30 ¹ Tok bilong God Yawe i kam long mi na i tok olsem, ² "Pikinini bilong man i tokim pinis dispela toktok, 'Bikpela God Yawe i tok olsem, "dei bilong bikpela sori i kam na ol manmeri i krai sori." ³ Dispela dei i kam klostu, dispela dei bilong God Yawe i kam klostu pinis. Dispela dei bai i dei bilong klaut na ol manmeri bai i stap long bikpela hevi. ⁴ Orait dispela bainat bilong pait bai ol i kisim i kam na pait wantaim ol lain bilong Isip long Kus. Ol bai kilim planti lain manmeri bilong Isip. Taim ol i go kisim sampela samting bilong ol i go, olgeta samting bilong ol bai i bagarap. ⁵ Kus na Put, Lidia na ol lain Arabia na ol Libia wantaim olgeta manmeri ol i bin mekim kontrak, bai ol i kilim dispela lain tu i dai. ⁶ God Yawe i tok olsem, orait wanpela man husait i go helpim ol Isip, em tu bai i dai. Husait man i amamas long strong bilong em, bai mi rausim strong bilong em. Long Mikdol i go olsem long Saien olgeta soldia bilong ol tu bai i dai long dispela pait. Dispela em, Bikpela God Yawe i tokaut. ⁷ Orait bai ol i lusim dispela ples na i go wantaim bikpela wari na sori. Biktaun bilong ol tu bai i bagarap olgeta olsem ol arapela biktaun i bagarap pinis. ⁸ Nau bai ol i save olsem mi God Yawe, mi bin salim paia i kam long Isip na bagarapim olgeta lain manmeri we husait i save helpim ol. ⁹ Long dispela taim, ol man bilong kisim toksave bai i go paslain long sip na pait long kisim hap graun bilong Kus. Dai bai i kam long ol lain manmeri bilong Isip na bai ol i stap long bikpela pen na wari. Harim gut! Dispela dei em bai kam. ¹⁰ Bikpela God Yawe i tok olsem, bai mi pinisim ol lain manmeri bilong Isip bai i stap long han bilong Nebukanesa, king bilong ol Babilon. ¹¹ Orait em bai kisim olgeta soldia bilong em wantaim i kam na bagarapim olgeta samting i stap long Isip na kilim olgeta lain manmeri i stap long dispela ples. ¹² Orait bai mi mekim na dispela wara bai i drai na i kamap graun nating. Mi bai salim graun bilong yupela long ol man nogut. Dispela graun bai i bagarap na olgeta lain manmeri bai i no inap stap moa long dispela ples. Mi, God Yawe i tok olsem. ¹³ Bikpela God Yawe i tok olsem, bai mi bagarapim dispela olgeta god giaman. Dispela god giaman bilong Memfis bai i no inap i stap moa, bai mi bagarapim olgeta. Orait, ol bai i no inap moa i stap olsem pikinini man bilong king long graun bilong ol Isip na bai mi mekim na pret tasol bai pulapim dispela graun bilong ol Isip. ¹⁴ Bai mi mekim dispela ples Patros i go ples nating na ol man i no inap moa i stap long dispela ples, bai mi salim paia i kam na bagarapim taun Soan na bai mi mekim save long ol lain manmeri bilong Tibes. ¹⁵ Bai mi kapsaitim bikpela belhat bilong mi antap long ol lain Pelusim na planti strongpela lain manmeri bilong Isip na Tibes. ¹⁶ Mi bai putim paia i go long Isip na Pelusim bai i stap long bikpela wari. Ol lain manmeri bilong Tibes bai i bruk i go i kam na olgeta taim ol lain Mempis bai i bungim ol birua bilong ol. ¹⁷ Orait bai ol i kilim i dai planti yangpela man bilong Heliopolis na Bubastis. Bai ol i go kisim olgeta lain manmeri bilong dispela biktaun na i go kalabusim ol. ¹⁸ Tudak bai i karamapim dispela ples Tapenis, taim mipela i brukim daun strong bilong ol Isip na i go insait namel long ol, pasin bilong hapim nem bilong ol na strong bilong ol bai i pinis. Klaut bai i karamapim ol na bai ol i kalabusim ol pikinini meri bilong ol. ¹⁹ Bai mi kotim ol lain manmeri bilong Isip na bai ol i save olsem Mi God Yawe."' ²⁰ Orait dispela tok i kam long 11pela yia long namba 1 mun long 7pela dei bilong dispela mun, tok bilong God Yawe i kam long mi na i tok, ²¹ "Pikinini bilong man harim, mi brukim pinis han bilong Fero, king bilong ol lain man meri bilong Isip. Harim gut, em bai i no inap orait gen, han bilong em i no inap strong long holim bainat bilong pait. ²² Olsem na Bikpela God Yawe i tok olsem, 'harim gut! Bai mi mekim save long Fero ,king bilong ol Isip. Orait bai mi brukim tupela han bilong em na bainat bai pundaun long han bilong em. ²³ Orait bai mi mekim olgeta lain manmeri bilong Isip bai i go nabaut long ol kantri bilong ol narapela lain man. ²⁴ Orait bai mi strongim han bilong king bilong Babilon na putim bainat long han bilong em na em bai i bagarapim han bilong Fero. Bai em i pilim bikpela pen na bihainim king Bilong Babilon wankain olsem dai man i stap long pen. ²⁵ Orait bai mi strongim han bilong king bilong Babilon na han bilong Farao bai i nogat moa strong. Bai ol i save olsem mi God Yawe, taim mi givim bainat long king bilong Babilon, em bai i kilim ol lain manmeri bilong Isip. ²⁶ Orait bai mi rausim nabaut ol manmeri bilong Isip i go namel long ol kantri bilong ol arapela lain manmeri. Nau bai ol i save olsem mi God Yawe."'