52 ¹ Sedekaia i kamap 21 krismas na em i bin kamap king, em i lukautim ol na stap long Jerusalem inap long 11 pela krismas. Nem bilong mama bilong em Amutal, em i pikinini meri bilong Jeremaia long ples Libna. ² Em i mekim pasin nogut long ai bilong God Yawe, em i mekim olgeta pasin i wankain olsem Jeoiakim i bin mekim. ³ Long belhat bilong God Yawe, olgeta dispela samting i kamap insait long Jerusalem na Juda, i go inap long taim em i rausim ol i go longwe long ples em i stap. Nau Sedekaia i kros wantaim king bilong Babilon. ⁴ Em i kamap olsem long namba 9 yia aninit long lukaut bilong King Sedekaia. Long 10 dei bilong 10 mun, King Nebukatnesar bilong Babilon i karim pait i kam long Jerusalem wantaim ol ami bilong em. Ol i kemp long narapela sait bilong Jerusalem na ol i wokim strongpela banis raunim em. ⁵ Olsem na biktaun i bagarap inap long 11 pela yia taim Sedekaia i stap King. ⁶ Long namba 9 dei bilong 4 mun bikpela hangre i kamap long biktaun na nogat kaikai bilong ol manmeri. ⁷ Olsem na ol birua i brukim biktaun na olgeta man bilong pait i ranawe lusim biktaun long bik nait long liklik dua ol i wokim namel long tupela banis, arere long gaden bilong king. Maski ol ami bilong Saldin i stap raunim biktaun tasol ol i no lukim na ol i ranawe i go olsem long Araba. ⁸ Tasol ol ami bilong Saldin i bihainim ol i go na holim king Sedekaia long ples daun bilong Wara Joden klostu long ples Jeriko. Olgeta ami bilong em i ranawe nambaut na lusim em. ⁹ Ol i holim king Sedekaia na kisim em i go antap long king bilong Babilon long ples Ribla long graun bilong Amat na king bilong Babilon i givim tok orait long mekim save long em. ¹⁰ King bilong Babilon i kilim ol pikinini man bilong Sedekaia long ai bilong em long Ribla na em i kilim olgeta lida bilong Juda tu. ¹¹ Nau em i kamautim tupela ai bilong Sedekaia na kalabusim em wantaim ol sen bras na kisim em i go long Babilon. King bilong Babilon i putim em long kalabus weitim taim bilong em long dai. ¹² Nau long namba 10 day bilong 5 mun, em i 19 pela yia bilong King Nebukatnesar i stap king bilong Babilon, Nebusaradan, em i komanda bilong ol wasman ami bilong king na em i wokman bilong king bilong Babilon, em i kam long Jerusalem. ¹³ Em i kukim haus bilong God Yawe, ples bilong king na olgeta ol haus bilong Jerusalem na tu ol i kukim olgeta ol gutpela haus bilong biktaun. ¹⁴ Na ol ami bilong Babilon husait i stap wantaim Nebusaradan, komanda bilong ol wasman ami bilong king bilong Babilon i brukim banis bilong Jerusalem. ¹⁵ Nebusaradan, komanda bilong ol wasman ami bilong king i kisim sampela i go kalabus na lusim ol sampela ol turangu lain, sampela lain long biktaun, ol sampela lain husait i lusim king bilong Babilon na ol sampela saveman bilong wokim haus samting. ¹⁶ Tasol Nebusaradan, komanda bilong ol wasman bilong king i lusim sampela ol turangu manmeri long wok long ol gaden wain na ol arapela gaden. ¹⁷ Na long ol bras ston bilong pos long haus bilong God Yawe na ol stik na bikpela longpela bras dis ol i kolim "Solwara" i bin i stap long haus bilong God Yawe, ol Saldin i brukim i go liklik na karim olgeta samting ol i wokim long bras i go bek long Babilon. ¹⁸ Ol sospen, ol savol, ol lam, ol plet na olgeta ol samting bilong kukim kaikai na ol samting bilong skelim kaikai ol i wokim long bras ol pris i save yusim insait long haus lotu. Ol Saldin i kisim olgeta samting i go aut. ¹⁹ Ol longpela diwai dis na ol samting bilong kukim ol gutpela smel samting, ol dis, ol sospen, ol stik bilong putim lam, ol plet na ol longpela dis ol i wokim long gol na ol samting ol i wokim long silva. Nebusaradan, komanda bilong ol wasman bilong king i karim wantaim i go aut. ²⁰ Tupela strongpela pos, bikpela na longpela dis ol i wokim long bras ol i save kolim "Solwara" na 12 pela bulmakau ol i wokim long bras i stap aninit long ol lek bilong tupela pos. Ol samting dispela Solomon i bin mekim long putim insait long haus bilong God Yawe i gat planti bras tumas na hevi bilong ol i moa yet. ²¹ Ol 10 mita longpela strongpela pos i sanap i go antap na ol mak i raunim dispela em i stap olsem 7 mita. Wanwan pos i gat hul inap long 4-pela pinka i go insait long en. ²² Bikpela hap bras i stap antap na dispela hap i olsem 3 mita i go antap i bilasim wantaim ol piksa na ol pomegrenet frut i raunim olgeta hap. Ol i wokim ol dispela samting wantaim bras. Ol arapela pos na bilas bilong ol wantaim ol pomegrenet frut i luk wankain olsem namba wan pos. ²³ I gat 96 pela frut pomegrenet i stap long het bilong ol dispela pos na 100 pela pomegrenet i raunim ol dispela ol piksa ol i wokim antap long dispela ol pos. ²⁴ Nebusaradan, komanda bilong ol wasman bilong king bilong Babilon i kisim het pris Seraia na Sefanaia, namba 2 pris wantaim tripela ol wasman bilong bik dua i go kalabusim ol. ²⁵ Em i kisim ofisa husait i lukautim ol soldia long biktaun na ol 7-pela man i save givim tingting long king husait i stap long biktaun na tu em i kisim ofisa bilong ami bilong king husait i save skelim na kisim ol ami wantaim ol 60 pela bikpela save lain bilong biktaun i go kalabusim ol. ²⁶ Nau Nebusaradan, komanda bilong ol wasman bilong king i kisim ol i go long king bilong Babilon long ples Ribla. ²⁷ King bilong Babilon i kilim ol long ples Ribla long graun bilong Hamat. Em long dispela rot tasol ol lain Juda i go kalabus long Babilon. ²⁸ Dispela em namba bilong ol lain Juda king Nebukatnesar i bin kisim ol i go kalabus bihain long 7-pela yia, em i olsem 3,023 manmeri. ²⁹ Long namba 18 yia aninit long king Nebukatnesar, em i kisim 832 manmeri bilong Jerusalem. ³⁰ Insait long namba 23 yia aninit long Nebukatnesar, Nebusaradan, komanda bilong ol wasman ami bilong king i kalabusim 745 pela ol lain Juda. Namba bilong olgeta lain Juda i kalabus i olsem 4,600 manmeri. ³¹ King Jeoiakin bilong Juda, i stap long kalabus i go inap long 37 pela yia. Long 25 day bilong 12 mun, Awel-Maduk king bilong Babilon i rausim Jeoiakin, king bilong Juda, long kalabus na em i fri. Dispela i kamap long yia taim Awel Maduk i kamap king. ³² Em i toktok gut long em na givim em sia i antap long ol arapela king husait i stap wantaim em long Babilon. ³³ Awel Maduk i rausim ol kalabus klos bilong Jeoiakin na em i save kaikai wantaim king long tebol bilong em, ³⁴ na ol i save givim kaikai long em olgeta dei i go inap em i dai.