antap long en, em i olsem ol i bin raitim long buk bilong God. ¹⁵ "Yupela ol manmeri bilong ples Saion, yupela i noken pret. Lukim King bilong yupela em i kalap long yangpela donki na em i kam nau." ¹⁶ Tasol ol disaipel bilong em i no bin save long wanem as dispela ol samting i wok long kamap long dispela taim, tasol taim God i givim biknem long Jesus, ol i bilip olsem olgeta samting ol i bin raitim long Jisas insait long buk bilong God ol i kamap tru. ¹⁷ Ol planti manmeri husait ol i bin lukim Jisas i bin kirapim Lasarus long matmat, na ol igo autim tok long ol arapela. ¹⁸ Long dispela as tasol ol manmeri i bin go aut long bungim Jisas, bilong wanem, ol i harim em mekim dispela mirakel. ¹⁹ Na ol Farisi i toktok namel long ol yet olsem, "Lukim, yumi no inap mekim wanpela samting, lukim, olgeta manmeri i wok long bihainim em." ²⁰ Sampela Grik tu ol i go wantaim planti manmeri long mekim lotu long God long bikpela de bilong lotu. ²¹ Dispela Grik i go long Filip, husat em i bilong ples Betsaida long Galili na ol i askim em, "Bikman, mipela i laik lukim Jisas." ²² Filip i go tokim Andru, na Andru i go wantaim Filip na ol i tokim Jisas. ²³ Na Jisas i bekim tok olsem, "Taim i kam pinis long pikinini bilong man bai kisim biknem. ²⁴ Tru tumas mi tokim yupela olsem, sapos wanpela pikinini wit i no pundaun long graun na i dai, em bai stap em yet. Tasol sapos em i dai, em bai karim planti kaikai. ²⁵ Sapos wanpela man i laikim tumas laip bilong en, em bai i lus, tasol sapos wanpela man i givim baksait long laip bilong en long dispela graun, em bai holimpas laip bilong en inap oltaim oltaim. ²⁶ Sapos wanpela man i mekim wok bilong mi, em i mas kam bihainim mi, na long ples we bai mi stap, wokboi bilong mi bai stap long hap tu. Sapos wanpela man i wok long mi, Papa bai givim biknem long em. ²⁷ Na Jisas i tok olsem, "Nau bel bilong mi em i hevi tru, bai mi tok wanem nau? Papa, noken larim dispela taim nogut i kamap long mi. Tasol long dispela as tasol mi bin kam.'' ²⁸ "Papa, mekim nem bilong yu kamap bikpela." Wanpela maus i kam daun long heven na i tok, "Mi bin mekim nem bilong mi i kamap bikpela pinis, na bai mi mekim gen." ²⁹ Tasol ol manmeri sanap klostu ol i harim dispela tok na ol i tok olsem, "Klaut i pairap." Ol arapela i tok olsem, "Em i wanpela ensel i toktok long em." ³⁰ Orait Jisas i bekim na tok olsem, "Dispela tok i kam em i no bilong helpim mi, tasol em bai helpim yupela. ³¹ Nau em i taim we God bai i skelim pasin bilong ol manmeri bilong dispela graun. Nau bai em i rausim dispela hetman husat i save bosim dispela graun. ³² Na taim ol man i litimapim mi long dispela graun, bai mi pulim olgeta manmeri i kam long mi." ³³ Jisas i mekim dispela tok long ol manmeri long pasin em bai dai long en. ³⁴ Ol lain manmeri i bekim tok olsem, "Mipela i harim long tok bilong God olsem, God i makim bilong kisim bek ol manmeri na em bai stap oltaim oltaim. Na olsem wanem yu tok, 'Ol i mas litimapim pikinini bilong man?' Dispela Pikinini Bilong Man em husat tru?" ³⁵ Na Jisas i tokim ol olsem, "Dispela lait bai istap wantaim yupela liklik taim tasol. Taim lait i stap yet, yupela mas wokabaut long lait, na tudak bai i no inap long karamapim yu. Husat man i wokabaut long tudak bai i no inap save long wanem hap em i go. ³⁶ Nau yupela i gat dispela lait i stap wantaim yupela, olsem na bilip long dispela lait na yupela bai i kamap pikinini bilong lait." Jisas i mekim dispela tok pinis na em lusim ol na i go hait long ol. ³⁷ Jisas i bin mekim planti mirakel namel long ol, tasol ol ino bilip tru long em ³⁸ olsem na, tok bilong profet Aisaia i bin tok i mas kamap tru olsem, "Papa, husat i bilip long ol toktok bilong mipela? Husat i ken luksave long strong bilong yu taim yu kamapim ples klia?" ³⁹ Na long dispela as tasol ol i no inap bilip olsem na, Aisaia i tok gen. ⁴⁰ "Bikpela em i pasim ai bilong ol, na em i strongim bel bilong ol, sapos ol i mekim olsem, ol inap long lukluk long ai bilong ol na bel bilong ol bai i op na ol bai tanim bel, na bai mi oraitim ol." ⁴¹ Aisaia i bin mekim ol dispela tok long wanem, em yet i bin lukim bikpela namba na strong bilong Jisas na toktok long em. ⁴² Na planti hetman i bin bilip long Jisas, tasol ol i bin pret long ol Farisi, olsem na ol i no tokaut long bilip bilong ol, nogut ol Farisi bai rausim ol long haus lotu. ⁴³ Ol i save laikim tumas bai ol man i mas givim biknem long ol, tasol ol i no laik bai God i givim biknem long ol. ⁴⁴ Orait Jisas i singaut na i tok, "Husat man i bilip long mi, em i no bilip long mi tasol, em i bilip long Papa husat i salim mi i kam, ⁴⁵ na husat man i lukim mi, em i lukim Papa husat i salim mi i kam. ⁴⁶ Mi kam long dispela graun olsem lait, na husait man i bilip long mi, bai i no inap i stap long tudak. ⁴⁷ Sapos husait man i harim tok bilong mi tasol em i no bihainim, bai mi no inap skelim pasin bilong em, bilong wanem, mi no kam long skelim ol manmeri olsem jas long dispela graun, tasol mi kam long kisim bek ol manmeri. ⁴⁸ Husat man i save givim baksait long mi na i no save harim tok bilong mi, em i gat jas bilong skelim em. Tok mi bin autim em bai i stap olsem jas bilong skelim em long las de. ⁴⁹ Mi no mekim tok long tingting bilong mi yet. Tasol Papa em i salim mi, na em yet i tokim mi long olgeta tok mi mas mekim na autim. ⁵⁰ Mi save olsem tok bilong en bai i kamapim laip i stap gut oltaim oltaim, olsem na olgeta tok mi mekim, em mi save mekim long yupela olsem Papa em i bin tokim mi."