50 ¹ God Yawe i toktok wantaim profet Jeremaia long kantri Kaldia bilong Babilon, ² "Toksave long ol man i stap long dispela kantri i mas harim gut na yu no ken haitim. Putim wanpela mak i go antap na tokim ol man long lukim. Tokaut olsem God Yawe bai bagarapim Madok, God giaman bilong ol na 'Babilon bai i stap long bikpela hevi.' ³ Wanpela Kantri long not bai i kam pait wantaim babilon. Ol bai bagarapim olgeta man na wel animol wantaim olgeta samting i stap long en na i no gat wanpela samting bai stap long dispela ples. ⁴ God Yawe i tok. Taim dispela dei i kamap, Ol manmeri long Israel na Juda bai kam bung na krai wantaim long lotuim mi God bilong ol. ⁵ Ol bai askim na bihainim rot i go long Saion na ol bai i tok, mipela i mas go bek long God Yawe na mekim strongpela kontrak long bihainim em. ⁶ Ol manmeri bilong mi i stap olsem ol sipsip i lus. Ol wasman bilong ol sipsip i kisim ol i go longwe long maunten i olsem ol i mekim pasin nogut na stap long we long mi. Ol i no save long rot na ples ol i bin stap long en. ⁷ Ol birua bilong ol i bagarapim ol na i tok, mipela i no mekim asua long bagarapim ol. Ol yet i mekim pasin nogut long God Yawe bilong ol. God husait ol tumbuna bilong ol i save bilip long en. ⁸ Lusim Babilon na kisim ol manmeri bilong mi i go aut long graun bilong Kaldia olsem ol man meme i save i go pas na kisim ol arapela wantaim em. ⁹ Harim, mi bai kamapim ol strongpela kantri long Not long pait wantaim Babilon na kisim em. Ol bai i pait olsem ol man i gat save long pait wantaim spia na i no save kam han noting. ¹⁰ God Yawe i tok. Bikpela bagarap bai kamap long Kaldia na ol man bai kisim olgeta samting bilong ol. ¹¹ God Yawe i givim yupela ol samting bilong em olsem na yupela i pulap wantam amamas, yupela i olsem ol pikinini hos i save singaut na kalap taim ol i raun long gutpela gras. ¹² Ol manmeri bilong Babilon bai i no gat amamas na ol bai i sem. Ples bilong ol bai i drai na bagarap na ol man long narapela ples i no inap laikim ples bilong ol. ¹³ Long belhat bilong God Yawe tasol, Babilon bai i no inap stap gut, bikpela bagarap bai i kamap, olgeta manmeri husait i abrusim Babilon bai i gat pret long lukim ol dispela bagarap i bin kamap. ¹⁴ Ol i mekim pasin nogut long God Yawe olsem na em bai mekim ol manmeri long taitim bunara na pait wantaim Babilon. Yu no ken larim wanpela i stap bilong wanem ol i mekim sin long God Yawe. ¹⁵ Kirap na mekim singaut bilong pait long Babilon na em bai givim em yet long yu. Ol tawa na ol banis bilong em bai i bruk na God Yawe bai bagarapim olgeta samting bilong ol olsem ol i bin mekim long yupela. ¹⁶ Bai mi bagarapim ol man bilong planim kaikai na ol man bilong bungim kaikai long Babilon. Ol bai pret long bainat na wanwan man bai i givim baksait long ol lain manmeri bilong ol na ranawe i go bek long ples bilong ol yet. ¹⁷ Israel i olsem wanpela sipsip ol laion i holim na kisim i go. King bilong Asiria i bin kam pas na bagarapim ol na bihain Nebukatnesar king bilong ol Babilon i bin mekim nogut na bagarapim bun bilong ol ¹⁸ Harim gut, God Yawe bilong ol Israel i tok. Mi bai mekim save long king bilong Babilon na graun bilong em olsem mi bin mekim save lo king bilong Asiria. ¹⁹ Mi bai kisim ol Israel i go bek long graun tru bilong ol. Mi bai givim gutpela ples bilong kamapim kaikai i stap long Karmel na Basan. Ol bai i pulap long kaikai na inap tru long maunten bilong Efraim na Gilead. ²⁰ God Yawe i tok. Long dispela taim, mi bai traim long painim aut ol pasin nogut bilong ol Israel na Juda tasol mi no inap painim na mi bai lusim rong bilong ol na mekim gut long ol liklik hap lain". ²¹ God Yawe i tok. Yu mas mekim olgeta samting bihainim wanem mi tok. Mi bai mekim ol birua bilong ol i holim bainat long bagarapim ol. Ol bai bagarapim olgeta samting na pait wantaim Merataim na Pekot. ²² Mekim bikpela nois na singaut bilong ples pait na soim olsem bikpela bagarap i kamap long graun. ²³ Strongpela kantri Babilon bai i bagarap na i no inap stap gut. Ples bilong Babilon bai i drai na kamap ples nogut namel long ol narapela manmeri. ²⁴ Mi putim was long yu na kisim yu, Babilon na yu no save long