12 ¹ Wanpela singaut i go aut long ol man long lain Efraim, taim ol i go namel long ples Saphon na tokim Jepta olsem, "Bilong wanem na yu bin kam i go na pait wantaim ol manmeri bilong Amon na yu i no singautim mipela long go wantaim yu? Mipela bai kukim yu wantaim haus bilong yu." ² Na Jepta i tokim ol olsem, "Mi wantaim ol lain manmeri bilong mi i bin gat bikpela hevi wantaim ol lain Amon. Tasol taim mi singaut long yu, yu no bin kam helpim na rausim mi long han bilong ol. ³ Taim mi singaut long yupela,yupela i no bin kam helpim na rausim mipela long han bilong ol birua, taim mi lukim olsem yupela i no kam helpim mi, mi putim laip bilong mi long han bilong mi yet na go pait long ol manmeri bilong Amon, na God Yawe i mekim mi i winim pait. Olsem na bilong wanem yu kam long pait long mi nau?" ⁴ Na Jepta i bungim olgeta man bilong Gileat na em i go pait long ol lain Efraim. Ol man bilong Gileat i go pait wantaim ol Efraim long wanem ol i tok, "Yupela ol Gileat yupela ol man bilong ranawe long ol Efraim na Manase." ⁵ Ol Gileat i banisim wara Jordan long hap ol man i save brukim i go long Efraim. Taim wanpela man bilong lain Efraim i kam na tok,"Larim mi brukim wara na go," ol man bilong Gileat bai tok olsem long en," Yu man bilong Efraim a?" Sapos em i tok, "Nogat," ⁶ orait ol bai tokim em olsem, "Tok, Sihibolet," tasol taim em i tok "Sibolet" (long wanem, em i no kolim dispela nem gut), ol Gileat bai holim em na kilim em long wara Jordan. Long dispela rot 42 000 man long lain Efraim i dai long dispela taim. ⁷ Jepta i wok olsem hetman bilong ol Israel long 6pela yia olgeta. Na Jepta, man bilong ples Gileat i dai na ol i planim long wanpela bilong ol biktaun bilong Gileat. ⁸ Bihain long em, Ipsan bilong Betlehem i wok olsem hetman bilong ol Israel. ⁹ Em i gat 30 pikinini man. Na em i givim 30 pikinini meri bilong en long ol man bai maritim ol, na em i kisim 30 pikinini meri bilong ol narapela man, long narapela ples long maritim ol pikinini man bilong en. Em i stap hetman bilong ol Israel long 7pela yia olgeta ¹⁰ Na bihain Ipsan i dai na ol i planim em long Betlehem. ¹¹ Bihain long en em Elon man bilong lain Sebulun i wok olsem hetman bilong Israel. Em i stap hetman bilong ol Israel long 10pela yia olgeta. ¹² Elon man bilong lain Sebulun i dai na ol planim em long Aijalon long graun bilong ol Sebulun yet. ¹³ Bihain long en, em Apdon pikinini man bilong Hilel long ples Piraton i wok olsem hetman bilong ol Israel. ¹⁴ Em i gat 40 pikinini man na 30 tumbuna pikinini man. Na ol i save sindaun na raun antap long 70 donki na em i stap hetman bilong Israel long 8pela yia olgeta. ¹⁵ Na Apdon pikinini man bilong Hilel long lain Piraton i dai na ol i planim em long ples Piraton long graun bilong ol Efraim long ol liklik maunten ples bilong ol Amalek.