25 ¹ God Yawe, yu God bilong mi na bai mi liptimapim nem bilong yu, long wanem, yu i bin mekim ol gutpela samting long mi, ol samting yu i bin tingim long mekim longtaim pinis wantaim strongpela bel na tingting. ² Bilong wanem, yu i bin mekim biktaun i bagarap nogut tru, nogat man i stap long en na ol man long narapela hap i no pret long kam long dispela biktaun. ³ Olsem na ol strongpela manmeri bai i givim biknem long yu na biktaun bilong ol kantri i no gat marimari bai i pret long yu. ⁴ Long wanem, yu bin kamap olsem ples hait bilong ol turangu lain na kamap haus bilong ol lain husait i save sot long planti samting. Yu i stap olsem haus long taim bilong bikpela ren na strongpela win na haitim ol long hat bilong san. Taim ol lain i no gat marimari i pulim win olsem bikpela ren na strongpela win long banis, ⁵ na i kamap olsem hat bilong san long ples drai, yu daunim nois bilong ol lain bilong narapela hap, olsem klaut i pasim ai bilong san na daunim hat bilong en. Dispela em i bekim singsing bilong ol lain i no gat marimari. ⁶ Long dispela maunten Saion bai God Yawe papa bilong olgeta samting i mekim bikpela pati wantaim ol fatpela kaikai samting, wantaim ol gutpela ol wain, wantaim ol gutpela abus mit na ol gutpela dring, long olgeta manmeri. ⁷ Antap long dispela maunten Saion, em bai i bagarapim olgeta samting i save karamapim na haitim ol manmeri, dispela laplap ol i samapim na karamapim olgeta kantri. ⁸ Em bai i daunim dai na dai bai i pinis olgeta na Bikpela God Yawe bai i rausim ai wara long ai bilong olgeta, dispela bel hevi bilong ol manmeri bilong em, em bai i rausim long graun olsem God Yawe i tok. ⁹ Long dispela taim ol bai i tok olsem, "Lukim, dispela em i God bilong mipela, mipela i bin wet long em na em bai kisim bek mipela. Dispela em God Yawe, mipela i bin wetim em, bai mipela i kalap kalap na hamamas long em i kisim bek mipela." ¹⁰ Long dispela maunten Saion long Jerusalem han bilong God Yawe bai i kam daun na ol lain Moab bai i pundaun long lek bilong ol birua olsem hap klos i pundaun insait long hul i pulap wantaim pekpek. ¹¹ Ol bai i opim han bilong ol namel long dispela pekpek olsem ol lain bilong swim i redi long swim tasol God Yawe bai i putim biknem na ol kainkain save bilong ol i go daun. ¹² Dispela strongpela banis bilong yu i go antap tru, bai em i brukim i go daun long graun na bai i kamap das.