dispela. Mi painim yu na holim yu olsem kalabus bilong wanem yu no harim tok bilong God Yawe. ²⁵ God Yawe i laik bagarapim Kaldia olsem na em i opim dua bilong haus na kisim olgeta samting bilong pait long soim belhat bilong em long ol manmeri i bikhet. . ²⁶ Ol birua bai kam pait wantaim em, ol bai opim olgeta haus bilong putim kaikai na bungim olgeta wantaim olsem maunten wit na larim em i stap long bagarapim, i noken marimari long em. ²⁷ Kisim olgeta ol yangpela bulmakau bilong Babilon na kilim ol i dai bilong wanem taim bilong ol long kisim hevi i kamap. ²⁸ Ol man i stap laip, ol i pret na ranawe long bikpela nois bilong pait i kamap long Babilon. Dispela i soim belhat bilong God Yawe bilong Saion na soim belhat long tempel bilong em. ²⁹ Tokim olgeta man bilong pait wantaim spia na bunara i kam pait wantaim Babilon. Kilim olgeta na noken larim wanpela i ranawe. Bekim bek ol pasin em i mekim long yu long bagarapim nem bilong God Yawe, Holi God bilong Israel. ³⁰ God Yawe i tok, ol bai kilim olgeta yangpela man long namel bilong biktaun na long dispela dei tasol olgeta man bilong pait bai i dai. ³¹ Bikpela God Yawe i tok. Harim, mi stap birua bilong ol man husat i save givim biknem long ol yet. Dei bilong yupela i kamap pinis, taim mi bai mi mekim save long yupela. ³² Ol man husat i save litimapim nem bilong ol yet bai pundaun. I no gat wanpela man inap long helpim ol. Mi bai mekim paia long biktaun na em bai kukim olgeta samting i stap raun long en. ³³ Bikpela God Yawe i tok, ol manmeri i daunim ol Israel na Juda. Ol i kalabusim ol na i no laik long larim ol i go fri. ³⁴ Bikpela God Yawe em nem bilong man husat i helpim ol wantaim strong bilong em. Em bai helpim ol long hevi bilong ol na kisim ol i go long graun bilong ol, tasol ol manmeri bilong Babilon bai i no gat ples malolo bilong ol. ³⁵ God Yawe i tok, bainat bilong bagarapim ol Kaldia na bagarapim ol manmeri i stap long Babilon wantaim ol lida na saveman bilong ol. ³⁶ Bainat bai bagarapim ol man bilong mekim ol toktok nating na ol bai kamap olsem ol longlong lain. Bainat bai bagarapim ol soldia bilong em na ol bai i stap wantaim pret. ³⁷ Bainat bai bagarapim ol hos bilong ol wantaim ol karis na olgeta lain manmeri i stap insait long Babilon na ol bai stap olsem ol meri. Bainat bai bagarapim haus bilong putim ol samting na ol man bai go insait na kisim ol samting. ³⁸ Graun ol i stap long en bai i drai na bai i nogat wara, bilong wanem ol i save lotuim ol god giaman na bihainim ol pasin nogut bilong giaman God. ³⁹ Ol wel animol bilong ples drai, ol wel dog na ol yangpela wel pisin tasol bai stap long dispela ples oltaim. I no gat gutpela ol samting bai i stap long dispela ples long wanpela lain manmeri i go long narapela lain manmeri, i no gat wanpela bai i stap long en. ⁴⁰ Wankain olsem God i bin bagarapim Sodom, Gomora na ol ples i stap klostu long ol. I no gat wanpela man o wanpela samting bai i stap long dispela hap, God Yawe i tokaut olsem. ⁴¹ Harim, ol manmeri bai i kam long not, bikpela kantri na planti king bai i kamap longwe hap bilong graun. ⁴² Ol bai kisim ol bunara na spia bilong pait, ol bai i no gat sori long wanpela samting. Ol bai i pait olsem nois bilong solwara i bruk na ol bai ron long hos olsem ol man i stap long bikpela pait long bagarapim ol pikinini meri bilong Babilon. ⁴³ King bilong Babilon i harim ol tok ol i mekim na em i no bel gut, em i pilim hevi olsem meri i laik karim pikinini. ⁴⁴ Harim, em i wokabaut olsem laion i go long Jordan long painim gutpela hap long stap tasol hariap tru mi mekim ol long ranawe, mi bai makim wanpela man long was long ol. Husait bai olsem mi na husait bai stap olsem mi? Wanem kain wasman bilong sipsip bai inap long rausim mi? ⁴⁵ Orait harim gut wanem tingting, God Yawe i mekim long bagarapim Babilon na tingtingem i gat long bagarapim graun bilong Kaldia. Ol bai kisim olgeta samting bilong ol i go wantaim ol liklik lain sipsip. Ol gutpela ples bilong ol long stap bai i tainim na kamap ples nogut. ⁴⁶ Ol manmeri i kirap nogut long bikpela nois bilong bagarap i kamap long Babilon na ol man bilong arapela kantri bai harim singaut bilong ol.